କେନ୍ଦ୍ରାପଡ଼ା ଜିଲ୍ଲାର ନୀଳପଡ଼ା ନିକଟ ବିରୂପା ନଦୀରେ ସୋମବାର ଭୋରୁ ଏକ ଅଘଟଣ ଘଟିଛି। ନଦୀରେ ଗାଧୋଇବା ବେଳେ ଏକ ଦମ୍ପତି ପ୍ରଖର ସ୍ରୋତରେ ଭାସିଯାଇଥିବା ଅଭିଯୋଗ ହୋଇଛି।

ସୂଚନା ଅନୁସାରେ, ସୌଦିଆ ଅଞ୍ଚଳରୁ ଆସିଥିବା ଏହି ଦମ୍ପତି ଭୋର ପ୍ରାୟ ୩ଟାରେ ନଦୀକୁ ଗାଧୋଇବା ପାଇଁ ଯାଇଥିଲେ। ଗାଧୋଇବା ସମୟରେ ହଠାତ୍‌ ନଦୀ ସ୍ରୋତରେ ଦୁହେଁ ଭାସିଯାଇଥିବା ଜଣାପଡ଼ିଛି। ଏହାପରେ ଉଦ୍ଧାର ଅଭିଯାନ ଆରମ୍ଭ ହୋଇଥିଲା।

ଘଟଣାରେ ପତ୍ନୀ ତିଳୋତ୍ତମା ଓଝାଙ୍କୁ ବିରୂପା ନଦୀରୁ ଉଦ୍ଧାର କରାଯାଇଛି। ପରେ ତାଙ୍କୁ ଚିକିତ୍ସା ପାଇଁ କେନ୍ଦ୍ରାପଡ଼ା ଇନ୍ଦୁପୁର କମ୍ୟୁନିଟି ହେଲ୍‌ଥ ସେଣ୍ଟରରେ ଭର୍ତ୍ତି କରାଯାଇଛି।

ତେବେ ତାଙ୍କ ସ୍ୱାମୀ ସୁଧାକର ଓଝାଙ୍କର ଏପର୍ଯ୍ୟନ୍ତ କୌଣସି ସନ୍ଧାନ ମିଳିନାହିଁ। ସେ ଯାଜପୁର ଜିଲ୍ଲା ବଡ଼ଚଣା ବ୍ଲକ୍‌ ଅନ୍ତର୍ଗତ ତାଳୁଆ ଅଞ୍ଚଳର ବୋଲି ସୂଚନା ମିଳିଛି। ତାଙ୍କୁ ଖୋଜିବା ପାଇଁ ବରୀ ଅଗ୍ନିଶମ ବାହିନୀ ପକ୍ଷରୁ ନଦୀରେ ସର୍ଚ୍ଚ ଅପରେସନ୍‌ ଜାରି ରହିଛି।

ଗଜପତିରେ ମଧ୍ୟ ନଦୀରେ ନିଖୋଜ

ଏହିପରି ଆଉ ଏକ ଘଟଣା ଗଜପତି ଜିଲ୍ଲାରେ ଘଟିଛି। ଶନିବାର ସକାଳେ ମହେନ୍ଦ୍ରତନୟା ନଦୀରେ ଗାଧୋଇବା ବେଳେ ଜଣେ ବୃଦ୍ଧ ଭାସିଯାଇ ନିଖୋଜ ହୋଇଥିବା ରିପୋର୍ଟ ହୋଇଛି।

ନିଖୋଜ ବ୍ୟକ୍ତିଜଣକ ପାରଳାଖେମୁଣ୍ଡି ଉପକଣ୍ଠ କେରାଣ୍ଡି ପଞ୍ଚାୟତ ଅନ୍ତର୍ଗତ ଅମରା ଗାଁର ଦୁର୍ଗା ପ୍ରସାଦ ପାଣିଗ୍ରାହୀ ବୋଲି ଜଣାପଡ଼ିଛି। ସେ ଭୋର ପ୍ରାୟ ୫ଟାରେ ନଦୀକୁ ଗାଧୋଇବାକୁ ଯାଇଥିଲେ। ଘରକୁ ଫେରିନଥିବାରୁ ପରିବାର ଲୋକେ ଖୋଜାଖୋଜି କରିଥିଲେ। କିଛି ଗ୍ରାମବାସୀ ତାଙ୍କୁ ନଦୀ ସ୍ରୋତରେ ଭାସିଯାଉଥିବା ଦେଖି ଅଗ୍ନିଶମ ବାହିନୀକୁ ଖବର ଦେଇଥିବା ରିପୋର୍ଟରେ କୁହାଯାଇଛି।