ଭାରତର ସ୍ୱଦେଶୀ ଏୟାରୋ-ଇଞ୍ଜିନ୍ ବିକାଶ ଯାତ୍ରାରେ କାଭେରୀ ଇଞ୍ଜିନ୍ ଏକ ନୂଆ ପର୍ଯ୍ୟାୟରେ ପହଞ୍ଚିଛି। DRDOର Gas Turbine Research Establishment (GTRE) ଦ୍ୱାରା ବିକଶିତ କାଭେରୀ ଡ୍ରାଇ ଇଞ୍ଜିନ୍ ରୁଷିଆରେ ହାଇ-ଆଲ୍ଟିଟ୍ୟୁଡ୍ ଓ ଫ୍ଲାଇଟ୍ ଟ୍ରାଏଲ୍ ପାର୍ କରିଛି। ରିପୋର୍ଟ ଅନୁସାରେ, ଇଞ୍ଜିନ୍ ୪୮.୫ କିଲୋନ୍ୟୁଟନ୍ (kN) ପିକ୍ ଡ୍ରାଇ ଥ୍ରଷ୍ଟ ହାସଲ କରିଛି, ଯେତେବେଳେ ଏହାର ଲକ୍ଷ୍ୟ ପ୍ରାୟ ୪୬ kN ଥିଲା।

କାଭେରୀ ପ୍ରକଳ୍ପର ଆରମ୍ଭ ଭାରତର ଲାଇଟ୍ କମ୍ବାଟ୍ ଏୟାରକ୍ରାଫ୍ଟ (LCA) ତେଜସ ପାଇଁ ସ୍ୱଦେଶୀ ଇଞ୍ଜିନ୍ ବିକଶିତ କରିବା ଉଦ୍ଦେଶ୍ୟରେ ହୋଇଥିଲା। କିନ୍ତୁ ତେଜସ ପାଇଁ ଆବଶ୍ୟକ ଥ୍ରଷ୍ଟ ଓ ଇଞ୍ଜିନ୍‌ର ଓଜନ ସମ୍ପର୍କିତ ପ୍ରମୁଖ ପ୍ରଯୁକ୍ତିଗତ ଚ୍ୟାଲେଞ୍ଜ ଯୋଗୁଁ ଏହା ପ୍ରଡକ୍ସନ୍ ଭର୍ସନ୍‌ରେ ବ୍ୟବହୃତ ହୋଇପାରିନଥିଲା।

ପରବର୍ତ୍ତୀ ସମୟରେ କାଭେରୀର ଡ୍ରାଇ ଭର୍ସନ୍ ବା Kaveri Derivative Engine (KDE) ବିକାଶ ଉପରେ ଗୁରୁତ୍ୱ ଦିଆଗଲା। ‘ଡ୍ରାଇ ଇଞ୍ଜିନ୍’ରେ ଆଫ୍ଟରବର୍ନର୍ ନଥାଏ। ଏହି ଭର୍ସନ୍‌କୁ ଭାରତର ପ୍ରସ୍ତାବିତ ଷ୍ଟେଲ୍ଥ Ghatak Unmanned Combat Aerial Vehicle (UCAV) ପାଇଁ ବିକଶିତ କରାଯାଉଛି।

ରୁଷିଆର Central Institute of Aviation Motors (CIAM) ଏବଂ Gromov Flight Research Instituteରେ ଇଞ୍ଜିନ୍‌ର ପରୀକ୍ଷା କରାଯାଇଥିବା ରିପୋର୍ଟ ହୋଇଛି। ଫ୍ଲାଇଟ୍ ଟେଷ୍ଟ ପାଇଁ ପରିବର୍ତ୍ତିତ Ilyushin Il-76 flying testbed ବ୍ୟବହାର କରାଯାଇଥିଲା। ବିଭିନ୍ନ ଉଚ୍ଚତା, ଚାପ, Mach number ଓ thrust conditionsରେ ଇଞ୍ଜିନ୍‌ର କ୍ଷମତା ପରୀକ୍ଷା କରାଯାଇଥିଲା।

ତେବେ ରୁଷିଆରେ ପରୀକ୍ଷଣ ସଫଳ ହେବାର ଅର୍ଥ ଇଞ୍ଜିନ୍ ତୁରନ୍ତ ଘାତକ UCAVରେ ବ୍ୟବହାର ହେବ ନୁହେଁ। ଏବେ CEMILAC (Centre for Military Airworthiness and Certification) ପରୀକ୍ଷଣ ତଥ୍ୟ ଓ ଅନ୍ୟାନ୍ୟ ପାରାମିଟର ଯାଞ୍ଚ କରିବ। ଏହା ପରେ ସାର୍ଟିଫିକେସନ୍, ଏୟାରୱର୍ଥିନେସ୍ କ୍ଲିୟାରାନ୍ସ ଏବଂ ଘାତକ ସହ ଇଞ୍ଜିନ୍‌ର ଇଣ୍ଟିଗ୍ରେସନ୍ ହେବ। ତା’ପରେ ଇନ୍ଷ୍ଟଲ୍ଡ ଫ୍ଲାଇଟ୍ ଟ୍ରାଏଲ୍ ଆଗକୁ ବଢ଼ିବ।

୪୮.୫ kN ଥ୍ରଷ୍ଟ ଏହି ପର୍ଯ୍ୟାୟର ଏକ ଗୁରୁତ୍ୱପୂର୍ଣ୍ଣ ପରୀକ୍ଷଣ ଫଳାଫଳ। କିନ୍ତୁ କାଭେରୀର ପରବର୍ତ୍ତୀ ବଡ଼ ପରୀକ୍ଷା ହେବ ସାର୍ଟିଫିକେସନ୍ ଓ ଘାତକ UCAV ସହ ସଫଳ ଇଣ୍ଟିଗ୍ରେସନ୍। ଏହି ସଫଳତା ଭାରତର ସ୍ୱଦେଶୀ ଏୟାରୋ-ଇଞ୍ଜିନ୍ ପ୍ରଯୁକ୍ତି ବିକାଶ ଉଦ୍ୟମରେ ଏକ ନୂଆ ମାଇଲଷ୍ଟୋନ୍ ଭାବେ ଦେଖାଯାଉଛି।