ଓଡ଼ିଶାରେ ବଡ଼ ଶିଳ୍ପ ନିବେଶକୁ ନେଇ ଆଉ ଏକ ଗୁରୁତ୍ୱପୂର୍ଣ୍ଣ ଖବର ସାମ୍ନାକୁ ଆସିଛି। JSW ଷ୍ଟିଲ୍ ଏବଂ ଦକ୍ଷିଣ କୋରିଆର ପ୍ରମୁଖ ଇସ୍ପାତ କମ୍ପାନି Posco ମିଶି ଓଡ଼ିଶାରେ ଏକ ଯୌଥ ଇସ୍ପାତ କାରଖାନା ସ୍ଥାପନ କରିବା ପାଇଁ ଗୁରୁତ୍ୱପୂର୍ଣ୍ଣ ବୁଝାମଣାପତ୍ର (MoU) ସ୍ୱାକ୍ଷର କରିଛନ୍ତି।

ଏହି ପ୍ରକଳ୍ପ ଅଧୀନରେ ଉଭୟ କମ୍ପାନି ମିଶି ଓଡ଼ିଶାରେ ବାର୍ଷିକ ୬ ନିୟୁତ ଟନ୍ (6 MTPA) ଉତ୍ପାଦନ କ୍ଷମତା ବିଶିଷ୍ଟ ଏକ ବଡ଼ ଇସ୍ପାତ କାରଖାନା ସ୍ଥାପନ କରିବେ। ପ୍ରକଳ୍ପଟି ପାଇଁ ପ୍ରାୟ ୩୫ ହଜାର କୋଟି ଟଙ୍କା ନିବେଶ ହେବ ବୋଲି କୁହାଯାଇଛି।

କାରଖାନା କେଉଁଠି ହେବ? କଳ୍ପନାଜଳ୍ପନାର ଅନ୍ତ

ଦୀର୍ଘଦିନ ଧରି ଏହି ପ୍ରକଳ୍ପ କେଉଁ ଜିଲ୍ଲାରେ ସ୍ଥାପନ ହେବ, ତାହାକୁ ନେଇ ଅନେକ ଚର୍ଚ୍ଚା ଚାଲିଥିଲା। କେହି କେହି ଏହାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଙ୍କ ଜିଲ୍ଲା କେନ୍ଦୁଝରରେ ସ୍ଥାପନ ହେବ ବୋଲି କହୁଥିଲେ।

କିନ୍ତୁ JSW ଗ୍ରୁପ୍ ପକ୍ଷରୁ ଆଜି ସ୍ପଷ୍ଟ କରାଯାଇଛି ଯେ, ପ୍ରସ୍ତାବିତ ଇସ୍ପାତ କାରଖାନା ଢେଙ୍କାନାଳ ଜିଲ୍ଲାରେ ସ୍ଥାପନ କରାଯିବ। JSW କହିଛି ଯେ ଢେଙ୍କାନାଳରେ କମ୍ପାନି ପାଖରେ ପୂର୍ବରୁ ଆବଶ୍ୟକ ଜମି ଉପଲବ୍ଧ ରହିଛି।

ଉଚ୍ଚ ମାନର ଇସ୍ପାତ ଉତ୍ପାଦନ କରିବ କାରଖାନା

ଏହି ପ୍ରକଳ୍ପ ଅଧୀନରେ ସ୍ଥାପିତ କାରଖାନାରେ ଅଟୋମୋବାଇଲ୍ ଶିଳ୍ପ ସହିତ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ କ୍ଷେତ୍ର ପାଇଁ ଉଚ୍ଚ ଗୁଣମାନର ଇସ୍ପାତ ଉତ୍ପାଦନ କରାଯିବ।

ନୂଆଦିଲ୍ଲୀର India-Korea Business Summitରେ MoU ସ୍ୱାକ୍ଷର

JSW ଓ Posco ମଧ୍ୟରେ ଏହି MoU ନୂଆଦିଲ୍ଲୀରେ ଆୟୋଜିତ ଭାରତ-କୋରିଆ ବ୍ୟବସାୟ ସମ୍ମିଳନୀ ଅବସରରେ ସ୍ୱାକ୍ଷର ହୋଇଛି।

Saffron Resources ଜରିଆରେ କାର୍ଯ୍ୟକାରୀ ହେବ ପ୍ରକଳ୍ପ

JSW ଗ୍ରୁପ୍ର ସମ୍ପୂର୍ଣ୍ଣ ସହାୟକ କମ୍ପାନି Saffron Resources ମାଧ୍ୟମରେ ଏହି ଢେଙ୍କାନାଳ ପ୍ରକଳ୍ପକୁ କାର୍ଯ୍ୟକାରୀ କରାଯିବ। JSW ୨୦୨୫ ମସିହାରେ ଏହି କମ୍ପାନିକୁ ଅଧିଗ୍ରହଣ କରିଥିଲା।

Posco ପୁଣିଥରେ ଓଡ଼ିଶାକୁ ଫେରୁଛି

ଏହି JSW-Posco ପ୍ରକଳ୍ପ ଓଡ଼ିଶା ପାଇଁ ବିଶେଷ ଗୁରୁତ୍ୱ ରଖୁଛି। କାରଣ ପୂର୍ବରୁ Posco ୫୨ ହଜାର କୋଟି ଟଙ୍କା ନିବେଶରେ ୧୨ ନିୟୁତ ଟନ୍ କ୍ଷମତା ବିଶିଷ୍ଟ ଏକ ବଡ଼ ଇସ୍ପାତ କାରଖାନା ସ୍ଥାପନ କରିବାକୁ ପ୍ରାୟ ୧୨ ବର୍ଷ ଧରି ପ୍ରୟାସ କରିଥିଲା, କିନ୍ତୁ ସେହି ପ୍ରକଳ୍ପ ଅନେକ କାରଣରୁ ସଫଳ ହୋଇନଥିଲା।

ଏବେ Posco ପୁଣିଥରେ ଓଡ଼ିଶାରେ ନିବେଶ କରିବାକୁ ଫେରୁଥିବାରୁ ଏହାକୁ ରାଜ୍ୟର ଶିଳ୍ପ ଉନ୍ନତି ପାଇଁ ଏକ ବଡ଼ ସୁଯୋଗ ଭାବେ ଦେଖାଯାଉଛି।