ଜାମତାଡ଼ା ନାମ ଶୁଣିଲେ ଅନେକଙ୍କ ମନରେ ସାଇବର ଅପରାଧର ଛବି ଆସିଥାଏ। କିନ୍ତୁ ଏବେ ଏହି ଜିଲ୍ଲାର ଦୁଇ ଯୁବତୀ ଲକ୍ଷ୍ମୀ କୁମାରୀ ଓ ପୂର୍ଣ୍ଣିମା କୁମାରୀ କ୍ରିକେଟ୍‌ରେ ନିଜ ପ୍ରତିଭା ଦେଖାଇ ଜାମତାଡ଼ାକୁ ଏକ ନୂଆ ପରିଚୟ ଦେଇଛନ୍ତି। କର୍ମାଟାଣ୍ଡର ଏହି ଦୁଇ ଖେଳାଳି ଆର୍ଥିକ ସମସ୍ୟା ଓ ସାମାଜିକ ଚାପ ସତ୍ତ୍ୱେ ଝାଡ଼ଖଣ୍ଡ U-19 ମହିଳା କ୍ରିକେଟ୍ ଦଳରେ ସ୍ଥାନ ପାଇଛନ୍ତି।

ଲକ୍ଷ୍ମୀ କୁମାରୀ କର୍ମାଟାଣ୍ଡର ଡୁମରିଆ ଗାଁର ବାସିନ୍ଦା। ତାଙ୍କ ବାପା ଏକ ଜଳଖିଆ ଦୋକାନରେ ମେକାନିକ୍‌ ଭାବେ କାମ କରନ୍ତି ଏବଂ ମାସକୁ ପ୍ରାୟ ୧୨ରୁ ୧୩ ହଜାର ଟଙ୍କା ଆୟ କରନ୍ତି। ପରିବାରରେ ଚାରି ଝିଅ ଓ ଜଣେ ପୁଅ ଥିବା ସତ୍ତ୍ୱେ ଲକ୍ଷ୍ମୀଙ୍କ କ୍ରିକେଟ୍‌ ଖେଳିବାର ଇଚ୍ଛାକୁ ପରିବାର ସମର୍ଥନ କରିଛି। ସେ ସକାଳେ ଅଭ୍ୟାସ କରିବା ପରେ ସ୍କୁଲ ଯାଉଥିଲେ। ତାଙ୍କ ଘରେ ଥିବା ପଦକ ଓ ପ୍ରମାଣପତ୍ର ତାଙ୍କ ଦୀର୍ଘ ସଂଘର୍ଷର ସାକ୍ଷୀ। 

ଅନ୍ୟପଟେ ପୂର୍ଣ୍ଣିମା କୁମାରୀ କର୍ମାଟାଣ୍ଡର ଶାନ୍ତିନଗରରେ ରୁହନ୍ତି। ତାଙ୍କ ବାପା ଏକ ଛୋଟ ଚିକେନ୍‌ ଦୋକାନ ଚଳାନ୍ତି। କ୍ରିକେଟ୍‌ ଖେଳିବା ପାଇଁ ପୂର୍ଣ୍ଣିମା ଘରୁ ପ୍ୟାଣ୍ଟ ଓ ସାର୍ଟ ପିନ୍ଧି ବାହାରୁଥିବା ବେଳେ ପଡ଼ୋଶୀଙ୍କ କିଛି ଟାହିଟାପରାର ସାମ୍ନା କରିଥିଲେ। କିନ୍ତୁ ପରିବାର ଏହି କଥାକୁ ଗୁରୁତ୍ୱ ନଦେଇ ତାଙ୍କୁ ଖେଳ ଜାରି ରଖିବାକୁ ସମର୍ଥନ କରିଥିଲା। 

ଉଭୟଙ୍କ କ୍ରିକେଟ୍‌ ଯାତ୍ରାରେ ବିଦ୍ୟାସାଗର ସ୍ପୋର୍ଟସ ଏକାଡେମୀର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଏକାଡେମୀର ପ୍ରତିଷ୍ଠାତା ଓ କୋଚ୍ ନିବାସ ମଣ୍ଡଳ ପ୍ରାୟ ୮ ବର୍ଷ ଧରି ଝିଅମାନଙ୍କୁ ମାଗଣା କ୍ରିକେଟ୍ ତାଲିମ ଦେଇଆସୁଛନ୍ତି। ସୀମିତ ସୁବିଧା ଥିଲେ ମଧ୍ୟ ଆର୍ଥିକ ଭାବେ ଦୁର୍ବଳ ପରିବାରର ଖେଳାଳିମାନଙ୍କୁ ଏଠାରେ ପ୍ରଶିକ୍ଷଣ ଦିଆଯାଉଛି। 

ବର୍ତ୍ତମାନ ଲକ୍ଷ୍ମୀ ଓ ପୂର୍ଣ୍ଣିମା ୨୦୨୬-୨୭ BCCI Under-19 State Championship T20ରେ ଝାଡ଼ଖଣ୍ଡକୁ ପ୍ରତିନିଧିତ୍ୱ କରିବେ। ଉଭୟଙ୍କ ଲକ୍ଷ୍ୟ ଏବେ ଆହୁରି ବଡ଼—ଭବିଷ୍ୟତରେ ଭାରତୀୟ ମହିଳା କ୍ରିକେଟ୍ ଦଳରେ ସ୍ଥାନ ପାଇ ନୀଳ ଜର୍ସି ପିନ୍ଧିବା।