ଇସ୍ରାଏଲରେ ଜଣେ ପରମାଣୁ ବୈଜ୍ଞାନିକ ଓ ତାଙ୍କ ପରିବାରକୁ ହତ୍ୟା କରିବା ପାଇଁ ହୋଇଥିବା ଏକ ଷଡ଼ଯନ୍ତ୍ରକୁ ସୁରକ୍ଷା ଏଜେନ୍ସି ବିଫଳ କରିଥିବା ଦାବି କରାଯାଇଛି। ଏହି ମାମଲାରେ ଯେରୁଶାଲେମର ବେତ ସାଫାଫା ଅଞ୍ଚଳର ୪ ଜଣଙ୍କୁ ଗିରଫ କରାଯାଇଥିଲା। ପରେ ଅଭିଯୁକ୍ତମାନେ ନିଜ ଭୂମିକା ସହ ଜଡ଼ିତ କିଛି ଅପରାଧ ସ୍ୱୀକାର କରିଥିବା କୁହାଯାଇଛି।

ଇସ୍ରାଏଲର ରାଜ୍ୟ ଆଟର୍ଣ୍ଣି କାର୍ଯ୍ୟାଳୟର ତଥ୍ୟ ଅନୁସାରେ, ଅଭିଯୁକ୍ତମାନେ ଇରାନର ନିର୍ଦ୍ଦେଶରେ ଜଣେ ଇସ୍ରାଏଲୀ ପରମାଣୁ ବୈଜ୍ଞାନିକଙ୍କୁ ଟାର୍ଗେଟ କରିବା ସମ୍ପର୍କିତ ଯୋଜନାରେ ଜଡ଼ିତ ଥିଲେ। ତେବେ ଅଦାଲତର ରାୟ ଅନୁସାରେ ସେମାନଙ୍କୁ ସିଧାସଳଖ ହତ୍ୟା ଷଡ଼ଯନ୍ତ୍ର ଅଭିଯୋଗରେ ଦୋଷୀ ସାବ୍ୟସ୍ତ କରାଯାଇନାହିଁ।

ଅଭିଯୋଗ ଅନୁସାରେ, ୨୦୨୪ ସେପ୍ଟେମ୍ବରରେ ରାମି ଅଲିଆନ୍ ନାମକ ଜଣେ ବ୍ୟକ୍ତିଙ୍କ ସହ ଇରାନ ପାଇଁ କାମ କରୁଥିବା ଜଣେ ବ୍ୟକ୍ତି ଯୋଗାଯୋଗ କରିଥିଲେ। ନିର୍ଦ୍ଦିଷ୍ଟ କାମ କରିବା ବଦଳରେ ତାଙ୍କୁ ବଡ଼ ଅର୍ଥରାଶି ଦେବାର ପ୍ରସ୍ତାବ ଦିଆଯାଇଥିବା ଅଭିଯୋଗ ରହିଛି। ପରେ ବୈଜ୍ଞାନିକ ଓ ତାଙ୍କ ପରିବାରକୁ ଟାର୍ଗେଟ କରିବା ପାଇଁ ଏକ ଗୋଷ୍ଠୀ ଗଠନ କରିବାକୁ କୁହାଯାଇଥିବା ମଧ୍ୟ ଅଭିଯୋଗ ହୋଇଛି।

ଯୋଜନାର ଅଂଶ ଭାବେ ଦୁଇ ଅଭିଯୁକ୍ତ ରେହୋଭୋଟ୍‌ସ୍ଥିତ ୱାଇଜମାନ୍ ଇନ୍‌ଷ୍ଟିଚ୍ୟୁଟ୍ ଅଫ୍ ସାଇନ୍ସକୁ ଯାଇଥିବା ଅଭିଯୋଗ ରହିଛି। ସେମାନଙ୍କୁ ସୁରକ୍ଷାକର୍ମୀ ଭିତରକୁ ପ୍ରବେଶ କରିବାକୁ ଦେଇନଥିଲେ। ପରେ ସେମାନେ ଗେଟ୍‌ର ଫଟୋ ଉଠାଇ ଇରାନୀ ହ୍ୟାଣ୍ଡଲରଙ୍କୁ ପଠାଇଥିବା ଅଭିଯୋଗ ହୋଇଛି।

ଏହାସହ ବୈଜ୍ଞାନିକଙ୍କ ଘରକୁ ଷ୍ଟନ୍ ଗ୍ରେନେଡ୍ ଫିଙ୍ଗିବା ଏବଂ ଘଟଣାକୁ ଏକ ସାଧାରଣ ଆକ୍ରମଣ ଭଳି ଦେଖାଇବାର ଯୋଜନା ଥିବା ତଦନ୍ତକାରୀଙ୍କ ଅଭିଯୋଗ। ଏପରିକି ପୋଲିସ ଗାଡ଼ି ପାଇଁ ନକଲି ନମ୍ବର ପ୍ଲେଟ୍ ଯୋଗାଡ଼ କରାଯାଇଥିବା ମଧ୍ୟ କୁହାଯାଇଛି।

ତେବେ ଆକ୍ରମଣ ଘଟିବା ପୂର୍ବରୁ ଇସ୍ରାଏଲୀ ସୁରକ୍ଷା ଏଜେନ୍ସି ଅଭିଯୁକ୍ତମାନଙ୍କୁ ଗିରଫ କରିଥିଲା। ଯେରୁଶାଲେମ ଜିଲ୍ଲା ଅଦାଲତ ଏବେ ଏହି ୪ ଜଣଙ୍କୁ ସେମାନଙ୍କ ଭୂମିକା ସହ ଜଡ଼ିତ ବିଭିନ୍ନ ଅପରାଧରେ ଦୋଷୀ ସାବ୍ୟସ୍ତ କରିଛନ୍ତି।

ଏହି ମାମଲାକୁ ୨୦୨୦ରେ ଇରାନର ପରମାଣୁ ବୈଜ୍ଞାନିକ ଡ. ମୋହସିନ୍ ଫଖରିଜାଦେହଙ୍କ ହତ୍ୟା ସହ ତୁଳନା କରାଯାଉଛି। ସେତେବେଳେ ଫଖରିଜାଦେହଙ୍କ ହତ୍ୟା ପଛରେ ଇସ୍ରାଏଲୀ ଗୁପ୍ତଚର ସଂସ୍ଥା ମୋସାଦ୍‌ର ହାତ ଥିବା ଇରାନ ଅଭିଯୋଗ କରିଥିଲା।

ଏହି ମାମଲାରେ ଆଉ ୩ ଜଣଙ୍କ ବିରୋଧରେ ଆଇନଗତ ପ୍ରକ୍ରିୟା ଜାରି ରହିଥିବା ରିପୋର୍ଟରେ କୁହାଯାଇଛି।