ଅସ୍ତ୍ରବିରତି ଚୁକ୍ତି ଲାଗୁ ଥିଲେ ମଧ୍ୟ ଗାଜା ଭୂଖଣ୍ଡରେ ହିଂସା ଥମିବାର ନାଁ ନେଉନାହିଁ। ବୁଧବାର ଇସ୍ରାଏଲ ପକ୍ଷରୁ ହୋଇଥିବା ଏକାଧିକ ଏୟାର୍ ଷ୍ଟ୍ରାଇକ୍ରେ ଅତିକମରେ ୧୨ ଜଣ ସାଧାରଣ ନାଗରିକଙ୍କ ପ୍ରାଣହାନି ଘଟିଥିବା ସ୍ଥାନୀୟ ସ୍ୱାସ୍ଥ୍ୟ ଅଧିକାରୀମାନେ ସୂଚନା ଦେଇଛନ୍ତି।

ଉତ୍ତର ଗାଜାର ଜବାଲିଆ ଶରଣାର୍ଥୀ ଶିବିରରେ ଥିବା ଏକ ପୋଲିସ ଷ୍ଟେସନ୍ ଉପରେ ହୋଇଥିବା ବୋମାମାଡ଼ରେ ଜଣେ ମହିଳାଙ୍କ ସମେତ ୬ ଜଣ ପୋଲିସ କର୍ମଚାରୀଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ସିନିୟର କମାଣ୍ଡର କର୍ଣ୍ଣେଲ ମହମ୍ମଦ ମରୱାନ ସାଲେମ ମଧ୍ୟ ରହିଛନ୍ତି।

ସେହିପରି ଦକ୍ଷିଣ ଗାଜାର ଖାନ୍ ୟୁନିସ ଓ ରାଫା ସୀମାବର୍ତ୍ତୀ ଅଞ୍ଚଳରେ ମଧ୍ୟ ଇସ୍ରାଏଲୀ ସେନାର ଗୁଳିମାଡ଼ ଓ ବୋମାବର୍ଷଣରେ ଜଣେ ଶିଶୁ ସମେତ ଅନ୍ୟ କିଛି ଲୋକଙ୍କ ମୃତ୍ୟୁ ହୋଇଥିବା ଖବର ମିଳିଛି।

ଇସ୍ରାଏଲୀ ସେନା ଦାବି କରିଛି ଯେ, ନିହତ ପୋଲିସ ଅଧିକାରୀମାନେ ହାମାସ ସହ ସଂପୃକ୍ତ ଥିଲେ। ତେବେ ଏହି ଦାବିକୁ ସମର୍ଥନ କରିବା ପାଇଁ କୌଣସି ସ୍ପଷ୍ଟ ପ୍ରମାଣ ସାମ୍ନାକୁ ଆସିନାହିଁ। ଅନ୍ୟପଟେ ହାମାସ କହିଛି ଯେ, ନିହତ ପୋଲିସ କର୍ମଚାରୀମାନେ କେବଳ ଆଇନ ଶୃଙ୍ଖଳା ରକ୍ଷା କାର୍ଯ୍ୟରେ ନିୟୋଜିତ ଥିଲେ।

ଜାତିସଂଘର ମାନବାଧିକାର କାର୍ଯ୍ୟାଳୟ ମଧ୍ୟ ଗାଜାରେ ସାଧାରଣ ପୋଲିସ କର୍ମଚାରୀଙ୍କ ଉପରେ ଆକ୍ରମଣକୁ ନେଇ ଗଭୀର ଚିନ୍ତା ପ୍ରକାଶ କରିବା ସହ ଏହାର ନିନ୍ଦା କରିଛି।

ସୂଚନାଯୋଗ୍ୟ, ଅକ୍ଟୋବରରେ ଲାଗୁ ହୋଇଥିବା ଅସ୍ତ୍ରବିରତି ପରଠାରୁ ଏପର୍ଯ୍ୟନ୍ତ ଗାଜାରେ ୧,୧୨୩ରୁ ଅଧିକ ଲୋକ ପ୍ରାଣ ହରାଇଥିବାବେଳେ, ୨୦୨୩ ଅକ୍ଟୋବର ୭ରୁ ଆରମ୍ଭ ହୋଇଥିବା ଯୁଦ୍ଧରେ ସମୁଦାୟ ପାଲେଷ୍ଟାଇନ ମୃତ୍ୟୁସଂଖ୍ୟା ୭୩,୨୬୪ ଅତିକ୍ରମ କରିଥିବା ସୂଚନା ମିଳିଛି।