ଆମେରିକା-ଇରାନ ମଧ୍ୟରେ ଶାନ୍ତି ଆଲୋଚନା ପାଇଁ ଇରାନ ସଂସଦର ବାଚସ୍ପତି ମହମ୍ମଦ ବାଘେର ଗାଲିବାଫଙ୍କ ନେତୃତ୍ୱରେ ଏକ ଉଚ୍ଚସ୍ତରୀୟ ପ୍ରତିନିଧି ଦଳ ଶନିବାର ବିଳମ୍ବିତ ରାତିରେ ପାକିସ୍ତାନର ରାଜଧାନୀ ଇସଲାମାବାଦରେ ପହଞ୍ଚିଛନ୍ତି। ପାକିସ୍ତାନର ସେନା ମୁଖ୍ୟ ଫିଲ୍ଡ ମାର୍ଶାଲ ଅସୀମ ମୁନିର ଏବଂ ବୈଦେଶିକ ମନ୍ତ୍ରୀ ଇସାକ ଦାର ନୁର ଖାନ ଏୟାର ବେସ୍ରେ ତାଙ୍କୁ ସ୍ୱାଗତ କରିଥିଲେ।

ଏହି ସମୟରେ, ଉପରାଷ୍ଟ୍ରପତି ଜେଡି ଭାନ୍ସଙ୍କ ନେତୃତ୍ୱରେ ଆମେରିକାର ପ୍ରତିନିଧିମଣ୍ଡଳ ମଧ୍ୟ ଇସଲାମାବାଦରେ ପହଞ୍ଚିବାକୁ ଯାଉଛି। “ଇସଲାମାବାଦ ଡାଏଲଗ୍” ନାମରେ ପରିଚିତ ଏହି ଆଲୋଚନାର ଲକ୍ଷ୍ୟ ପଶ୍ଚିମ ଏସିଆରେ ଚାଲିଥିବା ସଂଘର୍ଷର ସ୍ଥାୟୀ ସମାଧାନ ଖୋଜିବା।

ପ୍ରାୟ ଛଅ ସପ୍ତାହର ସଂଘର୍ଷ ପରେ ଏହି ଆଲୋଚନା ହେଉଥିବାରୁ ଏହାକୁ ଐତିହାସିକ ଭାବେ ଦେଖାଯାଉଛି। ଇରାନୀ ପ୍ରତିନିଧି ଦଳରେ ବୈଦେଶିକ ମନ୍ତ୍ରୀ ଆବାସ ଆରାଘଚି, ପ୍ରତିରକ୍ଷା ପରିଷଦ ସଚିବ ଅଲି ଆକବର ଅହମଦିୟାନ ଏବଂ କେନ୍ଦ୍ରୀୟ ବ୍ୟାଙ୍କ ମୁଖ୍ୟ ଅବଦୋଲନାସେର ହେମମାତି ସମେତ ଅନେକ ଉଚ୍ଚପଦସ୍ଥ ଅଧିକାରୀ ସାମିଲ ଅଛନ୍ତି।

ଅନ୍ୟପଟେ, ଆମେରିକୀୟ ପ୍ରତିନିଧିମଣ୍ଡଳରେ ଷ୍ଟିଭ୍ ୱିଟକଫ ଏବଂ ଜାରେଡ୍ କୁଶନର ଭଳି ପ୍ରମୁଖ ନୀତି ନିର୍ଦ୍ଧାରକମାନେ ଅଛନ୍ତି। ୧୯୭୯ର ଇରାନ ବିପ୍ଳବ ପରେ ଏହା ଦୁଇ ଦେଶ ମଧ୍ୟରେ ସର୍ବୋଚ୍ଚ ସ୍ତରର ବୈଠକ ଭାବେ ଗଣାଯାଉଛି।

ଇରାନ ପୂର୍ବରୁ କିଛି ଶର୍ତ୍ତ ରଖିଛି, ଯେପରିକି ଲେବାନନରେ ଯୁଦ୍ଧବିରତି ଏବଂ ଜବତ ସମ୍ପତ୍ତିର ମୁକ୍ତି। ଏହି ସର୍ତ୍ତ ପୂରଣ ହେଲେ ମାତ୍ର ଆଲୋଚନା ଆଗକୁ ବଢ଼ିବ ବୋଲି ଗାଲିବାଫ କହିଛନ୍ତି।

ହ୍ୱାଇଟ୍ ହାଉସ୍ ମଧ୍ୟ ଆଲୋଚନାକୁ ନେଇ ସତର୍କ ଅଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, ଆଲୋଚନା ସକାରାତ୍ମକ ଦିଗକୁ ବଢ଼ୁଥିଲେ ମଧ୍ୟ ହର୍ମୁଜ୍ ପ୍ରଣାଳୀକୁ ପୁନଃ ଖୋଲିବା ସହଜ ହେବ ନାହିଁ। ଇସ୍ରାଏଲ-ଲେବାନନ ଉତ୍ତେଜନା ମଧ୍ୟ ଏହି ଆଲୋଚନାର ଏକ ମୁଖ୍ୟ ବିଷୟ ହେବ।