ଇବୋଲା ଭାଇରସ୍‌ ସଂକ୍ରମଣ ନେଇ ବଢ଼ୁଥିବା ଚିନ୍ତା ମଧ୍ୟରେ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ରବିବାର ଏକ ନୂତନ ସତର୍କତାମୂଳକ ପରାମର୍ଶ ଜାରି କରିଛି। ଡେମୋକ୍ରାଟିକ୍‌ ରିପବ୍ଲିକ୍‌ ଅଫ୍‌ କଙ୍ଗୋ (ଡିଆରସି), ଉଗାଣ୍ଡା ଓ ଦକ୍ଷିଣ ସୁଡାନ୍‌ ଭଳି ଇବୋଲା ପ୍ରଭାବିତ ଦେଶକୁ ଅନାବଶ୍ୟକ ଯାତ୍ରା ଏଡ଼ାଇବାକୁ ଭାରତୀୟ ନାଗରିକମାନଙ୍କୁ ପରାମର୍ଶ ଦିଆଯାଇଛି।

ସ୍ୱାସ୍ଥ୍ୟ ମନ୍ତ୍ରଣାଳୟ ଜାରି କରିଥିବା ବିବୃତ୍ତି ଅନୁସାରେ, ବିଶ୍ୱ ସ୍ୱାସ୍ଥ୍ୟ ସଂଗଠନ ମେ ୧୭, ୨୦୨୬ରେ ଆନ୍ତର୍ଜାତୀୟ ସ୍ୱାସ୍ଥ୍ୟ ବିଧି ୨୦୦୫ ଅନୁସାରେ ଡିଆରସି ଓ ଉଗାଣ୍ଡାରେ ଚାଲିଥିବା ଇବୋଲା ପ୍ରକୋପକୁ “ଆନ୍ତର୍ଜାତୀୟ ଚିନ୍ତାର ସାର୍ବଜନୀନ ସ୍ୱାସ୍ଥ୍ୟ ଜରୁରୀ ସ୍ଥିତି” ଭାବେ ଘୋଷଣା କରିଛି।

ଆଫ୍ରିକା ରୋଗ ନିୟନ୍ତ୍ରଣ କେନ୍ଦ୍ର ମଧ୍ୟ ଏହାକୁ ମହାଦେଶୀୟ ସୁରକ୍ଷା ସମ୍ବନ୍ଧୀୟ ଜରୁରୀ ସ୍ଥିତି ଭାବେ ଘୋଷଣା କରିଛି। ବିଶ୍ୱ ସ୍ୱାସ୍ଥ୍ୟ ସଂଗଠନର ତଥ୍ୟ ଅନୁଯାୟୀ, ମେ ୨୧ ସୁଦ୍ଧା ଡିଆରସିରେ ୭୪୬ଟି ସନ୍ଦେହଜନକ ଇବୋଲା ମାମଲା ଓ ୧୭୬ଟି ମୃତ୍ୟୁ ରେକର୍ଡ ହୋଇଛି।

ସେଥିମଧ୍ୟରୁ ୮୫ଟି ମାମଲା ପ୍ରମାଣିତ ହୋଇଥିବାବେଳେ ଉଗାଣ୍ଡାରେ ମଧ୍ୟ ଦୁଇଟି ମାମଲା ଚିହ୍ନଟ ହୋଇଛି। ଏହାସହ ୧୦ଟି ନିଶ୍ଚିତ ମୃତ୍ୟୁ ମଧ୍ୟ ହୋଇଥିବା ସୂଚନା ମିଳିଛି।

ବିଶେଷଜ୍ଞମାନଙ୍କ କହିବା ଅନୁଯାୟୀ, ବୁଣ୍ଡିବୁଗ୍ୟୋ ପ୍ରଜାତିର ଇବୋଲା ଭାଇରସ୍‌ ଦ୍ରୁତ ଭାବେ ଛଡ଼ାଯାଉଥିବାରୁ ପଡ଼ୋଶୀ ଦେଶମାନେ ମଧ୍ୟ ଉଚ୍ଚ ବିପଦ ଅଞ୍ଚଳରେ ପରିଣତ ହୋଇଛନ୍ତି।

ଏହାକୁ ଦୃଷ୍ଟିରେ ରଖି ବିମାନବନ୍ଦର ଓ ସୀମା ପ୍ରବେଶ ସ୍ଥଳରେ କଠୋର ନଜରଦାରି ବଢ଼ାଇବାକୁ ବିଶ୍ୱ ସ୍ୱାସ୍ଥ୍ୟ ସଂଗଠନ ସୁପାରିଶ କରିଛି। ପ୍ରଭାବିତ ଅଞ୍ଚଳରୁ ଆସୁଥିବା ଜ୍ୱରାକ୍ରାନ୍ତ ଯାତ୍ରୀଙ୍କ ଉପରେ ବିଶେଷ ନଜର ରଖିବାକୁ କୁହାଯାଇଛି।

ଭାରତ ସରକାର ସ୍ପଷ୍ଟ କରିଛନ୍ତି ଯେ, ଏପର୍ଯ୍ୟନ୍ତ ଦେଶରେ ବୁଣ୍ଡିବୁଗ୍ୟୋ ପ୍ରଜାତିର ଇବୋଲା ଭାଇରସ୍‌ ଆକ୍ରମଣର କୌଣସି ମାମଲା ଚିହ୍ନଟ ହୋଇନାହିଁ। ତଥାପି ପ୍ରଭାବିତ ଦେଶରେ ରହୁଥିବା କିମ୍ବା ସେଠାକୁ ଯାଉଥିବା ଭାରତୀୟମାନଙ୍କୁ ସ୍ଥାନୀୟ ସ୍ୱାସ୍ଥ୍ୟ ନିୟମ କଠୋର ଭାବେ ପାଳନ କରିବା ସହ ସତର୍କ ରହିବାକୁ ପରାମର୍ଶ ଦିଆଯାଇଛି।