ଭାରତରେ ଡେଙ୍ଗୁ ବିରୋଧୀ ଲଢ଼େଇକୁ ବଡ଼ ଶକ୍ତି ମିଳିଛି। କେନ୍ଦ୍ରୀୟ ଔଷଧ ମାନକ ନିୟନ୍ତ୍ରଣ ସଂଗଠନ (CDSCO) ଟାକେଡାର **QDENGA (TAK-003)**କୁ ଦେଶର ପ୍ରଥମ ଅନୁମୋଦିତ ଡେଙ୍ଗୁ ଟିକା ଭାବେ ମଞ୍ଜୁରି ଦେଇଛି। ସହରୀକରଣ, ଜଳବାୟୁ ପରିବର୍ତ୍ତନ, ମଶାଙ୍କ ବାସସ୍ଥାନର ପରିବର୍ତ୍ତନ ଓ ବୃଦ୍ଧିଶୀଳ ଜନସଂଖ୍ୟା କାରଣରୁ ଡେଙ୍ଗୁ ସଂକ୍ରମଣ ବଢ଼ୁଥିବା ବେଳେ ଏହି ଅନୁମୋଦନକୁ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି କୁହାଯାଉଛି।

ଚାରି ପ୍ରକାର ଡେଙ୍ଗୁ ଭାଇରସ ବିରୋଧରେ ସୁରକ୍ଷା

QDENGA ଏକ Live-Attenuated Tetravalent Vaccine। ଏହା ଡେଙ୍ଗୁ ଭାଇରସର DENV-1, DENV-2, DENV-3 ଏବଂ DENV-4 ଚାରିଟି ସେରୋଟାଇପ୍‌ ବିରୋଧରେ ସୁରକ୍ଷା ପ୍ରଦାନ କରେ। ଏହି ଟିକା ନେବା ପୂର୍ବରୁ କୌଣସି ବ୍ୟକ୍ତିଙ୍କୁ ପୂର୍ବରୁ ଡେଙ୍ଗୁ ହୋଇଥିଲା କି ନାହିଁ, ତାହା ଜାଣିବା ପାଇଁ ରକ୍ତ ପରୀକ୍ଷାର ଆବଶ୍ୟକତା ନାହିଁ।

କେତେ ଡୋଜ୍ ନେବାକୁ ପଡ଼ିବ?

ଏହି ଟିକା ଦୁଇଟି ଡୋଜ୍‌ରେ ଦିଆଯିବ। ପ୍ରଥମ ଓ ଦ୍ୱିତୀୟ ଡୋଜ୍‌ ମଧ୍ୟରେ ୩ ମାସର ବ୍ୟବଧାନ ରହିବ। ଏହାକୁ ସବ୍‌କ୍ୟୁଟାନିଅସ୍‌ (Subcutaneous) ଇଞ୍ଜେକ୍ସନ୍‌ ମାଧ୍ୟମରେ ଦିଆଯିବ।

କେତେ ପ୍ରଭାବଶାଳୀ?

ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଡେଙ୍ଗୁ ଅଧିକ ପ୍ରଭାବିତ ଦେଶଗୁଡ଼ିକରେ ଏହି ଟିକା ବ୍ୟବହାରକୁ ସମର୍ଥନ କରିଛି।

Phase-III TIDES Trialରେ ୮ଟି ଡେଙ୍ଗୁ ପ୍ରଭାବିତ ଦେଶର ୨୦,୦୦୦ରୁ ଅଧିକ ଶିଶୁ ଓ କିଶୋରଙ୍କ ଉପରେ ହୋଇଥିବା ପରୀକ୍ଷାରେ ଦେଖାଯାଇଛି ଯେ—

• ଡେଙ୍ଗୁ ଯୋଗୁଁ ହସ୍ପିଟାଲରେ ଭର୍ତ୍ତି ହେବାର ଆଶଙ୍କା ୮୪% ପର୍ଯ୍ୟନ୍ତ କମିଛି।
• ଲ୍ୟାବ୍‌ରେ ପ୍ରମାଣିତ ଡେଙ୍ଗୁ ସଂକ୍ରମଣ ବିରୋଧରେ ପ୍ରାୟ ୬୧% ସୁରକ୍ଷା ମିଳିଛି।

ଭାରତରେ ମୂଲ୍ୟ କେତେ ହେବ?

ଭାରତରେ ଏହି ଟିକାର ଦାମ ଏପର୍ଯ୍ୟନ୍ତ ଘୋଷଣା ହୋଇନାହିଁ। ତେବେ ଟାକେଡା ହାଇଦ୍ରାବାଦସ୍ଥିତ Biological E ସହ ମିଳିତ ଭାବେ ପ୍ରତିବର୍ଷ ୫ କୋଟି ଡୋଜ୍ ଉତ୍ପାଦନ କରିବାକୁ ଯୋଜନା କରିଛି। ଏହା ଯୋଗାଣ ବଢ଼ାଇବା ସହ ଭବିଷ୍ୟତରେ ଟିକାର ମୂଲ୍ୟ କମାଇବାରେ ସହାୟକ ହୋଇପାରେ।