ଡେଙ୍ଗୁ ବିରୋଧୀ ଲଢ଼େଇରେ ଭାରତକୁ ମିଳିଛି ଏକ ବଡ଼ ସଫଳତା। ପ୍ରଥମ ଥର ପାଇଁ ଦେଶରେ ଡେଙ୍ଗୁ ପ୍ରତିରୋଧ ପାଇଁ ଏକ ଟିକାକୁ ଅନୁମୋଦନ ମିଳିଛି। ଡ୍ରଗ୍ କଣ୍ଟ୍ରୋଲର ଜେନେରାଲ ଅଫ୍ ଇଣ୍ଡିଆ (DCGI) ଜାପାନର ଔଷଧ ନିର୍ମାତା କମ୍ପାନୀ ଟାକେଡା ବାୟୋଫାର୍ମାସ୍ୟୁଟିକାଲ୍ସର 'କ୍ୟୁଡେଙ୍ଗା' (Qdenga) ଟିକାକୁ ଅନୁମୋଦନ କରିଛି। ୪ରୁ ୬୦ ବର୍ଷ ବୟସର ଲୋକମାନେ ଏହି ଟିକା ନେଇପାରିବେ।

ପ୍ରତିବର୍ଷ ବର୍ଷା ଋତୁ ଆସିଲେ ଦେଶରେ ଡେଙ୍ଗୁ ସଂକ୍ରମଣ ମାମଲା ବଢ଼ିବା ସହ ହଜାର ହଜାର ଲୋକ ଏଥିରେ ଆକ୍ରାନ୍ତ ହେଉଛନ୍ତି। ଅନେକ କ୍ଷେତ୍ରରେ ରୋଗୀଙ୍କ ଅବସ୍ଥା ଗୁରୁତର ହେବା ସହ ମୃତ୍ୟୁ ମଧ୍ୟ ଘଟୁଛି। ଏଭଳି ପରିସ୍ଥିତିରେ ଏହି ଟିକାର ଅନୁମୋଦନକୁ ସ୍ୱାସ୍ଥ୍ୟ କ୍ଷେତ୍ରରେ ଏକ ଐତିହାସିକ ପଦକ୍ଷେପ ବୋଲି କୁହାଯାଉଛି।

'କ୍ୟୁଡେଙ୍ଗା' ହେଉଛି ଏକ ଟେଟ୍ରାଭାଲେଣ୍ଟ ଲାଇଭ୍-ଆଟେନୁଏଟେଡ୍ ଭ୍ୟାକ୍ସିନ୍, ଯାହା ଡେଙ୍ଗୁ ଭାଇରସର ଚାରୋଟି ପ୍ରମୁଖ ପ୍ରଜାତି—DENV-1, DENV-2, DENV-3 ଓ DENV-4 ବିରୋଧରେ ସୁରକ୍ଷା ଦେଇଥାଏ। ଏହି ଟିକା ନେବା ପୂର୍ବରୁ ବ୍ୟକ୍ତିଙ୍କୁ ପୂର୍ବରୁ ଡେଙ୍ଗୁ ହୋଇଥିଲା କି ନାହିଁ, ତାହାର ପରୀକ୍ଷା କରିବାର ଆବଶ୍ୟକତା ନାହିଁ।

ଡାକ୍ତରଙ୍କ ପରାମର୍ଶ ଅନୁଯାୟୀ, ଏହି ଟିକା ଦୁଇଟି ଡୋଜ୍ରେ ଦିଆଯିବ। ପ୍ରଥମ ଡୋଜ୍ ନେବାର ତିନି ମାସ ପରେ ଦ୍ୱିତୀୟ ଡୋଜ୍ ନେବାକୁ ପଡ଼ିବ। ପ୍ରତ୍ୟେକ ଡୋଜ୍ ୦.୫ ମିଲିଲିଟର ହୋଇଥାଏ ଏବଂ ଚର୍ମ ତଳେ ଇଞ୍ଜେକ୍ସନ୍ ମାଧ୍ୟମରେ ଦିଆଯାଇଥାଏ।

କ୍ଲିନିକାଲ୍ ପରୀକ୍ଷାରେ ଏହି ଟିକା ଡେଙ୍ଗୁ ସଂକ୍ରମଣ ବିରୋଧରେ ପ୍ରାୟ ୮୦ ପ୍ରତିଶତ ପର୍ଯ୍ୟନ୍ତ ପ୍ରଭାବଶାଳୀ ବୋଲି ଜଣାପଡ଼ିଛି। ସେହିପରି ଡେଙ୍ଗୁ ଯୋଗୁଁ ହସ୍ପିଟାଲରେ ଭର୍ତ୍ତି ହେବାର ଆଶଙ୍କାକୁ ପ୍ରାୟ ୯୦ ପ୍ରତିଶତ ପର୍ଯ୍ୟନ୍ତ କମାଇବାରେ ଏହା ସହାୟକ ବୋଲି କମ୍ପାନୀ ଦାବି କରିଛି।

ବିଶେଷଜ୍ଞମାନଙ୍କ ମତରେ, ଭାରତରେ ଗତ ଦୁଇ ଦଶନ୍ଧି ମଧ୍ୟରେ ଡେଙ୍ଗୁ ମାମଲା ପ୍ରାୟ ୧୧ ଗୁଣ ବୃଦ୍ଧି ପାଇଛି। ବିଶ୍ୱର ମୋଟ ଡେଙ୍ଗୁ ରୋଗୀଙ୍କ ମଧ୍ୟରୁ ପ୍ରାୟ ଏକ-ତୃତୀୟାଂଶ ଭାରତରେ ରହିଥିବା ଆକଳନ କରାଯାଉଛି। ତେଣୁ ଏହି ଟିକା ଡେଙ୍ଗୁ ନିୟନ୍ତ୍ରଣରେ ଏକ ପ୍ରଭାବଶାଳୀ ଭୂମିକା ନେବ ବୋଲି ଆଶା କରାଯାଉଛି।

ତେବେ ବିଶେଷଜ୍ଞମାନେ ସତର୍କ କରି କହିଛନ୍ତି ଯେ, ଟିକା ନେବା ପରେ ମଧ୍ୟ ଡେଙ୍ଗୁ ପ୍ରତିରୋଧ ପାଇଁ ସାବଧାନତା ଅବଲମ୍ବନ କରିବା ଆବଶ୍ୟକ। ଘର ଆଖପାଖରେ ପାଣି ଜମିବାକୁ ନ ଦେବା, ମଶାଦାନୀ ବ୍ୟବହାର କରିବା, ସମ୍ପୂର୍ଣ୍ଣ ଶରୀର ଢାଙ୍କିବା ଭଳି ପୋଷାକ ପିନ୍ଧିବା ଏବଂ ଜ୍ୱର, ମୁଣ୍ଡବିନ୍ଧା, ଶରୀରବିନ୍ଧା କିମ୍ବା ଚର୍ମରେ ରାସ୍ ଭଳି ଲକ୍ଷଣ ଦେଖାଦେଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ଉଚିତ୍। ଟିକା ସହ ସଚେତନତା ଓ ମଶା ନିୟନ୍ତ୍ରଣ ବ୍ୟବସ୍ଥା ହିଁ ଡେଙ୍ଗୁ ବିରୋଧରେ ସବୁଠାରୁ ପ୍ରଭାବଶାଳୀ ଅସ୍ତ୍ର।