INDIA ବ୍ଲକ୍ର ରାଜନୈତିକ ଏକତାକୁ ନେଇ ପୁଣିଥରେ ପ୍ରଶ୍ନ ଉଠିଛି। ବିରୋଧୀ ମେଣ୍ଟର ଏକ ଅଂଶ JD(U) ନେତୃତ୍ୱ, ସାଧାରଣ ପ୍ରସଙ୍ଗ ଏବଂ ଆଗାମୀ ନିର୍ବାଚନ ପାଇଁ ମିଳିତ ରଣନୀତି ନେଇ ସହମତିର ଅଭାବକୁ ନେଇ ପ୍ରଶ୍ନ କରିଛି। ଗୁରୁବାର ସନ୍ଧ୍ୟାରେ INDIA ବ୍ଲକ୍ର ନେତାମାନଙ୍କ ଏକ virtual meeting ହେବାକୁ ଥିବା ବେଳେ ଏହା ପୂର୍ବରୁ JD(U)ର ଏହି ମତ ରାଜନୈତିକ ଚର୍ଚ୍ଚାକୁ ତୀବ୍ର କରିଛି।

JD(U)ର ଜାତୀୟ ମୁଖପାତ୍ର ରାଜୀବ ରଞ୍ଜନ ପ୍ରସାଦ କହିଛନ୍ତି ଯେ ଜାତୀୟ ସ୍ତରରେ ବିରୋଧୀ ଦଳଗୁଡ଼ିକ ଏକାଠି ହେଉଥିଲେ ମଧ୍ୟ ବିଭିନ୍ନ ରାଜ୍ୟରେ ସେମାନେ ପରସ୍ପରର ପ୍ରତିଦ୍ୱନ୍ଦ୍ୱୀ ଭାବେ ନିର୍ବାଚନ ଲଢ଼ୁଛନ୍ତି। ତେଣୁ ଏପରି ମେଣ୍ଟର ବାସ୍ତବିକ ରାଜନୈତିକ ଉଦ୍ଦେଶ୍ୟ କ’ଣ, ତାହା ସ୍ପଷ୍ଟ ହେବା ଆବଶ୍ୟକ ବୋଲି ସେ ମତ ଦେଇଛନ୍ତି।

JD(U) ବିଶେଷ ଭାବେପଞ୍ଜାବ ଓ ପଶ୍ଚିମବଙ୍ଗର ଉଦାହରଣ ଦେଇଛି। ପଞ୍ଜାବରେ ଆମ୍ ଆଦମୀ ପାର୍ଟି (AAP) ଓ କଂଗ୍ରେସ ପରସ୍ପର ବିରୋଧରେ ଲଢ଼ୁଥିବା ବେଳେ ପଶ୍ଚିମବଙ୍ଗରେ ତୃଣମୂଳ କଂଗ୍ରେସ, କଂଗ୍ରେସ ଓ ବାମଦଳଗୁଡ଼ିକ ମଧ୍ୟରେ ରାଜନୈତିକ ପ୍ରତିଦ୍ୱନ୍ଦ୍ୱିତା ରହିଛି।

JD(U)ର ଯୁକ୍ତି ହେଉଛି—ଯଦି ମେଣ୍ଟର ଦଳଗୁଡ଼ିକ ମଧ୍ୟରେ ନେତୃତ୍ୱ, ସାଧାରଣ ପ୍ରସଙ୍ଗ ଏବଂ ନିର୍ବାଚନ ଲଢ଼ିବାର ଏକୀକୃତ ଯୋଜନା ନାହିଁ, ତେବେ ଏପରି ମେଣ୍ଟର ଆବଶ୍ୟକତା କେତେ ରହିଛି ସେନେଇ ସ୍ପଷ୍ଟତା ଦରକାର।

ଅନ୍ୟପଟେ, INDIA ବ୍ଲକ୍ର ଆଗାମୀ virtual meetingରେ କଥିତ‘ଭୋଟ୍ ଚୋରି’ପ୍ରସଙ୍ଗରେ ଆନ୍ଦୋଳନର ପରବର୍ତ୍ତୀ ରଣନୀତି, ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବି ଏବଂ ନଭେମ୍ବର ୧ରେ ଦିଲ୍ଲୀରେ ହେବାକୁ ଥିବା ବିରୋଧୀ ମେଣ୍ଟର ରାଲି ପ୍ରସ୍ତୁତି ଉପରେ ଆଲୋଚନା ହେବାର ସୂଚନା ରହିଛି। କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ବୈଠକରେ ଅଧ୍ୟକ୍ଷତା କରିବେ।

ଏହି ପରିପ୍ରେକ୍ଷୀରେ JD(U)ର ମନ୍ତବ୍ୟ INDIA ବ୍ଲକ୍ର ଭିତରେ ଥିବା ଆଞ୍ଚଳିକ ଦଳଗୁଡ଼ିକର ଭିନ୍ନ ରାଜନୈତିକ ସ୍ୱାର୍ଥ ଓ ରଣନୀତିକୁ ପୁଣିଥରେ ସାମ୍ନାକୁ ଆଣିଛି।