ଭାରତୀୟ ରିଜର୍ଭ ବ୍ୟାଙ୍କ (RBI) ଫିକ୍ସଡ୍ ଡିପୋଜିଟ୍‌ ଓ ବଡ଼ ରାଶିର ଜମା ଉପରେ ସୁଧ ହାର ସମ୍ପର୍କିତ ନିୟମରେ ପରିବର୍ତ୍ତନ କରିଛି। RBI (Commercial Banks – Interest Rate on Deposits) Second Amendment Directions, 2026 ଅନୁସାରେ ଏହି ପରିବର୍ତ୍ତନ ୧ ଅକ୍ଟୋବର ୨୦୨୬ରୁ ଲାଗୁ ହେବ।

୩ କୋଟିରୁ ଅଧିକ FDକୁ ନେଇ ବଡ଼ ପରିବର୍ତ୍ତନ

ସାଧାରଣ ବ୍ୟାଙ୍କ ପାଇଁ ୩ କୋଟି ଟଙ୍କା କିମ୍ବା ତା’ଠାରୁ ଅଧିକର ଏକକ ଜମାକୁ ବଲ୍କ ଡିପୋଜିଟ୍ ଭାବେ ଗଣାଯାଏ। ନୂଆ ନିୟମ ଅନୁସାରେ, ବ୍ୟାଙ୍କଗୁଡ଼ିକ LCR ବା Liquidity Coverage Ratio ଅଧୀନରେ ଜମାର ଭିନ୍ନ run-off rateକୁ ବିଚାର କରି ବଲ୍କ ଡିପୋଜିଟ୍‌ ପାଇଁ ଭିନ୍ନ ସୁଧ ହାର ଦେଇପାରିବେ।

ପ୍ରତିଦିନ ସୁଧ ହାର ପ୍ରକାଶ କରିବେ ବ୍ୟାଙ୍କ

ନୂଆ ନିୟମରେ ବଲ୍କ ଡିପୋଜିଟ୍‌ର ସୁଧ ହାରକୁ ବ୍ୟାଙ୍କର ୱେବସାଇଟ୍‌ରେ ପ୍ରକାଶ କରିବା ଅନିବାର୍ଯ୍ୟ ହୋଇଛି। ପ୍ରତ୍ୟେକ କାର୍ଯ୍ୟଦିବସରେ ସକାଳ ୧୦ଟାରେ ହାର ପ୍ରକାଶ କରିବାକୁ ହେବ, ଏବଂ ୧୦ ମିନିଟ୍‌ର ଗ୍ରେସ୍ ପିରିୟଡ୍‌ ସହ ସର୍ବାଧିକ ୧୦ଟା ୧୦ ମିନିଟ୍‌ ସୁଦ୍ଧା ଏହା ୱେବସାଇଟ୍‌ରେ ଦେବାକୁ ପଡ଼ିବ।

ସମାନ ଜମା ପାଇଁ ସମାନ ସୁଧ ହାର

ଏକେ ଦିନରେ ସମାନ ରାଶିର ଜମା ଗ୍ରହଣ କରାଗଲେ, ବ୍ୟାଙ୍କର ବିଭିନ୍ନ ଶାଖା କିମ୍ବା ଗ୍ରାହକଙ୍କ ପାଇଁ ଅଲଗା ସୁଧ ହାର ଲାଗୁ କରାଯାଇପାରିବ ନାହିଁ। RBI ଅନୁସାରେ, ସମାନ ରାଶି ଓ ସମାନ ତାରିଖରେ ଗ୍ରହଣ କରାଯାଇଥିବା ଜମା ପାଇଁ ସମାନ ସୁଧ ହାର ଲାଗୁ ହେବ।

ସାଧାରଣ FD ନିବେଶକଙ୍କୁ କେତେ ପ୍ରଭାବ?

ଏହି ନିୟମର ମୁଖ୍ୟ ପରିବର୍ତ୍ତନ ବଲ୍କ ଡିପୋଜିଟ୍‌କୁ ନେଇ। ୩ କୋଟି ଟଙ୍କାରୁ କମ୍‌ର ରିଟେଲ୍ FD ପାଇଁ ଏହି ନୂଆ ବଲ୍କ-ଡିପୋଜିଟ୍ ନିୟମର ସିଧାସଳଖ ପ୍ରଭାବ ସୀମିତ ରହିବ। ଏହା ସହିତ, ୧ ଅକ୍ଟୋବରରୁ ସମସ୍ତ ରିଟେଲ୍ FD ସୁଧ ହାର ବଢ଼ିବ କିମ୍ବା କମିବ ବୋଲି RBI କୌଣସି ନିର୍ଦ୍ଦେଶ ଦେଇନାହିଁ। ବ୍ୟାଙ୍କ ନିଜ ଜମା ହାର ନିର୍ଦ୍ଧାରଣ କରିବ।