ମହାରାଷ୍ଟ୍ରର ଚନ୍ଦ୍ରପୁର ଜିଲ୍ଲାରୁ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ମଦ ନିଶାରେ ବାଇକ୍ ଚଳାଉଥିବା ଜଣେ ବ୍ୟକ୍ତି ଏବଂ ତାଙ୍କ ପତ୍ନୀଙ୍କ ଅସାବଧାନତା ଯୋଗୁଁ ସେମାନଙ୍କ ୪ ମାସର ଶିଶୁ ପୁଅ ରାସ୍ତାରେ ଖସିପଡ଼ିଥିଲା। ଚିନ୍ତାଜନକ କଥା ହେଲା, ପ୍ରାୟ ୪୦୦ ମିଟର ଦୂର ଯାଏଁ ଯାଇଥିଲେ ମଧ୍ୟ ଦମ୍ପତି ଶିଶୁ ଖସିପଡ଼ିଥିବା କଥା ଜାଣିପାରିନଥିଲେ।

ପୁଲିସ ସୂଚନା ଅନୁଯାୟୀ, ଫୁଲଚନ୍ଦ ରାଉତ ଓ ତାଙ୍କ ପତ୍ନୀ ମୀରା ରାଉତ ନିଜର ୪ ମାସର ପୁଅ ଏବଂ ଅଢ଼େଇ ବର୍ଷର ଝିଅଙ୍କୁ ନେଇ ବାଇକ୍‌ରେ ଜଣେ ସମ୍ପର୍କୀୟଙ୍କ ଘରକୁ ଯାଉଥିଲେ। ରାସ୍ତାରେ ଯାଉଥିବାବେଳେ ଶିଶୁଟି ମା’ଙ୍କ କୋଳରୁ ଖସିପଡ଼ିଥିଲା। ମଦ୍ୟପ ଅବସ୍ଥାରେ ଥିବାରୁ ଦମ୍ପତି ଏହା ଜାଣିପାରିନଥିଲେ ଏବଂ ବାଇକ୍‌ ଚଳାଇ ଆଗକୁ ବଢ଼ିଯାଇଥିଲେ।

ଘଟଣାକୁ ଦେଖି ସ୍ଥାନୀୟ ଲୋକେ ତୁରନ୍ତ ପୁଲିସକୁ ସୂଚନା ଦେଇଥିଲେ। ପୁଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଶିଶୁଟିକୁ ଉଦ୍ଧାର କରି ନିକଟସ୍ଥ ହସ୍ପିଟାଲରେ ଭର୍ତ୍ତି କରିଥିଲା। ଡାକ୍ତରଙ୍କ ପ୍ରାଥମିକ ଚିକିତ୍ସା ପରେ ଶିଶୁଟି ବିପଦମୁକ୍ତ ଥିବା ସୂଚନା ମିଳିଛି।

ପରେ ପୁଲିସ ଦମ୍ପତିଙ୍କୁ ଚିହ୍ନଟ କରି ସେମାନଙ୍କୁ ମଧ୍ୟ ହସ୍ପିଟାଲକୁ ନେଇଥିଲା। ଯାଞ୍ଚରେ ଜଣାପଡ଼ିଥିଲା ଯେ ଶିଶୁଟି ସେହି ଦମ୍ପତିଙ୍କର ପୁଅ। ପୁଲିସ କହିଛି ଯେ ଦମ୍ପତିଙ୍କର ମୋଟ ୮ ଜଣ ସନ୍ତାନ ଅଛନ୍ତି।

ଏହି ଘଟଣା ପରେ ଦମ୍ପତିଙ୍କ ବିରୋଧରେ ମଦ୍ୟପ ଅବସ୍ଥାରେ ଗାଡ଼ି ଚଳାଇବା (Drunk Driving) ମାମଲା ରୁଜୁ କରାଯାଇଛି। ପୁଲିସ ସମଗ୍ର ଘଟଣାର ତଦନ୍ତ ଜାରି ରଖିଛି।

ଏହି ଘଟଣା ପୁଣିଥରେ ସାବ୍ୟସ୍ତ କରିଛି ଯେ ମଦ୍ୟପ ଅବସ୍ଥାରେ ଗାଡ଼ି ଚଳାଇବା କେବଳ ଆଇନ ଉଲ୍ଲଂଘନ ନୁହେଁ, ବରଂ ନିଜ ଓ ପରିବାରର ଜୀବନକୁ ମଧ୍ୟ ଗୁରୁତର ବିପଦରେ ପକାଇପାରେ।