କୋଟିଆ ପ୍ରସଙ୍ଗରେ ଧର୍ମେନ୍ଦ୍ରଙ୍କ ଆହ୍ୱାନ

ସୋସିଆଲ ମିଡିଆରେ ନିଜ ମତ ରଖି ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, କୋଟିଆକୁ ନେଇ ଚାଲିଥିବା ଦୀର୍ଘସ୍ଥାୟୀ ବିବାଦ ଏକ ଚିନ୍ତାର ବିଷୟ। ଆନ୍ଧ୍ରପ୍ରଦେଶ ପକ୍ଷରୁ ଏହି ଅଞ୍ଚଳରେ ହେଉଥିବା ପ୍ରଶାସନିକ ହସ୍ତକ୍ଷେପ ଓ ଦାବି ମଧ୍ୟରେ ଓଡ଼ିଶାର ସ୍ୱାର୍ଥ ରକ୍ଷା ପାଇଁ ଏକଜୁଟ ଉଦ୍ୟମ ଦରକାର ବୋଲି ସେ କହିଛନ୍ତି।

ତାଙ୍କ ମତରେ, ଉଭୟ ରାଜ୍ୟର ନେତୃତ୍ୱ ମଧ୍ୟରେ ସୌହାର୍ଦ୍ଦପୂର୍ଣ୍ଣ ଆଲୋଚନା ଓ ସଂଳାପ ମାଧ୍ୟମରେ ସମାଧାନର ରାସ୍ତା ଖୋଜିବା ଆବଶ୍ୟକ। ରାଜନୈତିକ ଦଳଗୁଡ଼ିକ ନିଜ ନିଜ ମତଭେଦ ଛାଡ଼ି ରାଜ୍ୟର ବୃହତ୍ତର ସ୍ୱାର୍ଥକୁ ପ୍ରାଥମିକତା ଦେଲେ ଏକ ସ୍ଥାୟୀ ସମାଧାନ ପାଇଁ ଅନୁକୂଳ ପରିବେଶ ତିଆରି ହୋଇପାରିବ ବୋଲି ସେ ମତ ଦେଇଛନ୍ତି।

ତିନିଥର କୋଟିଆ ଗସ୍ତ କରିଥିବା କହିଲେ ଧର୍ମେନ୍ଦ୍ର

କୋଟିଆ ପ୍ରସଙ୍ଗରେ ନିଜର ପୂର୍ବ ଉଦ୍ୟମ ସମ୍ପର୍କରେ ମଧ୍ୟ ଧର୍ମେନ୍ଦ୍ର ପ୍ରଧାନ ଉଲ୍ଲେଖ କରିଛନ୍ତି। ସେ କହିଛନ୍ତି ଯେ, ସେ ୨୦୧୮ ଏପ୍ରିଲ, ୨୦୧୯ ଫେବ୍ରୁଆରୀ ଓ ୨୦୨୩ ଏପ୍ରିଲରେ କୋଟିଆ ଅଞ୍ଚଳ ଗସ୍ତ କରି ସ୍ଥିତି ସମ୍ପର୍କରେ ଅବଗତ ହୋଇଥିଲେ।

ଏହା ସହିତ, ସେ ତତ୍କାଳୀନ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ୨୦୨୦ ନଭେମ୍ବର ୧୮ ଓ ୨୦୨୨ ଅକ୍ଟୋବର ୩୧ରେ ଚିଠି ଲେଖିଥିବା କହିଛନ୍ତି। ଆନ୍ଧ୍ରପ୍ରଦେଶର ତତ୍କାଳୀନ ମୁଖ୍ୟମନ୍ତ୍ରୀ ୱାଇ.ଏସ୍. ଜଗନମୋହନ ରେଡ୍ଡୀଙ୍କୁ ମଧ୍ୟ ୨୦୨୧ ସେପ୍ଟେମ୍ବର ୨୨ରେ ଚିଠି ଲେଖି କୋଟିଆ ବିବାଦର ସମାଧାନ ପାଇଁ ପଦକ୍ଷେପ ନେବାକୁ ଅନୁରୋଧ କରିଥିବା ସେ କହିଛନ୍ତି।

ପୁଣି କାହିଁକି ଚର୍ଚ୍ଚାରେ କୋଟିଆ?

କୋଟିଆକୁ ନେଇ ବିବାଦ ଏବେ ପୁଣି ତୀବ୍ର ହେବାର ମୁଖ୍ୟ କାରଣ ହେଉଛି ଆନ୍ଧ୍ରପ୍ରଦେଶ ପକ୍ଷରୁ କୋଟିଆ ଗ୍ରାମପଞ୍ଚାୟତ ଅଧୀନରେ ଥିବା ତିନିଟି ବିବାଦୀୟ ଗାଁ—ଫଗୁନାସିନେରୀ, ଗଞ୍ଜେଇପଦର ଓ ଫାଟୁସିନେରୀ—କୁ ନେଇ ପଞ୍ଚାୟତ ନିର୍ବାଚନ ସମ୍ପର୍କିତ ପଦକ୍ଷେପ। ଏହା ପରେ ଓଡ଼ିଶାରେ ରାଜନୈତିକ ତର୍କ ମଧ୍ୟ ତୀବ୍ର ହୋଇଛି।

କୋଟିଆ ଗ୍ରାମପଞ୍ଚାୟତରେ ୨୮ଟି ଗାଁ ଥିବା ବେଳେ ଏଥିରୁ ୨୧ଟି ଗାଁ ଉପରେ ଉଭୟ ଓଡ଼ିଶା ଓ ଆନ୍ଧ୍ରପ୍ରଦେଶ ଦାବି କରୁଛନ୍ତି। ଏହି ଅଞ୍ଚଳକୁ ନେଇ ଦଶନ୍ଧି ଧରି ବିବାଦ ରହିଛି ଏବଂ ମାମଲା ସୁପ୍ରିମକୋର୍ଟରେ ବିଚାରାଧୀନ ଅଛି।

ଓଡ଼ିଆ ଅସ୍ମିତାର ସୁରକ୍ଷା ଉପରେ ଜୋର

ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ଓଡ଼ିଶାର ଭୌଗୋଳିକ ସୀମା ଓ ଓଡ଼ିଆ ଅସ୍ମିତାର ସୁରକ୍ଷା ପାଇଁ ଅତୀତରେ ଅନେକ ମହାନ ବ୍ୟକ୍ତି ଅବଦାନ ରଖିଛନ୍ତି। ଉତ୍କଳ ଗୌରବ ମଧୁସୂଦନ ଦାସ, ଉତ୍କଳମଣି ଗୋପବନ୍ଧୁ ଦାସ, ବ୍ୟାସକବି ଫକୀରମୋହନ ସେନାପତି, ସ୍ୱଭାବକବି ଗଙ୍ଗାଧର ମେହେର ଓ ପାରଳା ମହାରାଜା କୃଷ୍ଣଚନ୍ଦ୍ର ଗଜପତିଙ୍କ ଅବଦାନକୁ ସେ ସ୍ମରଣ କରିଛନ୍ତି।

ତାଙ୍କ ମତରେ, ଓଡ଼ିଆ ପରିଚୟ ଓ ରାଜ୍ୟର ଏକତାକୁ ସୁରକ୍ଷିତ ରଖିବାର ଲଢ଼େଇ ଜାରି ରହିବ। କୋଟିଆ ପ୍ରସଙ୍ଗରେ ସମସ୍ତ ରାଜନୈତିକ ଦଳ, ନେତା ଓ ରାଜ୍ୟବାସୀଙ୍କ ମିଳିତ ଉଦ୍ୟମ ହିଁ ଏକ ଦୀର୍ଘସ୍ଥାୟୀ ଓ ସୌହାର୍ଦ୍ଦପୂର୍ଣ୍ଣ ସମାଧାନର ରାସ୍ତା ଖୋଲିପାରିବ ବୋଲି ସେ ଆହ୍ୱାନ ଦେଇଛନ୍ତି।