ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ବିମାନ ଯାତ୍ରା ସୁରକ୍ଷାକୁ ନେଇ ବଡ଼ ତ୍ରୁଟି ସାମ୍ନାକୁ ଆସିଛି। ବାଧ୍ୟତାମୂଳକ ଇମିଗ୍ରେସନ୍ ଯାଞ୍ଚ ନକରି ୩ ଜଣ ଇଟାଲୀୟ ନାଗରିକ ଭାରତ ଛାଡ଼ି ମ୍ୟୁନିକ ଚାଲିଯାଇଥିବା ଜଣାପଡ଼ିଛି।

ସୂଚନା ଅନୁସାରେ, ସେପ୍ଟେମ୍ବର ୪ ତାରିଖରେ ଏହି ୩ ଯାତ୍ରୀ ଅମୃତସରରୁ ଏୟାର ଇଣ୍ଡିଆର ଏକ ଘରୋଇ ବିମାନରେ ଦିଲ୍ଲୀ ଆସିଥିଲେ। ଦିଲ୍ଲୀରୁ ସେମାନଙ୍କୁ ଲୁଫଥାନସା ବିମାନ ଯୋଗେ ମ୍ୟୁନିକ ଯିବାର ଥିଲା।

ନିୟମ ଅନୁସାରେ, ଘରୋଇ ବିମାନରେ ଦିଲ୍ଲୀ ପହଞ୍ଚିବା ପରେ ଅନ୍ତର୍ଜାତୀୟ ବିମାନ ଧରିବା ପୂର୍ବରୁ ଯାତ୍ରୀଙ୍କୁ ଇମିଗ୍ରେସନ୍ ଯାଞ୍ଚ ସମ୍ପୂର୍ଣ୍ଣ କରିବାକୁ ପଡ଼େ। ହେଲେ ଏହି ୩ ଯାତ୍ରୀଙ୍କ କ୍ଷେତ୍ରରେ ଏହି ପ୍ରକ୍ରିୟା ହୋଇନଥିବା ଜଣାପଡ଼ିଛି।

ରିପୋର୍ଟ ଅନୁସାରେ, ଯାତ୍ରୀମାନଙ୍କୁ ଭୁଲବଶତଃ ଇଣ୍ଟରନ୍ୟାସନାଲ୍-ଟୁ-ଇଣ୍ଟରନ୍ୟାସନାଲ୍ ଟ୍ରାନ୍ସଫର ଅଞ୍ଚଳକୁ ପଠାଇ ଦିଆଯାଇଥିଲା। ଫଳରେ ସେମାନେ ଇମିଗ୍ରେସନ୍ ପ୍ରକ୍ରିୟା ନକରି ଲୁଫଥାନସା ବିମାନରେ ମ୍ୟୁନିକ ଚାଲିଯାଇଥିଲେ। ପରବର୍ତ୍ତୀ ସମୟରେ ତଥ୍ୟ ଯାଞ୍ଚ ବେଳେ ଘଟଣାଟି ସାମ୍ନାକୁ ଆସିଥିଲା।

ଘଟଣାକୁ ଗୁରୁତର ଭାବେ ନେଇ କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ଏକ ଉଚ୍ଚସ୍ତରୀୟ ବୈଠକ ଡକାଯାଇଛି। ବୈଠକରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ, ଇଣ୍ଟେଲିଜେନ୍ସ ବ୍ୟୁରୋ, ବ୍ୟୁରୋ ଅଫ୍ ଇମିଗ୍ରେସନ୍, ଏୟାର ଇଣ୍ଡିଆ ଏବଂ ଦିଲ୍ଲୀ ବିମାନବନ୍ଦର ଅପରେଟରର ବରିଷ୍ଠ ଅଧିକାରୀମାନେ ସାମିଲ ହୋଇଥିଲେ।

ଏହି ଘଟଣାକୁ ଗୁରୁତର ସୁରକ୍ଷା ଉଲ୍ଲଂଘନ ଭାବେ ନେଇ ଏୟାର ଇଣ୍ଡିଆକୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ୭ ଦିନ ମଧ୍ୟରେ ଏହାର ଜବାବ ଦେବାକୁ ବିମାନ କମ୍ପାନୀକୁ କୁହାଯାଇଛି।

ବିଶେଷ କରି, ଏହି ଯାତ୍ରୀଙ୍କ ପାଖରେ ଘରୋଇ ଯାତ୍ରା ସୂଚାଉଥିବା ବୋର୍ଡିଂ ପାସ୍ ଥିବା ସତ୍ତ୍ୱେ ସେମାନେ କିପରି ଅନ୍ତର୍ଜାତୀୟ ଟ୍ରାନ୍ସଫର ଅଞ୍ଚଳରେ ପହଞ୍ଚିଲେ ଏବଂ ଇମିଗ୍ରେସନ୍ ଯାଞ୍ଚ ବିନା ଅନ୍ତର୍ଜାତୀୟ ବିମାନରେ ଚଢ଼ିଲେ, ସେନେଇ ତଦନ୍ତ ଚାଲିଛି।