ବାତ୍ୟା ‘ମୁରାସୁ’କୁ ନେଇ ସମୀକ୍ଷା ବୈଠକ

ଭୁବନେଶ୍ୱର: ବାତ୍ୟା ‘ମୁରାସୁ’ର ପ୍ରଭାବ ଏବଂ ଆଗାମୀ ସ୍ଥିତିକୁ ନେଇ ମୁଖ୍ୟ ଶାସନ ସଚିବ ଅନୁ ଗର୍ଗ ସମୀକ୍ଷା କରିଛନ୍ତି। ଏନେଇ ସେ ଜିଲ୍ଲାପାଳ, ସ୍ୱତନ୍ତ୍ର ରିଲିଫ୍ କମିଶନର (ଏସ୍ଆର୍ସି) ଓ ଅଗ୍ନିଶମ ବିଭାଗର ଡିଜିଙ୍କ ସହ ବୈଠକ କରି ବାତ୍ୟାର ପ୍ରଭାବ ଓ ପ୍ରଶାସନର ପ୍ରସ୍ତୁତି ସମ୍ପର୍କରେ ଆଲୋଚନା କରିଛନ୍ତି।

ଏଯାଏଁ ବିଶେଷ ପ୍ରଭାବ ନାହିଁ

ସମୀକ୍ଷା ବୈଠକ ପରେ ଅନୁ ଗର୍ଗ କହିଛନ୍ତି ଯେ ଏଯାଏଁ ବାତ୍ୟାର ସେଭଳି କୌଣସି ବିଶେଷ ପ୍ରଭାବ ଦେଖାଯାଇନାହିଁ। କିଛି ସ୍ଥାନରେ ହାଲୁକା ବର୍ଷା ହେଉଥିବା ବେଳେ ସ୍ଥିତି ସ୍ୱାଭାବିକ ରହିଛି। ତେବେ ପ୍ରଶାସନ ପକ୍ଷରୁ ଆଗୁଆ ସତର୍କତା ଓ ପ୍ରସ୍ତୁତି ଜାରି ରହିଛି। ବିପଦ ଆଶଙ୍କା ଥିବା ଅଞ୍ଚଳରୁ ଲୋକଙ୍କୁ ସ୍ଥାନାନ୍ତର କରାଯାଇଛି ଏବଂ ବିଭିନ୍ନ ନିୟନ୍ତ୍ରଣ କକ୍ଷ ମାଧ୍ୟମରେ ସ୍ଥିତି ଉପରେ ନଜର ରଖାଯାଉଛି।

ଗଞ୍ଜାମ ଓ ଗଜପତିରେ ପୁନରୁଦ୍ଧାର କାର୍ଯ୍ୟ

ବାତ୍ୟାରେ ପ୍ରଭାବିତ ଗଞ୍ଜାମ ଓ ଗଜପତି ଜିଲ୍ଲାରେ ପୁନରୁଦ୍ଧାର କାର୍ଯ୍ୟ ଚାଲିଛି। ପୂର୍ବରୁ ଘୋଷଣା ହୋଇଥିବା ସହାୟତା ପ୍ୟାକେଜ୍ ବଣ୍ଟନ ମଧ୍ୟ ଆରମ୍ଭ ହୋଇଛି। ବର୍ଷା ଯୋଗୁଁ ଭୂସ୍ଖଳନ ପ୍ରଭାବିତ କେତେକ ସ୍ଥାନରେ ପୁନରୁଦ୍ଧାର କାମ ବାଧାପ୍ରାପ୍ତ ହୋଇଥିଲା। ତେବେ ମଙ୍ଗଳବାର ସକାଳଠାରୁ ପୁଣି କାର୍ଯ୍ୟ ଆରମ୍ଭ ହୋଇଛି।

କ୍ଷୟକ୍ଷତି ଆକଳନ ପାଇଁ ଗଜପତି ଯିବ କେନ୍ଦ୍ରୀୟ ଟିମ୍

ବାତ୍ୟା ଯୋଗୁଁ ହୋଇଥିବା କ୍ଷୟକ୍ଷତିର ଆକଳନ ପାଇଁ ଆସିଥିବା କେନ୍ଦ୍ରୀୟ ଟିମ୍ ନଭେମ୍ବର ୩ ତାରିଖରେ ଗଜପତି ଜିଲ୍ଲା ଗସ୍ତ କରିବେ। ଏହାପରେ ନଭେମ୍ବର ୪ ତାରିଖରେ ଗଞ୍ଜାମ ଜିଲ୍ଲାର ସ୍ଥିତି ଅନୁଧ୍ୟାନ କରିବା ସହ ଟିମ୍ ସହ ବୈଠକ କରାଯିବ ବୋଲି ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି।