ଆନ୍ଧ୍ର ଉପକୂଳରେ ବଡ଼ ବିପଦର ଆଶଙ୍କା

IMDର ନୂଆ ସୂଚନା ଅନୁଯାୟୀ, ଅର୍ଣ୍ଣବ ପଶ୍ଚିମ-ଉତ୍ତରପଶ୍ଚିମ ଦିଗକୁ ଗତି କରି ମଙ୍ଗଳବାର ସନ୍ଧ୍ୟା ପର୍ଯ୍ୟନ୍ତ ଆଗକୁ ବଢ଼ିବ। ଏହା ପରେ ଦିଗ ବଦଳାଇ ଉତ୍ତରପଶ୍ଚିମ ଦିଗରେ ଆନ୍ଧ୍ରପ୍ରଦେଶ ଉପକୂଳ ଆଡ଼କୁ ଯିବାର ସମ୍ଭାବନା ରହିଛି।

ଲ୍ୟାଣ୍ଡଫଲ୍ ସମୟରେ ୧୧୫-୧୨୫ କିମି ପ୍ରତିଘଣ୍ଟା ବେଗରେ ସ୍ଥାୟୀ ପବନ ଏବଂ ୧୪୦ କିମି ପର୍ଯ୍ୟନ୍ତ ଝଟକା ପବନ ରହିପାରେ। ଏଥିପାଇଁ ଉପକୂଳ ଅଞ୍ଚଳରେ ଗଛ ଉପୁଡ଼ିବା, ବିଦ୍ୟୁତ୍ ବ୍ୟବସ୍ଥା ଓ ଯୋଗାଯୋଗ ପ୍ରଭାବିତ ହେବା ଏବଂ ଘରବାଡ଼ି ଓ ଅନ୍ୟାନ୍ୟ ଭିତ୍ତିଭୂମି କ୍ଷତିଗ୍ରସ୍ତ ହେବାର ଆଶଙ୍କା ରହିଛି।

ଆନ୍ଧ୍ରପ୍ରଦେଶର ନିମ୍ନାଞ୍ଚଳରେ ସମୁଦ୍ର ଜୁଆର ସହ ଝଡ଼ ଜନିତ ପାଣି ପଶିବାର ମଧ୍ୟ ଆଶଙ୍କା ରହିଛି। IMDର ଉପକୂଳ ବୁଲେଟିନ୍ ଅନୁଯାୟୀ, ଲ୍ୟାଣ୍ଡଫଲ୍ ସମୟରେ କାକିନାଡା ଏବଂ ୟାନାମ ନିକଟରେ ୧ରୁ ୧.୫ ମିଟର ପର୍ଯ୍ୟନ୍ତ ଷ୍ଟର୍ମ ସର୍ଜ୍ ହୋଇପାରେ।

ଓଡ଼ିଶାରେ ବଢ଼ିଲା ବର୍ଷା ଆଶଙ୍କା

ଅର୍ଣ୍ଣବର ସିଧାସଳଖ ଲ୍ୟାଣ୍ଡଫଲ୍ ଓଡ଼ିଶାରେ ହେବାର ସମ୍ଭାବନା ନଥିଲେ ମଧ୍ୟ ଦକ୍ଷିଣ ଓଡ଼ିଶା ଉପରେ ଏହାର ପ୍ରଭାବ ପଡ଼ିବ। IMD ଅକ୍ଟୋବର ୨୮ ପାଇଁ ଓଡ଼ିଶାରେ ଅତ୍ୟନ୍ତ ପ୍ରବଳ ବର୍ଷାର ସତର୍କତା ଜାରି କରିଛି। ଅକ୍ଟୋବର ୨୭ରେ ମଧ୍ୟ କିଛି ଅଞ୍ଚଳରେ ଅତି ପ୍ରବଳ ବର୍ଷା, ବଜ୍ରପାତ ଓ ଝଟକା ପବନ ଆଶଙ୍କା ରହିଛି। ଅକ୍ଟୋବର ୨୯ରେ ମଧ୍ୟ ଅତି ପ୍ରବଳ ବର୍ଷା ଜାରି ରହିପାରେ।

ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ ଓ ମାଲକାନଗିରି ଭଳି ଦକ୍ଷିଣ ଓଡ଼ିଶାର ଜିଲ୍ଲାଗୁଡ଼ିକ ଉପରେ ବିଶେଷ ନଜର ରଖାଯାଇଛି। ପ୍ରଶାସନ ପକ୍ଷରୁ ନିମ୍ନାଞ୍ଚଳ ଓ ଦୁର୍ବଳ ଘରେ ରହୁଥିବା ଲୋକଙ୍କୁ ଆବଶ୍ୟକତା ଅନୁସାରେ ସୁରକ୍ଷିତ ସ୍ଥାନକୁ ନେବା, ଆଶ୍ରୟସ୍ଥଳୀ ପ୍ରସ୍ତୁତ ରଖିବା ଏବଂ ଉଦ୍ଧାର ବ୍ୟବସ୍ଥା ସକ୍ରିୟ ରଖିବା ଉପରେ ଗୁରୁତ୍ୱ ଦିଆଯାଇଛି।

NDRF-ODRAF ପ୍ରସ୍ତୁତ, କଣ୍ଟ୍ରୋଲ୍ ରୁମ୍ ସକ୍ରିୟ

ଘୂର୍ଣ୍ଣିଝଡ଼ର ପ୍ରଭାବକୁ ଦୃଷ୍ଟିରେ ରଖି ଓଡ଼ିଶା ସରକାର ଦକ୍ଷିଣ ଜିଲ୍ଲାଗୁଡ଼ିକରେ ପ୍ରସ୍ତୁତି ଜୋରଦାର କରିଛନ୍ତି। ଉଦ୍ଧାର ଓ ରିଲିଫ୍ କାର୍ଯ୍ୟ ପାଇଁ ODRAF ଓ NDRF ଟିମ୍ ସହ ଅଗ୍ନିଶମ ବିଭାଗ ଓ ପୋଲିସକୁ ମଧ୍ୟ ପ୍ରସ୍ତୁତ ରଖାଯାଇଛି। ଜିଲ୍ଲା ସ୍ତରରେ କଣ୍ଟ୍ରୋଲ୍ ରୁମ୍ ସକ୍ରିୟ ରହିଛି।

କେନ୍ଦ୍ର ସରକାରଙ୍କ ପକ୍ଷରୁ ମଧ୍ୟ ଘୂର୍ଣ୍ଣିଝଡ଼ର ଗତିବିଧି ଉପରେ ନିରନ୍ତର ନଜର ରଖାଯାଉଛି। ନ୍ୟାସନାଲ୍ କ୍ରାଇସିସ୍ ମ୍ୟାନେଜମେଣ୍ଟ କମିଟିର ବୈଠକରେ ଆନ୍ଧ୍ରପ୍ରଦେଶ, ଓଡ଼ିଶା, ତେଲେଙ୍ଗାନା, ଛତିଶଗଡ଼ ଓ ପୁଡୁଚେରୀ ପ୍ରଶାସନର ପ୍ରସ୍ତୁତି ସମୀକ୍ଷା କରାଯାଇଛି। NDRF ସହ ସେନା, ନୌସେନା, ବାୟୁସେନା ଓ କୋଷ୍ଟ ଗାର୍ଡକୁ ମଧ୍ୟ ଆବଶ୍ୟକତା ପଡ଼ିଲେ ଉଦ୍ଧାର କାର୍ଯ୍ୟରେ ମୁତୟନ ପାଇଁ ପ୍ରସ୍ତୁତ ରଖାଯାଇଛି।

ମତ୍ସ୍ୟଜୀବୀଙ୍କୁ ସମୁଦ୍ର ନଯିବାକୁ ପରାମର୍ଶ

ଅର୍ଣ୍ଣବର ପ୍ରଭାବକୁ ଦୃଷ୍ଟିରେ ରଖି ଆନ୍ଧ୍ରପ୍ରଦେଶ, ଓଡ଼ିଶା ଓ ୟାନାମ ଉପକୂଳରେ ମତ୍ସ୍ୟଜୀବୀମାନଙ୍କୁ ସମୁଦ୍ରକୁ ନଯିବାକୁ ସତର୍କ କରାଯାଇଛି। ସମୁଦ୍ରରେ ଥିବା ମତ୍ସ୍ୟଜୀବୀଙ୍କୁ ଫେରିଆସିବାକୁ ମଧ୍ୟ ପରାମର୍ଶ ଦିଆଯାଇଛି।

ଏହି ସମୟରେ ଲୋକମାନେ ଅଫବାହରେ ବିଶ୍ୱାସ ନକରି IMD, ରାଜ୍ୟ ସରକାର ଓ ଜିଲ୍ଲା ପ୍ରଶାସନର ଅଧିକୃତ ସୂଚନାକୁ ଅନୁସରଣ କରିବା ଜରୁରୀ। ବିଶେଷକରି ଉପକୂଳ ଓ ନିମ୍ନାଞ୍ଚଳରେ ରହୁଥିବା ଲୋକେ ପ୍ରଶାସନର ନିର୍ଦ୍ଦେଶ ମିଳିଲେ ତୁରନ୍ତ ସୁରକ୍ଷିତ ସ୍ଥାନକୁ ଯିବା ଆବଶ୍ୟକ।