ବାତ୍ୟା ‘ଆର୍ଣ୍ଣବ’ର ପ୍ରଭାବ ଏବେ ଓଡ଼ିଶାର ଉପକୂଳ ଅଞ୍ଚଳରେ ଅନୁଭୂତ ହେଉଛି। ପୁରୀ ଜିଲ୍ଲାର କୋଣାର୍କ ଓ ଚନ୍ଦ୍ରଭାଗା ଅଞ୍ଚଳରେ ଆକାଶ ମେଘାଚ୍ଛନ୍ନ ରହିଥିବା ବେଳେ ମଝିରେ ମଝିରେ ବର୍ଷା ଓ ପବନ ଜାରି ରହିଛି।

ବାତ୍ୟା ପ୍ରଭାବରେ ଚନ୍ଦ୍ରଭାଗା ସମୁଦ୍ର ଅଶାନ୍ତ ହୋଇପଡ଼ିଛି। ବଡ଼ ବଡ଼ ଢେଉ କୂଳକୁ ମାଡ଼ି ଆସୁଥିବାରୁ ପର୍ଯ୍ୟଟକଙ୍କୁ ସମୁଦ୍ର ଭିତରକୁ ଯିବାକୁ ବାରଣ କରାଯାଉଛି। ସୁରକ୍ଷା ପାଇଁ ଉପକୂଳରେ ସତର୍କତା ବଢ଼ାଯାଇଛି।

ଦୁଇ ଦିନ ହେଲା ମାଛଧରା ବନ୍ଦ

ସମୁଦ୍ର ଅଶାନ୍ତ ରହିବା ସହ ବାତ୍ୟା ଚେତାବନୀ ପରେ କୋଣାର୍କ ଅଞ୍ଚଳର ମତ୍ସ୍ୟଜୀବୀମାନେ ଦୁଇ ଦିନ ହେଲା ସମୁଦ୍ରକୁ ମାଛ ଧରିବାକୁ ଯାଉନାହାନ୍ତି। ସରକାରୀ ନିର୍ଦ୍ଦେଶ ଅନୁସାରେ ସେମାନେ ଡଙ୍ଗା ଓ ମାଛଧରା ଜାଲକୁ କୂଳରେ ସୁରକ୍ଷିତ ଭାବେ ରଖିଛନ୍ତି।

ତେବେ ମାଛଧରା ବନ୍ଦ ହେବା ଯୋଗୁ ଦୈନିକ ଆୟ ଉପରେ ପ୍ରଭାବ ପଡ଼ିଛି। ସମୁଦ୍ର ଉପରେ ନିର୍ଭର କରୁଥିବା ଅନେକ ମତ୍ସ୍ୟଜୀବୀ ପରିବାର ଏଥିପାଇଁ ଚିନ୍ତାରେ ଅଛନ୍ତି।

ସମୁଦ୍ରକୁ ନଯିବାକୁ ପରାମର୍ଶ

ବାତ୍ୟା ‘ଆର୍ଣ୍ଣବ’ ଯୋଗୁ ଉପକୂଳରେ ସମୁଦ୍ର ଅବସ୍ଥା ଆହୁରି ଖରାପ ହେବାର ଆଶଙ୍କା ରହିଛି। ଏହି କାରଣରୁ ମତ୍ସ୍ୟଜୀବୀମାନଙ୍କୁ ସମୁଦ୍ରକୁ ନଯିବାକୁ ପ୍ରଶାସନ ପକ୍ଷରୁ ସତର୍କ କରାଯାଇଛି। ଅନ୍ୟପଟେ, ଚନ୍ଦ୍ରଭାଗାରେ ଅଶାନ୍ତ ସମୁଦ୍ର ଥିବାରୁ ପର୍ଯ୍ୟଟକମାନେ ମଧ୍ୟ ସମୁଦ୍ରରେ ପ୍ରବେଶ ନକରିବାକୁ କୁହାଯାଇଛି।

ବାତ୍ୟା ନିକଟତର ହେଉଥିବାରୁ ଉପକୂଳବର୍ତ୍ତୀ ଅଞ୍ଚଳରେ ପାଗ ଓ ସମୁଦ୍ରର ସ୍ଥିତି ଉପରେ ନଜର ରଖାଯାଇଛି।