କେନ୍ଦ୍ର ସରକାର ଓ Cockroach Janta Party (CJP) ମଧ୍ୟରେ ଶନିବାର ହୋଇଥିବା ତୃତୀୟ ପର୍ଯ୍ୟାୟ ଆଲୋଚନା ପରେ ଛାତ୍ର ଆନ୍ଦୋଳନକୁ ନେଇ ଗୁରୁତ୍ୱପୂର୍ଣ୍ଣ ସହମତି ସୃଷ୍ଟି ହୋଇଛି। ସରକାର CJPର ପ୍ରମୁଖ ଦାବିଗୁଡ଼ିକୁ ମାନିବାକୁ ସହମତ ହେବା ପରେ ସଂଗଠନ ପକ୍ଷରୁ ଚାଲିଥିବା ଆନ୍ଦୋଳନକୁ ସ୍ଥଗିତ କରାଯାଇଛି।

ବୈଠକରେ ସରକାର ଆନ୍ଦୋଳନରତ ଛାତ୍ରଛାତ୍ରୀଙ୍କ ବିରୋଧରେ ରୁଜୁ ହୋଇଥିବା ଏଫଆଇଆର୍ (FIR) ଓ ଅନ୍ୟାନ୍ୟ ଆଇନଗତ ମାମଲା ପ୍ରତ୍ୟାହାର କରାଯିବ ବୋଲି ଆଶ୍ୱାସନ ଦେଇଛି। ଏହି ନିଷ୍ପତ୍ତି କେବଳ ଦିଲ୍ଲୀରେ ସୀମିତ ରହିବ ନାହିଁ, ବରଂ ଦେଶର ବିଭିନ୍ନ ରାଜ୍ୟରେ ରୁଜୁ ହୋଇଥିବା ସମାନ ମାମଲାରେ ମଧ୍ୟ ପ୍ରଯୁଜ୍ୟ ହେବ ବୋଲି କୁହାଯାଇଛି।

ମୃତ ଛାତ୍ରଙ୍କ ପରିବାରକୁ ଆର୍ଥିକ ସହାୟତା

ସରକାର ଆନ୍ଦୋଳନ ସମୟରେ ପ୍ରାଣ ହରାଇଥିବା ଛାତ୍ରଙ୍କ ପରିବାରକୁ ଆର୍ଥିକ ସହାୟତା ପ୍ରଦାନ କରିବାକୁ ମଧ୍ୟ ସହମତି ପ୍ରକାଶ କରିଛି। ସେହିପରି ଦେଶର ଶିକ୍ଷା ବ୍ୟବସ୍ଥାରେ ସଂସ୍କାର ଆଣିବା ପାଇଁ ପାଞ୍ଚ ସୂତ୍ରୀୟ ସୁପାରିସ ଉପରେ ଆଲୋଚନା କରାଯିବ ବୋଲି ସୂଚନା ମିଳିଛି।

ଜନ୍ତର ମନ୍ତରରୁ ଘରକୁ ଫେରିବାକୁ ଆହ୍ୱାନ

ସରକାରଙ୍କ ଆଶ୍ୱାସନ ପରେ CJP ପକ୍ଷରୁ ଦିଲ୍ଲୀର ଜନ୍ତର ମନ୍ତରରେ ଆନ୍ଦୋଳନ କରୁଥିବା ସମର୍ଥକଙ୍କୁ ଘରକୁ ଫେରିଯିବାକୁ ଆହ୍ୱାନ କରାଯାଇଛି। ସଂଗଠନ କହିଛି ଯେ ବର୍ତ୍ତମାନ ପାଇଁ ଆନ୍ଦୋଳନକୁ ସ୍ଥଗିତ ରଖାଯାଉଛି।

ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ପରେ ନିଷ୍ପତ୍ତି

ଉଲ୍ଲେଖଯୋଗ୍ୟ ଯେ, କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା CJPର ପ୍ରମୁଖ ଦାବି ଥିଲା। NEET ପ୍ରଶ୍ନପତ୍ର ଲିକ୍‌ ଘଟଣାକୁ କେନ୍ଦ୍ର କରି ସଂଗଠନ ଦୀର୍ଘ ଦିନ ଧରି ଆନ୍ଦୋଳନ କରୁଥିଲା।

CJPର ମୁଖପାତ୍ର କହିଛନ୍ତି ଯେ ସରକାର ଛାତ୍ରଙ୍କ ବିରୋଧରେ ରୁଜୁ ମାମଲା ପ୍ରତ୍ୟାହାର, ଭବିଷ୍ୟତରେ ସେମାନଙ୍କ ବିରୋଧରେ କୌଣସି ଦଣ୍ଡାତ୍ମକ ପଦକ୍ଷେପ ନ ନେବା ଏବଂ NEET ପ୍ରଶ୍ନପତ୍ର ଲିକ୍‌ ଘଟଣା ସହ ଜଡିତ ଆତ୍ମହତ୍ୟା କରିଥିବା ଛାତ୍ରଙ୍କ ପରିବାରକୁ ନିୟମ ଅନୁସାରେ ସର୍ବାଧିକ କ୍ଷତିପୂରଣ ପ୍ରଦାନ କରିବାକୁ ଆଶ୍ୱାସନ ଦେଇଛି।