ଭାରତକୁ ବଦନାମ କରିବା ଷଡ଼ଯନ୍ତ୍ର ଆଶଙ୍କା! ବାଂଲାଦେଶରେ ୧୫୦ରୁ ଅଧିକ ଚୀନ୍ ଭ୍ଲଗର୍, ଢାକାର ଗଳିକୁ କହୁଛନ୍ତି ଦିଲ୍ଲୀ

ଢାକା/ନୂଆଦିଲ୍ଲୀ:ଭାରତକୁ ବିଶ୍ୱ ସମ୍ମୁଖରେ ବଦନାମ କରିବା ପାଇଁ ଡିଜିଟାଲ୍ ମାଧ୍ୟମରେ ଏକ ନୂଆ ଉଦ୍ୟମ ଚାଲିଛି କି? ବାଂଲାଦେଶର ରାଜଧାନୀ ଢାକାର ଗରିବ ବସ୍ତି ଓ ଘନ ଜନବସତିର ଭିଡିଓକୁ ଭାରତର ରାଜଧାନୀ ନୂଆଦିଲ୍ଲୀର ଦୃଶ୍ୟ ବୋଲି ଚୀନ୍ର କିଛି ଭ୍ଲଗର୍ ଲାଇଭ୍ରେ ଦର୍ଶାଉଥିବା ଅଭିଯୋଗ ଆସିଛି। ଏହି ଭିଡିଓଗୁଡ଼ିକରେ ଭାରତୀୟଙ୍କ ଜୀବନଶୈଳୀ, ପରିମଳ ବ୍ୟବସ୍ଥା ଓ ରହଣି ସମ୍ପର୍କରେ ଅପମାନଜନକ ମନ୍ତବ୍ୟ ଦିଆଯାଉଥିବା ମଧ୍ୟ ରିପୋର୍ଟ ପ୍ରକାଶ ପାଇଛି।

ବାଂଲାଦେଶର ପ୍ରମୁଖ ଖବରକାଗଜ ‘ପ୍ରଥମ ଆଲୋ’ ନଭେମ୍ବର ୬ ତାରିଖରେ ପ୍ରକାଶ କରିଥିବା ଏକ ତଦନ୍ତମୂଳକ ରିପୋର୍ଟରେ ଏହି ଘଟଣା ସାମ୍ନାକୁ ଆଣିଛି। ଢାକାର ଉତ୍ତରା ସେକ୍ଟର-୧୨ ଓ ଟେକପାରା ଅଞ୍ଚଳରେ ଚୀନ୍ ନାଗରିକମାନେ ଦୀର୍ଘ ମାସ ଧରି ଲାଇଭ୍ ଭିଡିଓ କରୁଥିବା ରିପୋର୍ଟରେ କୁହାଯାଇଛି। ସ୍ଥାନୀୟ ବାସିନ୍ଦାଙ୍କ ଅନୁମାନ ଅନୁସାରେ, ଏଭଳି ଭିଡିଓ କରୁଥିବା ଚୀନ୍ ନାଗରିକଙ୍କ ସଂଖ୍ୟା ୧୫୦ରୁ ଅଧିକ। ତେବେ ଏହା ସରକାରୀ ଭାବେ ଯାଞ୍ଚ ହୋଇଥିବା ସଂଖ୍ୟା ନୁହେଁ।

ଢାକାର ଗଳିକୁ କହୁଛନ୍ତି ନୂଆଦିଲ୍ଲୀ!

‘ପ୍ରଥମ ଆଲୋ’ର ରିପୋର୍ଟ ଅନୁସାରେ, ଚୀନ୍ର କିଛି ଭ୍ଲଗର୍ ଢାକାର ଉତ୍ତରା ଅଞ୍ଚଳର ଟେକପାରା ଓ ସେକ୍ଟର-୧୨ରେ ଭିଡିଓ କରିବା ସମୟରେ ଦର୍ଶକଙ୍କୁ ଏହା ଭାରତର ନୂଆଦିଲ୍ଲୀ ବୋଲି କହୁଛନ୍ତି। ଏହି ଭିଡିଓଗୁଡ଼ିକ ଚୀନ୍ର WeChat ଓ Douyin ଭଳି ସାମାଜିକ ଗଣମାଧ୍ୟମ ପ୍ଲାଟଫର୍ମରେ ଲାଇଭ୍ ହେଉଥିବା କୁହାଯାଇଛି।

ନଭେମ୍ବର ୧ ତାରିଖରେ ‘ମିଆନମିଆନ୍’ ନାମରେ ପରିଚିତ ଜଣେ ଚୀନ୍ ମହିଳା ଉତ୍ତରା ସେକ୍ଟର-୧୨ର ଏକ କେନାଲ୍ ପାଖରେ ଲାଇଭ୍ କରୁଥିଲେ। ସେ ନିଜକୁ ଚୀନ୍ର ସିଚୁଆନ୍ ପ୍ରଦେଶର ବାସିନ୍ଦା ବୋଲି ପରିଚୟ ଦେଇଥିଲେ। କିନ୍ତୁ ଲାଇଭ୍ରେ ଏହି ସ୍ଥାନକୁ ନୂଆଦିଲ୍ଲୀ ବୋଲି ଦର୍ଶାଇଥିବା ‘ପ୍ରଥମ ଆଲୋ’ ରିପୋର୍ଟ କରିଛି।

ସେହି ଭିଡିଓରେ ସେଠାକାର ଘରଗୁଡ଼ିକୁ ଅପରିଷ୍କାର, ଅନୁନ୍ନତ ଓ ଅସ୍ୱାସ୍ଥ୍ୟକର ବୋଲି ବର୍ଣ୍ଣନା କରାଯାଇଥିବା ଖବରରେ ଉଲ୍ଲେଖ ରହିଛି। ଏହାସହ ସେଠାକାର ଆଇନଶୃଙ୍ଖଳା ସ୍ଥିତି ଖରାପ ବୋଲି ମଧ୍ୟ ମନ୍ତବ୍ୟ ଦିଆଯାଇଥିଲା।

ଚା’କୁ ‘ଗୋମୂତ୍ର ଚା’ ବୋଲି କହିଲେ ଭ୍ଲଗର୍!

ଏହି ଘଟଣାରେ ସବୁଠାରୁ ବିବାଦୀୟ ମନ୍ତବ୍ୟ ଆସିଛି ଟେକପାରା ଅଞ୍ଚଳର ଏକ ଚା’ ଦୋକାନରୁ। ‘ୱାଙ୍ଗ୍ ୱେଇ’ ନାମକ ଜଣେ ଚୀନ୍ ନାଗରିକ ସେଠାରେ ଭିଡିଓ କରୁଥିବା ସମୟରେ ସ୍ଥାନୀୟ ଲୋକମାନେ ପିଉଥିବା ଚା’କୁ ‘ଗୋମୂତ୍ରରୁ ତିଆରି ଚା’ ବୋଲି ଦର୍ଶକଙ୍କୁ କହିଥିବା ରିପୋର୍ଟରେ ଉଲ୍ଲେଖ ରହିଛି। ଚା’ ଅପରିଷ୍କାର ନଦୀ ଜଳରେ ତିଆରି ହୋଇଥିବା ଦାବି ମଧ୍ୟ ସେ କରିଥିବା କୁହାଯାଇଛି।

‘ପ୍ରଥମ ଆଲୋ’ ଏହି ଲାଇଭ୍ର କଥାବାର୍ତ୍ତାକୁ Google Translate ସାହାଯ୍ୟରେ ଅନୁବାଦ କରିଥିଲା ଏବଂ ଚୀନ୍ ଭାଷା ଜାଣିଥିବା ଚାରି ଜଣ ବାଂଲାଦେଶୀଙ୍କ ଦ୍ୱାରା ତାହାର ଅର୍ଥ ଯାଞ୍ଚ କରାଇଥିଲା। ତେଣୁ ଏହା କେବଳ ଭାଷାନ୍ତର ଭୁଲ୍ କି ନୁହେଁ, ସେନେଇ ମଧ୍ୟ ଖବରକାଗଜ ତଦନ୍ତ କରିଥିବା ଜଣାପଡ଼ିଛି।

WeChat ଓ Douyinରେ ହେଉଛି ଲାଇଭ୍

ଚୀନ୍ର ଏହି ଭ୍ଲଗର୍ମାନେ WeChat ଓ Douyin ଭଳି ପ୍ଲାଟଫର୍ମରେ ନିଜର ଭିଡିଓ ପ୍ରସାରଣ କରୁଥିବା ରିପୋର୍ଟରେ କୁହାଯାଇଛି। ଏହି ଦୁଇଟି ଚୀନ୍ର ଲୋକପ୍ରିୟ ଡିଜିଟାଲ୍ ପ୍ଲାଟଫର୍ମ। ଅନ୍ୟପଟେ, ‘ଫାଙ୍ଗୟୁ’ ନାମକ ଜଣେ ଚୀନ୍ ନାଗରିକ ‘ପ୍ରଥମ ଆଲୋ’ ସହ କଥା ହେବା ସମୟରେ ଏହି ଲାଇଭ୍ଗୁଡ଼ିକୁ ଉତ୍ପାଦ ପ୍ରଚାର ବା ପ୍ରମୋସନ୍ କାର୍ଯ୍ୟକ୍ରମର ଅଂଶ ବୋଲି କହିଥିଲେ।

କିନ୍ତୁ କାହିଁକି ଏହି ନିର୍ଦ୍ଦିଷ୍ଟ ଅଞ୍ଚଳକୁ ବାଛି ଲଗାତାର ଲାଇଭ୍ କରାଯାଉଛି ବୋଲି ପଚରାଯିବାରୁ ସେ ଆଉ କିଛି କହିନଥିଲେ। ସେହିପରି ଜଣେ ସ୍ଥାନୀୟ ମହିଳା ରିତୁ ଅଖତର୍ ଚୀନ୍ ଭ୍ଲଗର୍ମାନଙ୍କ ପାଇଁ ଗାଇଡ୍ ଭାବେ କାମ କରୁଥିବା ଏବଂ ଦିନକୁ ୭୦୦ରୁ ୮୦୦ ଟଙ୍କା ପାଉଥିବା କହିଥିଲେ। ଏହି ଭିଡିଓ ପ୍ରସ୍ତୁତିରେ ଅନ୍ୟ କେତେକ ସ୍ଥାନୀୟ ମହିଳା ମଧ୍ୟ ସହଯୋଗ କରୁଥିବା ସେ ସୂଚନା ଦେଇଥିଲେ।

ଘର ଭିତରେ ପଶି ଭିଡିଓ କରୁଥିବା ଅଭିଯୋଗ

କେବଳ ସାର୍ବଜନୀନ ସ୍ଥାନ ନୁହେଁ, କିଛି ଭ୍ଲଗର୍ ବିନା ଅନୁମତିରେ ଲୋକଙ୍କ ଘର ଭିତରକୁ ପ୍ରବେଶ କରି ଭିଡିଓ କରୁଥିବା ନେଇ ମଧ୍ୟ ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି।

‘ପ୍ରଥମ ଆଲୋ’କୁ ଜଣେ ମହିଳା ବାସିନ୍ଦା କହିଥିଲେ ଯେ, କେତେକ ଚୀନ୍ ଭ୍ଲଗର୍ ଅଚାନକ ଘର ଭିତରକୁ ପଶି ଭିଡିଓ ରେକର୍ଡ କରୁଛନ୍ତି। ଏପରିକି କେତେକ ଘଟଣାରେ ବାଥରୁମ୍ ଭିତରକୁ ମଧ୍ୟ ପ୍ରବେଶ କରିଥିବା ଅଭିଯୋଗ ହୋଇଛି। ଏଭଳି ଘଟଣା ମହିଳାଙ୍କ ବ୍ୟକ୍ତିଗତ ଗୋପନୀୟତା ଓ ସୁରକ୍ଷାକୁ ନେଇ ଚିନ୍ତା ବଢ଼ାଇଛି।

ଏହା ପୂର୍ବରୁ ମେ’ ୨୮ ତାରିଖରେ ବାଂଲାଦେଶର ‘ଦି ବିଜନେସ୍ ଷ୍ଟାଣ୍ଡାର୍ଡ’ ମଧ୍ୟ ଉତ୍ତରାର ଟେକପାରା ଅଞ୍ଚଳରେ ଚୀନ୍ ଭ୍ଲଗର୍ମାନଙ୍କ ଭିଡିଓଗ୍ରାଫି ସମ୍ପର୍କରେ ଏକ ରିପୋର୍ଟ ପ୍ରକାଶ କରିଥିଲା। ସେଠାରେ ସ୍ଥାନୀୟ ବାସିନ୍ଦା ଘର, ରୋଷେଇ ଘର ଓ ବ୍ୟକ୍ତିଗତ ସ୍ଥାନରେ ବିନା ଅନୁମତିରେ ଭିଡିଓ କରାଯାଉଥିବା ଅଭିଯୋଗ ଉଠାଇଥିଲେ।

୧୫୦ରୁ ଅଧିକ ଚୀନ୍ ନାଗରିକଙ୍କ ଉପସ୍ଥିତି ନେଇ ଚର୍ଚ୍ଚା

‘ପ୍ରଥମ ଆଲୋ’ର ତଦନ୍ତ ଅନୁଯାୟୀ, ଉତ୍ତରାର ଟେକପାରା ଓ ସେକ୍ଟର-୧୨ ଅଞ୍ଚଳରେ ଦୀର୍ଘ ମାସ ଧରି ଚୀନ୍ ନାଗରିକମାନେ ଭିଡିଓ କରୁଛନ୍ତି। ଏହି ସଂଖ୍ୟା କେତେ ତାହାର ସଠିକ୍ ତଥ୍ୟ ନଥିଲେ ମଧ୍ୟ ସ୍ଥାନୀୟ ବାସିନ୍ଦା ୧୫୦ରୁ ଅଧିକ ଚୀନ୍ ନାଗରିକ ଏଭଳି ଭିଡିଓ କରୁଥିବା ଅନୁମାନ କରିଛନ୍ତି।

ଏହି ଭ୍ଲଗର୍ମାନେ ପ୍ରାୟ ସକାଳରୁ ରାତି ପର୍ଯ୍ୟନ୍ତ ଭିଡିଓ କରୁଥିବା ଅଭିଯୋଗ ରହିଛି। ସେମାନେ ରାସ୍ତା, ଦୋକାନ, ଘର ପାଖାପାଖି ଅଞ୍ଚଳ ଏବଂ ଗରିବ ଲୋକଙ୍କ ବସତିକୁ ଅଧିକ ଭାବେ କ୍ୟାମେରାରେ ଧରୁଥିବା କୁହାଯାଇଛି। ଏତେ ସଂଖ୍ୟକ ବିଦେଶୀ ନାଗରିକ ଏକ ନିର୍ଦ୍ଦିଷ୍ଟ ଅଞ୍ଚଳରେ ଲଗାତାର ଏଭଳି ଭିଡିଓ କରୁଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ସନ୍ଦେହ ଓ ଅସନ୍ତୋଷ ବଢ଼ିଛି।

ଚୀନ୍ର ଯୋଜନା ନା ଭ୍ୟୁଜ୍ ପାଇଁ କଣ୍ଟେଣ୍ଟ?

ଏହି ଘଟଣା ପଛରେ ଚୀନ୍ର କୌଣସି ସଂଗଠିତ ଭାରତ ବିରୋଧୀ ଡିଜିଟାଲ୍ ଅଭିଯାନ ରହିଛି କି, ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଛି। ଢାକାର ଅଞ୍ଚଳକୁ ଦିଲ୍ଲୀ ବୋଲି ଦର୍ଶାଇବା ସହ ଭାରତର ଲୋକଙ୍କ ଜୀବନଶୈଳୀକୁ ନେଇ ଅପମାନଜନକ ମନ୍ତବ୍ୟ ଦେବା ଘଟଣା ଏହି ସନ୍ଦେହକୁ ଅଧିକ ବଢ଼ାଇଛି।

ତେବେ ଏହାକୁ ଚୀନ୍ ସରକାରଙ୍କ ପ୍ରାୟୋଜିତ କାର୍ଯ୍ୟକ୍ରମ ବୋଲି କହିବା ପାଇଁ ଏପର୍ଯ୍ୟନ୍ତ କୌଣସି ଠୋସ୍ ପ୍ରମାଣ ସାମ୍ନାକୁ ଆସିନାହିଁ। ଏହି ଭ୍ଲଗର୍ମାନେ କୌଣସି ସଂଗଠିତ ନେଟୱର୍କର ଅଂଶ କି ନିଜସ୍ୱ ଭାବେ ଟଙ୍କା ଓ ଭ୍ୟୁଜ୍ ପାଇଁ ଏଭଳି କଣ୍ଟେଣ୍ଟ ପ୍ରସ୍ତୁତ କରୁଛନ୍ତି, ତାହା ମଧ୍ୟ ସ୍ପଷ୍ଟ ହୋଇନାହିଁ।

କେତେକ ରିପୋର୍ଟରେ ଏହି ଭିଡିଓଗୁଡ଼ିକୁ ଚୀନ୍ ଦର୍ଶକଙ୍କ ପାଇଁ ଉତ୍ପାଦ ପ୍ରମୋସନ୍ କାର୍ଯ୍ୟକ୍ରମର ଅଂଶ ବୋଲି କୁହାଯାଇଛି। ତେଣୁ ଏହାର ପ୍ରକୃତ ଉଦ୍ଦେଶ୍ୟ ଜାଣିବା ପାଇଁ ଅଧିକ ତଦନ୍ତ ଆବଶ୍ୟକ।

ବାଂଲାଦେଶ ପୋଲିସର ନଜରରେ ଘଟଣା

ଢାକାର ଉତ୍ତରା ୱେଷ୍ଟ ପୋଲିସ ଷ୍ଟେସନର ଅଧିକାରୀମାନେ ଏହି ଅଞ୍ଚଳରେ ଚୀନ୍ ନାଗରିକଙ୍କୁ ଭିଡିଓ କରୁଥିବା ଦେଖିଥିବା କହିଛନ୍ତି। କିନ୍ତୁ ସେମାନେ କାହିଁକି ଭିଡିଓ କରୁଛନ୍ତି ଏବଂ ଭିଡିଓ କେଉଁଠି ପ୍ରସାରଣ ହେଉଛି, ସେନେଇ ପୋଲିସ ପାଖରେ ସ୍ପଷ୍ଟ ତଥ୍ୟ ନଥିବା ‘ପ୍ରଥମ ଆଲୋ’ ରିପୋର୍ଟ କରିଛି।

ଉତ୍ତରା ୱେଷ୍ଟ ଥାନାର ଅଧିକାରୀ ମହମ୍ମଦ ଖାଲିଦ ମନସୁର କହିଛନ୍ତି ଯେ, ଏହି ଭିଡିଓ କାର୍ଯ୍ୟକଳାପ ସମ୍ପର୍କରେ ବରିଷ୍ଠ ଅଧିକାରୀଙ୍କୁ ଜଣାଇଦିଆଯାଇଛି ଏବଂ ଏହା ଉପରେ କାମ ଚାଲିଛି। ଅନ୍ୟପଟେ ‘ଦି ବିଜନେସ୍ ଷ୍ଟାଣ୍ଡାର୍ଡ’କୁ ଉତ୍ତରା ଜୋନ୍ର ଜଣେ ପୋଲିସ ଅଧିକାରୀ କହିଥିଲେ ଯେ, ଏହି ନିର୍ଦ୍ଦିଷ୍ଟ ଭିଡିଓ କରୁଥିବା ଲୋକଙ୍କ ସହ ପୂର୍ବରୁ ଘଟିଥିବା ଅନ୍ୟ ଅପରାଧର ସିଧାସଳଖ ସମ୍ପର୍କ ମିଳିନାହିଁ।

ଏବେ ଏହି ଘଟଣା ଭାରତର ଛବି, ସୋସିଆଲ୍ ମିଡିଆରେ ଭୁଲ୍ ସୂଚନା ପ୍ରସାର ଓ ବ୍ୟକ୍ତିଗତ ଗୋପନୀୟତାକୁ ନେଇ ନୂଆ ପ୍ରଶ୍ନ ଉଠାଇଛି। ଏହି ଭ୍ଲଗର୍ମାନଙ୍କ ପ୍ରକୃତ ଉଦ୍ଦେଶ୍ୟ କ’ଣ ଏବଂ କୌଣସି ସଂଗଠିତ ଅଭିଯାନ ଚାଲିଛି କି ନାହିଁ, ତାହା ଆଗାମୀ ତଦନ୍ତ ପରେ ହିଁ ସ୍ପଷ୍ଟ ହେବ।