ନୂଆଦିଲ୍ଲୀ: ହଲିଉଡ୍‌ର ଆଗାମୀ ଫ୍ୟାଣ୍ଟାସି ଫିଲ୍ମ ‘Children of Blood and Bone’କୁ ନେଇ ଦର୍ଶକଙ୍କ ଉତ୍ସାହ ବଢ଼ିଛି। ଫିଲ୍ମର ନୂଆ ଟ୍ରେଲର ରିଲିଜ୍ ହୋଇଥିବା ବେଳେ ଏଥିରେ ନାଇଜେରିଆର ପ୍ରସିଦ୍ଧ ଗାୟିକା ତଥା ଗ୍ରାମି ପୁରସ୍କାର ବିଜେତା ଟେମ୍ସଙ୍କ ଗୀତ ‘African Love Story’ ସ୍ଥାନ ପାଇଛି। ଆଫ୍ରିକୀୟ ସଙ୍ଗୀତର ଝଲକ ସହ ଏହି ଟ୍ରେଲର ଫିଲ୍ମର ଯାଦୁମୟ ଦୁନିଆ, ଯୁଦ୍ଧ ଓ ବିଦ୍ରୋହର କାହାଣୀକୁ ସାମ୍ନାକୁ ଆଣିଛି।

ଟେମ୍ସଙ୍କ ଗୀତରେ ଆଫ୍ରିକୀୟ ସଙ୍ଗୀତର ଛାପ

ଏହି ଫିଲ୍ମର ନୂଆ ଟ୍ରେଲରର ଏକ ବିଶେଷ ଆକର୍ଷଣ ହେଉଛି ଟେମ୍ସଙ୍କ ‘African Love Story’ ଗୀତ। ନାଇଜେରିଆର ଏହି ଗାୟିକା ଗୀତଟିକୁ ଲେଖିବା ସହ ଗାଇଛନ୍ତି। ଫିଲ୍ମର ଅରିଜିନାଲ ସାଉଣ୍ଡଟ୍ରାକ୍‌ରେ ସେ ଏକ୍‌ଜିକ୍ୟୁଟିଭ୍ ମ୍ୟୁଜିକ୍ ପ୍ରଡ୍ୟୁସର ଭାବେ ମଧ୍ୟ କାମ କରିଛନ୍ତି।

ଏହି ଗୀତ ଫିଲ୍ମର ଫ୍ୟାଣ୍ଟାସି ଦୁନିଆକୁ ଆଫ୍ରିକୀୟ ସଙ୍ଗୀତର ଏକ ନୂଆ ରଙ୍ଗ ଦେଇଛି। ଏହାର ଲିଡ୍ ସିଙ୍ଗଲ୍ ୨୦ ନଭେମ୍ବର ୨୦୨୬ରେ ରିଲିଜ୍ ହେବାର କାର୍ଯ୍ୟକ୍ରମ ରହିଛି। ସାଉଣ୍ଡଟ୍ରାକ୍‌ରେ ବର୍ଣ୍ଣା ବୟ, ଫାୟାରବୟ DML, ଆୟରା ଷ୍ଟାର ଓ ଅନ୍ୟ କଳାକାରଙ୍କ ସଙ୍ଗୀତ ମଧ୍ୟ ରହିବ।

ଯାଦୁ ଫେରାଇବାକୁ ଯୁବତୀଙ୍କ ସଂଘର୍ଷ

ଟୋମି ଆଡେୟେମିଙ୍କ ଲୋକପ୍ରିୟ ଉପନ୍ୟାସ ଉପରେ ଆଧାରିତ ଏହି ଫିଲ୍ମର କାହାଣୀ କାଳ୍ପନିକ ରାଜ୍ୟ ଓରିଶାକୁ କେନ୍ଦ୍ର କରି ଗତିଶୀଳ। ଏହି ରାଜ୍ୟରେ ରାଜା ସାରାନ୍ ଯାଦୁଶକ୍ତିକୁ ନଷ୍ଟ କରିଦେବା ପରେ ଲୋକଙ୍କ ଜୀବନରେ ଅନ୍ଧକାର ଛାଇଯାଏ।

କାହାଣୀର ମୁଖ୍ୟ ଚରିତ୍ର ଜେଲି ନିଜ ଲୋକଙ୍କ ପାଇଁ ଯାଦୁଶକ୍ତି ଫେରାଇ ଆଣିବାକୁ ଏକ ବିପଜ୍ଜନକ ଯାତ୍ରା ଆରମ୍ଭ କରେ। ଏହି ଯାତ୍ରାରେ ତାଙ୍କ ସହ ତାଙ୍କ ଭାଇ ରହିଥିବା ବେଳେ ପରେ ରାଜାଙ୍କ ପୁଅ ଓ ଝିଅ ମଧ୍ୟ ତାଙ୍କ ସହ ମିଶି ଅତ୍ୟାଚାରୀ ଶାସନ ବିରୋଧରେ ଲଢ଼େଇ କରନ୍ତି। ଏହି ସଂଘର୍ଷ କେବଳ ଯାଦୁ ଫେରାଇବା ପାଇଁ ନୁହେଁ, ବରଂ ନିଜ ପରିଚୟ, ପରିବାର ଓ ଆଶାକୁ ପୁଣି ଫେରାଇ ଆଣିବାର କାହାଣୀ।

ଦମ୍‌ଦାର ଷ୍ଟାରକାଷ୍ଟ, ନିର୍ଦ୍ଦେଶନାରେ ଜିନା

ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି ଜିନା ପ୍ରିନ୍ସ-ବାଇଥଉଡ୍। ଏଥିରେ ଥୁସୋ ମବେଡୁ, ଡାମସନ୍ ଇଦ୍ରିସ୍, ଆମାଣ୍ଡଲା ଷ୍ଟେନବର୍ଗ ଓ ଟୋସିନ୍ କୋଲ୍ ପ୍ରମୁଖ ଭୂମିକାରେ ଅଛନ୍ତି। ଏହାସହ ସିନ୍ଥିଆ ଏରିଭୋ, ଲାଶାନା ଲିଞ୍ଚ, ଚିୱେଟେଲ୍ ଇଜିଓଫୋର୍, ରେଜିନା କିଙ୍ଗ୍, ଇଦ୍ରିସ୍ ଏଲ୍‌ବା ଓ ଭାଓଲା ଡେଭିସ୍‌ଙ୍କ ଭଳି ନାମୀ କଳାକାର ମଧ୍ୟ ଏହି ଫିଲ୍ମରେ ଅଭିନୟ କରିଛନ୍ତି।

କେବେ ରିଲିଜ୍ ହେବ ଫିଲ୍ମ?

ପାରାମାଉଣ୍ଟ ପିକ୍ଚର୍ସ ପକ୍ଷରୁ ଏହି ଫିଲ୍ମକୁ ଭାରତର ସିନେମାଘରଗୁଡ଼ିକରେ ୧୫ ଜାନୁଆରୀ ୨୦୨୭ରେ ମୁକ୍ତି ଦିଆଯିବ। ଯାଦୁ, ଆକ୍ସନ୍, ରାଜନୈତିକ ସଂଘର୍ଷ ଓ ଆଫ୍ରିକୀୟ ସଙ୍ଗୀତର ମିଶ୍ରଣ ଥିବା ଏହି ଫିଲ୍ମକୁ ନେଇ ଏବେଠାରୁ ଦର୍ଶକଙ୍କ ମଧ୍ୟରେ ଆଗ୍ରହ ଦେଖାଦେଇଛି।