ଉତ୍ତରାଖଣ୍ଡରେ ଲଗାତାର ହେଉଥିବା ପ୍ରବଳ ବର୍ଷା ଓ ଖରାପ ପାଣିପାଗ ପରିସ୍ଥିତି ଯୋଗୁଁ ଚାରିଧାମ ଯାତ୍ରାକୁ ଦୁଇ ଦିନ ପାଇଁ ସ୍ଥଗିତ କରାଯାଇଛି। ତୀର୍ଥଯାତ୍ରୀଙ୍କ ସୁରକ୍ଷାକୁ ସର୍ବାଧିକ ଗୁରୁତ୍ୱ ଦେଇ ପ୍ରଶାସନ ମଙ୍ଗଳବାର ଓ ବୁଧବାର ପାଇଁ ବଦ୍ରିନାଥ, କେଦାରନାଥ, ଗଙ୍ଗୋତ୍ରୀ ଓ ଯମୁନୋତ୍ରୀ ଯାତ୍ରା ବନ୍ଦ ରଖିବାକୁ ନିଷ୍ପତ୍ତି ନେଇଛି।

ରାଜ୍ୟର ବିଭିନ୍ନ ସ୍ଥାନରେ ଲଗାତାର ବର୍ଷା, ଭୂସ୍ଖଳନ ଏବଂ ପାହାଡ଼ରୁ ପଥର ଖସିବା ଯୋଗୁଁ ଚାରିଧାମକୁ ସଂଯୋଗ କରୁଥିବା ଅନେକ ପ୍ରମୁଖ ରାସ୍ତା ଅବରୋଧ ହୋଇପଡ଼ିଛି। ଏହାକୁ ଦୃଷ୍ଟିରେ ରଖି ଯାତ୍ରାକୁ ସାମୟିକ ଭାବେ ବନ୍ଦ କରାଯାଇଛି।

କେନ୍ଦ୍ରୀୟ ଜଳ ଆୟୋଗ ଉତ୍ତରାଖଣ୍ଡ, ହିମାଚଳ ପ୍ରଦେଶ, ଜମ୍ମୁ-କାଶ୍ମୀର ଓ ଲଦାଖର କେତେକ ଅଞ୍ଚଳ ପାଇଁ ମଧ୍ୟମ ଧରଣର ବନ୍ୟା ସତର୍କତା ଜାରି କରିଛି। ଗଡ଼ୱାଲ ଡିଭିଜନର କମିସନର କହିଛନ୍ତି ଯେ, ପାଗ ସ୍ୱାଭାବିକ ହେବା ଏବଂ ରାସ୍ତା ସୁରକ୍ଷିତ ଘୋଷଣା ପରେ ହିଁ ଯାତ୍ରା ପୁନର୍ବାର ଆରମ୍ଭ କରାଯିବ।

ପାଣିପାଗ ବିଭାଗ ଆଗାମୀ କିଛି ଘଣ୍ଟା ମଧ୍ୟରେ ଆହୁରି ପ୍ରବଳ ବର୍ଷାର ପୂର୍ବାନୁମାନ କରିଥିବା ବେଳେ ୨୪ ଘଣ୍ଟିଆ ବନ୍ୟା ପୂର୍ବାନୁମାନ ମଧ୍ୟ ଜାରି କରିଛି। ରାଜ୍ୟର ଅନେକ ଜିଲ୍ଲାରେ ବନ୍ୟା ଓ ଭୂସ୍ଖଳନ ଆଶଙ୍କା ନେଇ ଅରେଞ୍ଜ ଆଲର୍ଟ ଜାରି ହୋଇଛି।

ଆଲମୋରା, ବାଗେଶ୍ୱର, ଚାମୋଲି, ଡେରାଡୁନ, ପୌଡ଼ି ଗଡୱାଲ, ତେହେରୀ ଗଡୱାଲ, ନୈନିତାଲ, ପିଥୋରାଗଡ଼, ରୁଦ୍ରପ୍ରୟାଗ ଓ ଉତ୍ତରକାଶୀ ଜିଲ୍ଲାରେ ପ୍ରବଳ ବର୍ଷା, ବଜ୍ରପାତ ଓ ଭୂସ୍ଖଳନର ଆଶଙ୍କା ରହିଛି। ସେହିପରି ଜମ୍ମୁ-କାଶ୍ମୀର ଓ ହିମାଚଳ ପ୍ରଦେଶର କେତେକ ଜିଲ୍ଲା ପାଇଁ ମଧ୍ୟ ସତର୍କତା ଜାରି କରାଯାଇଛି।

ପ୍ରଶାସନ ସ୍ଥାନୀୟ ବାସିନ୍ଦା, ପର୍ଯ୍ୟଟକ ଓ ତୀର୍ଥଯାତ୍ରୀଙ୍କୁ ଅନାବଶ୍ୟକ ଯାତ୍ରା ନ କରିବା, ନଦୀ ଓ ଝରଣା ନିକଟକୁ ନ ଯିବା ଏବଂ ପାହାଡ଼ିଆ ରାସ୍ତାରେ ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଛି। ସରକାରୀ ସୂଚନା ଓ ପାଣିପାଗ ବିଭାଗର ପରାମର୍ଶକୁ ଅନୁସରଣ କରିବା ସହ ଗୁଜବ ଉପରେ ବିଶ୍ୱାସ ନ କରିବାକୁ ମଧ୍ୟ ଅନୁରୋଧ କରାଯାଇଛି।

ଏହି ବର୍ଷାର ପ୍ରଭାବରେ ଡେରାଡୁନର ପ୍ରେମନଗର ଅଞ୍ଚଳରେ ଟାନ୍ସ ନଦୀ ଉପରେ ଥିବା ନୂଆ ସେତୁ କ୍ଷତିଗ୍ରସ୍ତ ହୋଇଥିବା ବେଳେ ଡେରାଡୁନ, ବିକାଶନଗର ଓ ହିମାଚଳ ପ୍ରଦେଶ ମଧ୍ୟରେ ଯାତାୟାତ ପ୍ରଭାବିତ ହୋଇଛି। ପ୍ରଭାବିତ ଜିଲ୍ଲାଗୁଡ଼ିକରେ ସ୍କୁଲ ଓ ଅଙ୍ଗନୱାଡ଼ି କେନ୍ଦ୍ରଗୁଡ଼ିକୁ ମଧ୍ୟ ସାମୟିକ ଭାବେ ବନ୍ଦ ରଖାଯାଇଛି।