ଅଗ୍ନିପଥ ଯୋଜନା ଅଧୀନରେ ନିଯୁକ୍ତ ଅଗ୍ନିବୀରଙ୍କ ସ୍ଥାୟୀ ନିଯୁକ୍ତି କୋଟା ବଢ଼ାଇବା ପ୍ରସ୍ତାବ ଉପରେ କେନ୍ଦ୍ର ସରକାର ବିଚାର କରୁଥିବା ଚର୍ଚ୍ଚା ଜୋର ଧରିଛି। ତେବେ ଏନେଇ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୌଣସି ଆନୁଷ୍ଠାନିକ ଘୋଷଣା କିମ୍ବା ପୁଷ୍ଟି କରାଯାଇନାହିଁ।

ଗଣମାଧ୍ୟମ ରିପୋର୍ଟ ଅନୁଯାୟୀ, ୨୦୨୬ ଅକ୍ଟୋବରରେ ପ୍ରଥମ ବ୍ୟାଚ୍ର ଅଗ୍ନିବୀରମାନଙ୍କର ଚାରି ବର୍ଷର କାର୍ଯ୍ୟକାଳ ଶେଷ ହେବାକୁ ଥିବାରୁ ସଶସ୍ତ୍ର ବାହିନୀ ଅଗ୍ନିପଥ ନିଯୁକ୍ତି ଯୋଜନାର ସମୀକ୍ଷା କରୁଛି।

ବର୍ତ୍ତମାନର ନୀତି ଅନୁଯାୟୀ, ମେଧା ଓ ସାଙ୍ଗଠନିକ ଆବଶ୍ୟକତା ଆଧାରରେ କେବଳ ୨୫ ପ୍ରତିଶତ ଅଗ୍ନିବୀରଙ୍କୁ ସ୍ଥାୟୀ ଭାବେ ସେନା, ନୌସେନା ଏବଂ ବାୟୁସେନାରେ ସାମିଲ କରାଯାଉଛି। ଅବଶିଷ୍ଟ ୭୫ ପ୍ରତିଶତ ଅଗ୍ନିବୀରଙ୍କୁ ସେବା ଶେଷ ପରେ ପ୍ରାୟ ୧୨ ଲକ୍ଷ ଟଙ୍କାରସେବା ନିଧିପ୍ୟାକେଜ୍ ପ୍ରଦାନ କରାଯାଉଛି।

ରିପୋର୍ଟ ଅନୁସାରେ, ତିନୋଟି ସେନାବାହିନୀ ସ୍ଥାୟୀ ନିଯୁକ୍ତି କୋଟା ବୃଦ୍ଧି ପାଇଁ ପ୍ରସ୍ତାବ ଦେଇଛନ୍ତି। ଭାରତୀୟ ନୌସେନା ପ୍ରାୟ ୭୫ ପ୍ରତିଶତ ଅଗ୍ନିବୀରଙ୍କୁ ସ୍ଥାୟୀ କରିବାକୁ ପ୍ରସ୍ତାବ ରଖିଥିବାବେଳେ, ଭାରତୀୟ ସେନା ଓ ବାୟୁସେନା ବର୍ତ୍ତମାନର ୨୫ ପ୍ରତିଶତରୁ ବଢ଼ାଇ ପ୍ରାୟ ୫୦ ପ୍ରତିଶତ କରିବାକୁ ଚାହୁଁଥିବା ସୂଚନା ମିଳିଛି।

୨୦୨୩ ମସିହାରେ ପ୍ରଶିକ୍ଷଣ ଆରମ୍ଭ କରିଥିବା ପ୍ରଥମ ବ୍ୟାଚ୍ର ଅଗ୍ନିବୀରମାନେ ଚଳିତ ବର୍ଷ ଶେଷ ସୁଦ୍ଧା ଚାରି ବର୍ଷର ସେବା ସମାପ୍ତ କରିବେ। ବର୍ତ୍ତମାନର ନିୟମ ଅନୁଯାୟୀ ପ୍ରଥମେ ସମସ୍ତଙ୍କୁ ସେବାରୁ ଅବ୍ୟାହତି ଦିଆଯିବ। ପରେ ଯେଉଁମାନେ ଇଚ୍ଛୁକ ଏବଂ ମେଧା ତାଲିକାରେ ସ୍ଥାନ ପାଇବେ, ସେମାନଙ୍କୁ ସ୍ଥାୟୀ ସୈନିକ ଭାବେ ପୁନଃ ନିଯୁକ୍ତ କରାଯିବ।

ପ୍ରତିରକ୍ଷା ବାହିନୀର ମତରେ, ଚାରି ବର୍ଷ ଧରି କଠୋର ପ୍ରଶିକ୍ଷଣ, ଅପରେସନାଲ୍ ଅଭିଜ୍ଞତା ଓ ଆଧୁନିକ ଅସ୍ତ୍ରଶସ୍ତ୍ର ପରିଚାଳନାରେ ଦକ୍ଷତା ହାସଲ କରିଥିବା ଅଗ୍ନିବୀରଙ୍କୁ ଅଧିକ ସଂଖ୍ୟାରେ ରଖିବା ଆବଶ୍ୟକ ବୋଲି ମନେ କରାଯାଉଛି।

ତେବେ ଏହି ପ୍ରସ୍ତାବ ଏପର୍ଯ୍ୟନ୍ତ ବିଚାରାଧୀନ ରହିଛି। କେନ୍ଦ୍ର ସରକାର କିମ୍ବା ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୌଣସି ସରକାରୀ ପୁଷ୍ଟି କରାଯାଇନଥିବାରୁ ବର୍ତ୍ତମାନ ପାଇଁ ୨୫ ପ୍ରତିଶତ ସ୍ଥାୟୀ ନିଯୁକ୍ତି ନୀତି ବଳବତ୍ତର ରହିଛି।