ପଞ୍ଜାବର ଫିରୋଜପୁର ସେକ୍ଟରସ୍ଥିତ ଭାରତ-ପାକିସ୍ତାନ ସୀମାରେ ଡ୍ୟୁଟି କରୁଥିବା ବିହାରର ୩୦ ବର୍ଷୀୟ ବିଏସଏଫ୍ ଯବାନ ଚନ୍ଦନ ସିଂହଙ୍କର ବିଦ୍ୟୁତ୍ ଆଘାତ ଲାଗି ମୃତ୍ୟୁ ଘଟିଛି। ଏହି ଘଟଣା ପରେ ତାଙ୍କ ପୈତୃକ ଗାଁରେ ଶୋକର ଛାୟା ଖେଳିଯାଇଛି।

ଘଟଣାକୁ କେବଳ ଏକ ଦୁର୍ଘଟଣା ବୋଲି ମାନିବାକୁ ନାରାଜ ହୋଇଛନ୍ତି ଚନ୍ଦନ ସିଂହଙ୍କ ପରିବାର। ତାଙ୍କ ସ୍ତ୍ରୀ ଅଞ୍ଜୁ ଦେବୀ ଅଭିଯୋଗ କରିଛନ୍ତି ଯେ, ଜଣେ ବରିଷ୍ଠ ଅଧିକାରୀ ଦୀର୍ଘଦିନ ଧରି ତାଙ୍କ ସ୍ୱାମୀଙ୍କୁ ମାନସିକ ଓ ଶାରୀରିକ ଭାବେ ନିର୍ଯାତନା ଦେଉଥିଲେ। ଚନ୍ଦନ ସିଂହ ଏହି ବିଷୟରେ ପୂର୍ବରୁ ଫୋନ୍‌ରେ ପରିବାରକୁ ଜଣାଇଥିବା ସହ ଚାକିରି ଛାଡ଼ିବାକୁ ମଧ୍ୟ ଚିନ୍ତା କରୁଥିଲେ ବୋଲି ସେ କହିଛନ୍ତି।

ଏହାକୁ ଦୃଷ୍ଟିରେ ରଖି ପରିବାର ପକ୍ଷରୁ ଘଟଣାର ନିରପେକ୍ଷ ଓ ସ୍ୱତନ୍ତ୍ର ତଦନ୍ତ ଦାବି କରାଯାଇଛି। ପରିବାରର ଅଭିଯୋଗ ହେଉଛି, ଘଟଣା ପଛରେ କେବଳ ଦୁର୍ଘଟଣା ନୁହେଁ, ଅନ୍ୟ କାରଣ ମଧ୍ୟ ଥାଇପାରେ।

ବିଏସଏଫ୍ ପକ୍ଷରୁ ମିଳିଥିବା ପ୍ରାଥମିକ ସୂଚନା ଅନୁଯାୟୀ, ବୁଧବାର ରାତିରେ ସୋର୍ଟ ସର୍କିଟ୍‌ ଯୋଗୁଁ ବିଦ୍ୟୁତ୍ ଆଘାତ ଲାଗି ଚନ୍ଦନ ସିଂହଙ୍କର ମୃତ୍ୟୁ ଘଟିଛି। ସେ ବିଏସଏଫ୍‌ରେ ଜେନେରେଟର ଅପରେଟର ଭାବେ କାର୍ଯ୍ୟରତ ଥିଲେ।

ଶବ ବ୍ୟବଚ୍ଛେଦ ଓ ଅନ୍ୟାନ୍ୟ ସରକାରୀ ପ୍ରକ୍ରିୟା ଶେଷ ହେବା ପରେ ମୃତଦେହକୁ ବିହାରର ମୁଙ୍ଗେର ଜିଲ୍ଲା ଶାମପୁର ଥାନା ଅନ୍ତର୍ଗତ ଜବାୟତ ଗ୍ରାମକୁ ପଠାଯିବ। ସେଠାରେ ପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କର ଶେଷକୃତ୍ୟ ସମ୍ପନ୍ନ ହେବ।

ଘଟଣାର ପ୍ରକୃତ କାରଣ ସମ୍ପର୍କରେ ଅଧିକାରୀମାନଙ୍କ ତଦନ୍ତ ଜାରି ରହିଛି।