ଭୋଟର ତାଲିକାର ସ୍ପେଶାଲ୍ ଇଣ୍ଟେନ୍ସିଭ୍ ରିଭିଜନ୍ (SIR) ପ୍ରକ୍ରିୟାକୁ ନେଇ ବମ୍ବେ ହାଇକୋର୍ଟର ଗୋଆ ବେଞ୍ଚ ନିର୍ବାଚନ ଆୟୋଗଙ୍କ ଭୂମିକା ଉପରେ କଡ଼ା ପ୍ରଶ୍ନ ଉଠାଇଛନ୍ତି। ଜଷ୍ଟିସ୍ ବାଲ୍ମିକୀ ମେନେଜେସ୍ ଓ ଜଷ୍ଟିସ୍ ଅମିତ ଜାମସାଣ୍ଡେକରଙ୍କ ଖଣ୍ଡପୀଠ ଗୋଆର ସାନ୍ତା କ୍ରୁଜ୍ ନିର୍ବାଚନମଣ୍ଡଳୀର ଏକ ପରିବାରର ୬ ଜଣଙ୍କ ନାମ ଭୋଟର ତାଲିକାରୁ ହଟିଯିବା ମାମଲାର ଶୁଣାଣି କରୁଥିଲେ।

ପରିବାରଟି ଠିକଣା ପରିବର୍ତ୍ତନ ସମ୍ପର୍କରେ Form 8 ଦାଖଲ କରିଥିଲା। କିନ୍ତୁ SIRର enumeration ପର୍ଯ୍ୟାୟରେ ସିଷ୍ଟମ Form 8କୁ ପ୍ରୋସେସ୍ କରିବାକୁ ଅନୁମତି ଦେଇନଥିବା ନିର୍ବାଚନ ଆୟୋଗ ପକ୍ଷରୁ କୋର୍ଟକୁ କୁହାଯାଇଥିଲା। ପରେ ପରିବାରକୁ ନୂଆ ଭୋଟର ଭାବେ ନାମ ଯୋଡ଼ିବା ପାଇଁ Form 6 ଦାଖଲ କରିବାକୁ କୁହାଯାଇଥିଲା।

ଏହାକୁ ନେଇ ଖଣ୍ଡପୀଠ ପ୍ରଶ୍ନ କରିଥିଲେ ଯେ, Form 8 ମାଧ୍ୟମରେ ଠିକଣା ପରିବର୍ତ୍ତନର ବ୍ୟବସ୍ଥା ଥିବା ସତ୍ତ୍ୱେ ସଫ୍ଟଓ୍ଵେର ଏହାକୁ ପ୍ରୋସେସ୍ କରିପାରୁନାହିଁ ବୋଲି ଭୋଟରଙ୍କୁ Form 6 ଦାଖଲ କରିବାକୁ କାହିଁକି କୁହାଯିବ? କୋର୍ଟ କହିଥିଲେ, ପ୍ରଯୁକ୍ତି ବା ସଫ୍ଟଓ୍ଵେର ଆଇନର ବିକଳ୍ପ ହୋଇପାରିବ ନାହିଁ।

ଶୁଣାଣି ବିନା ଭୋଟରଙ୍କ ନାମ ହଟାଇବା ନେଇ ପ୍ରଶ୍ନ

ଖଣ୍ଡପୀଠ ପ୍ରଶ୍ନ କରିଥିଲେ ଯେ, କେଉଁ ଆଇନ ଅନୁସାରେ ଜଣେ ଭୋଟରଙ୍କୁ ଶୁଣାଣିର ସୁଯୋଗ ନଦେଇ ତାଙ୍କ ନାମ ଭୋଟର ତାଲିକାରୁ ହଟାଯାଇପାରିବ। କୋର୍ଟଙ୍କ ମତରେ, ନାମ ହଟାଇବା ପୂର୍ବରୁ ସମ୍ପୃକ୍ତ ଭୋଟରଙ୍କୁ ନିଜ ପକ୍ଷ ରଖିବାର ସୁଯୋଗ ମିଳିବା ଆବଶ୍ୟକ।

ନିର୍ବାଚନ ଆୟୋଗ ପକ୍ଷରୁ ଆଇନଜୀବୀ ଗୌରିଶ ଅଗ୍ନି କହିଥିଲେ ଯେ SIR ସମୟରେ ସିଷ୍ଟମ Form 8 ପ୍ରୋସେସ୍ କରିବାକୁ ଅନୁମତି ଦେଉନଥିଲା। ଏହାର ଜବାବରେ କୋର୍ଟ କହିଥିଲେ ଯେ EROଙ୍କ ହାତରେ ସଫ୍ଟଓ୍ଵେର ଉପରେ ଆବଶ୍ୟକ ନିୟନ୍ତ୍ରଣ ରହିବା ଦରକାର, ଯାହାଦ୍ୱାରା ଆଇନ ଅନୁଯାୟୀ ନିଷ୍ପତ୍ତି ନିଆଯାଇପାରିବ।

SIR ଆଇନକୁ ବଦଳାଇପାରିବ ନାହିଁ

କୋର୍ଟ କହିଛନ୍ତି ଯେ SIR ଚାଲିଥିବା ସମୟରେ ମଧ୍ୟ ଲାଗୁଥିବା ଆଇନ ଓ ନିୟମକୁ ପାଳନ କରିବାକୁ ପଡ଼ିବ। ନିର୍ବାଚନ ପ୍ରକ୍ରିୟାରେ ସଫ୍ଟଓ୍ଵେରର ଡିଜାଇନ୍ କିମ୍ବା କାର୍ଯ୍ୟପ୍ରଣାଳୀ ଯେପରି ଆଇନଗତ ଅଧିକାରକୁ ସୀମିତ ନକରେ, ତାହା ନିଶ୍ଚିତ କରିବା ଆବଶ୍ୟକ ବୋଲି ଖଣ୍ଡପୀଠ ଉଲ୍ଲେଖ କରିଛନ୍ତି।

କୋର୍ଟ ଆହୁରି କହିଛନ୍ତି ଯେ ନିର୍ବାଚନ ବ୍ୟବସ୍ଥା ଭୋଟରଙ୍କ ସୁବିଧା ପାଇଁ କାମ କରିବା ଦରକାର ଏବଂ ଜଣେ ବୈଧ ଭୋଟର ତାଲିକାରୁ ବାଦ୍ ପଡ଼ିନଯାଆନ୍ତି ବୋଲି ନିର୍ବାଚନ ଆୟୋଗ ନିଶ୍ଚିତ କରିବା ଦରକାର।

ଏହି ମାମଲାରେ ଉଠିଥିବା ପ୍ରଶ୍ନ କେବଳ ସମ୍ପୃକ୍ତ ୬ ଜଣ ଭୋଟରଙ୍କ ନୁହେଁ ବୋଲି କୋର୍ଟ ଚିନ୍ତା ପ୍ରକାଶ କରିଥିଲେ। ଏଭଳି ସମସ୍ୟା ଅନ୍ୟ ଭୋଟରଙ୍କ କ୍ଷେତ୍ରରେ ମଧ୍ୟ ହୋଇଥାଇପାରେ କି ନାହିଁ, ସେନେଇ ମଧ୍ୟ ଖଣ୍ଡପୀଠ ପ୍ରଶ୍ନ ଉଠାଇଛନ୍ତି।