ଆର୍ଟିଫିସିଆଲ୍ ଇଣ୍ଟେଲିଜେନ୍ସ ବା AIକୁ ନେଇ ଆମେରିକାରେ ଏକ ନୂଆ ନାମକରଣ ଆରମ୍ଭ ହୋଇଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ AI ପାଇଁ ଏଣିକି ‘Super Intelligence’ ବା ‘SI’ ଶବ୍ଦ ବ୍ୟବହାର କରିବାକୁ କହିଛନ୍ତି।

ସେପ୍ଟେମ୍ବର ୨୨ରେ ଜାତିସଂଘର ୮୧ତମ ସାଧାରଣ ସଭାରେ ଭାଷଣ ଦେବା ସମୟରେ ଟ୍ରମ୍ପ କହିଥିଲେ ଯେ ‘Artificial’ ଶବ୍ଦଟି ପ୍ରଯୁକ୍ତିକୁ ଯେପରି ନକଲି କିମ୍ବା କୃତ୍ରିମ ଭାବେ ଦର୍ଶାଏ। ତାଙ୍କ ମତରେ ‘Super Intelligence’ ଶବ୍ଦଟି ଏହି ପ୍ରଯୁକ୍ତିର କ୍ଷମତାକୁ ଅଧିକ ଭଲ ଭାବେ ପ୍ରକାଶ କରେ।

ଟ୍ରମ୍ପଙ୍କ ଘୋଷଣା ପରେ ଆମେରିକାର ବିଦେଶ ବିଭାଗର International Organization Affairs ବ୍ୟୁରୋ ତାଙ୍କ କର୍ମଚାରୀଙ୍କୁ ସରକାରୀ ଦସ୍ତାବିଜ, ମତାମତ ଓ ପ୍ରେସ୍ ସାମଗ୍ରୀରେ ‘Artificial Intelligence’ ବଦଳରେ ‘Super Intelligence’ ବା ‘SI’ ବ୍ୟବହାର କରିବାକୁ ନିର୍ଦ୍ଦେଶ ଦେଇଥିଲା। ତେବେ ଏହି ନିର୍ଦ୍ଦେଶ ସେତେବେଳେ ବିଦେଶ ବିଭାଗର ସମସ୍ତ ଶାଖା ପାଇଁ ଲାଗୁ ହୋଇଛି କି ନାହିଁ, ସେଥିରେ ସ୍ପଷ୍ଟତା ନଥିଲା।

ତେବେ ସେପ୍ଟେମ୍ବର ୨୯ରେ ହ୍ୱାଇଟ୍ ହାଉସ୍ ପକ୍ଷରୁ ପ୍ରକାଶିତ ତଥ୍ୟରେ ଟ୍ରମ୍ପ ପ୍ରଶାସନର ‘Super Intelligence’ ଶବ୍ଦ ବ୍ୟବହାର ଆହୁରି ସ୍ପଷ୍ଟ ହୋଇଛି। ଏହାର ଅର୍ଥ ହେଉଛି, ଏହା କେବଳ ଟ୍ରମ୍ପଙ୍କ ଭାଷଣରେ ଥିବା ଏକ ଶବ୍ଦ ନୁହେଁ; ଆମେରିକୀୟ ସରକାରୀ ପରିପ୍ରେକ୍ଷିତରେ SI ଶବ୍ଦର ବ୍ୟବହାରକୁ ପ୍ରଶାସନ ଆଗକୁ ବଢ଼ାଉଛି।

ଏହି ପରିବର୍ତ୍ତନର ପଛରେ ଆମେରିକା-ଚୀନ୍‌ ମଧ୍ୟରେ AI ପ୍ରଯୁକ୍ତିକୁ ନେଇ ଚାଲିଥିବା ପ୍ରତିଯୋଗିତା ମଧ୍ୟ ଏକ ବଡ଼ ପ୍ରସଙ୍ଗ। ଟ୍ରମ୍ପ କହିଛନ୍ତି ଯେ ଆମେରିକା ଏହି ପ୍ରଯୁକ୍ତିରେ ଚୀନ୍‌ଠାରୁ ଆଗରେ ରହିବାକୁ ଚାହୁଁଛି ଏବଂ ଅତ୍ୟଧିକ ନିୟନ୍ତ୍ରଣ ଦ୍ୱାରା ବିକାଶ ଧୀର ହେବାକୁ ଚାହୁଁନାହିଁ। ରଏଟର୍ସ ଅନୁସାରେ, ଟ୍ରମ୍ପ ତଥାପି କହିଛନ୍ତି ଯେ ଆବଶ୍ୟକ ହେଲେ ଆମେରିକାର ନ୍ୟାୟ ବିଭାଗ AI କ୍ଷେତ୍ରକୁ ନଜରରେ ରଖିପାରିବ।

ଏହି ମଧ୍ୟରେ ଟ୍ରମ୍ପ ଓ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ଆଲୋଚନାରେ AI/SI ମଧ୍ୟ ପ୍ରମୁଖ ବିଷୟ ହୋଇଛି। ହ୍ୱାଇଟ୍ ହାଉସ୍‌ର ସେପ୍ଟେମ୍ବର ୨୫ର ଫ୍ୟାକ୍ଟସିଟ୍‌ ଅନୁସାରେ, ଆମେରିକା ଓ ଚୀନ୍ ଏହି ପ୍ରଯୁକ୍ତିକୁ ‘Super Intelligence’ ଭାବେ ଉଲ୍ଲେଖ କରିବାକୁ ସହମତ ହୋଇଛନ୍ତି। ଦୁଇ ଦେଶ U.S.-China Super Intelligence (SI) Dialogue ଗଠନ କରିବାକୁ ମଧ୍ୟ ସହମତ ହୋଇଛନ୍ତି, ଯେଉଁଥିରେ SIର ବିପଦ ଓ ସମ୍ଭାବନା ଉପରେ ଆଲୋଚନା ହେବ। ପରବର୍ତ୍ତୀ ଆଲୋଚନା ନଭେମ୍ବର ୨୦୨୬ ସୁଦ୍ଧା ହେବାର କଥା ରହିଛି।

ଏହା ସହିତ ଦୁଇ ଦେଶ SI ସମ୍ପର୍କିତ ଗୁରୁତର ଘଟଣା ପାଇଁ ଏକ ଦ୍ୱିପାକ୍ଷିକ ଯୋଗାଯୋଗ ଚ୍ୟାନେଲ୍ ଗଠନ କରିବାକୁ ମଧ୍ୟ ସହମତ ହୋଇଛନ୍ତି। ଏଥିରୁ AI/SIର ଦ୍ରୁତ ବିକାଶ ସହିତ ସୁରକ୍ଷା, ଝୁମ୍ପ ଓ ଦାୟିତ୍ୱବୋଧ ନେଇ ଆମେରିକା-ଚୀନ୍ ଆଲୋଚନା ଆଗକୁ ବଢ଼ିବାର ସଙ୍କେତ ମିଳୁଛି।