ମୁମ୍ବାଇ: ଜନ୍ମଦିନର ଖୁସି କ୍ଷଣକ ମଧ୍ୟରେ ଶୋକରେ ପରିଣତ ହୋଇଛି। ମହାରାଷ୍ଟ୍ରର ନିର୍ମାଣାଧୀନ ମୁମ୍ବାଇ-ଦିଲ୍ଲୀ ଏକ୍ସପ୍ରେସୱେର ବଦଲାପୁର ନିକଟରେ ଘଟିଥିବା ଏକ ଭୟଙ୍କର ସଡ଼କ ଦୁର୍ଘଟଣାରେ ଦୁଇ ଯୁବକ-ଯୁବତୀଙ୍କ ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି।

ସୂଚନା ଅନୁସାରେ, ଏକ BMW କାର ଅତ୍ୟଧିକ ବେଗରେ ଯାଉଥିବା ସମୟରେ ନିୟନ୍ତ୍ରଣ ହରାଇ ଡିଭାଇଡରକୁ ଧକ୍କା ଦେଇଥିଲା। ଧକ୍କା ପରେ କାରଟି ଏକାଧିକ ଥର ଓଲଟି ପଡ଼ିଥିଲା। ଦୁର୍ଘଟଣାର ତୀବ୍ରତା ଏତେ ଅଧିକ ଥିଲା ଯେ ଗାଡ଼ିଟି ସମ୍ପୂର୍ଣ୍ଣ ଭାବେ କ୍ଷତିଗ୍ରସ୍ତ ହୋଇଯାଇଥିଲା ଏବଂ ଏହାର ଇଞ୍ଜିନ ପ୍ରାୟ ୩୦ ମିଟର ଦୂରକୁ ଛିଟିକି ପଡ଼ିଥିଲା।

ଏହି ଦୁର୍ଘଟଣାରେ ୨୬ ବର୍ଷୀୟ ଯୋଗେଶ ନେଗି ଓ ୨୪ ବର୍ଷୀୟ ରେବେକା ଜେକବଙ୍କ ମୃତ୍ୟୁ ଘଟିଛି। BMW କାରର ମାଲିକ ଓ ଡ୍ରାଇଭର ଅଙ୍ଗଦ ଗୁରୁତର ଆହତ ହୋଇ ହସ୍ପିଟାଲରେ ଚିକିତ୍ସାଧୀନ ଅଛନ୍ତି।

ପୁଲିସ ସୂଚନା ଅନୁସାରେ, ତିନିଜଣ ମିଶି ଯୋଗେଶଙ୍କ ଜନ୍ମଦିନ ପାଳନ କରିବା ପରେ ଏକ୍ସପ୍ରେସୱେ ଆଡକୁ ଯାଇଥିଲେ। ନିର୍ମାଣାଧୀନ ରାସ୍ତାରେ ଯାନବାହନ ପ୍ରବେଶ ରୋକିବା ପାଇଁ ବିଭିନ୍ନ ସ୍ଥାନରେ ସିମେଣ୍ଟ ବ୍ୟାରିକେଡ ଲଗାଯାଇଥିଲା। ତେବେ ଅତ୍ୟଧିକ ବେଗରେ ଗାଡ଼ି ଚଳାଉଥିବା ସମୟରେ ଡ୍ରାଇଭର ଏକ ବ୍ୟାରିକେଡକୁ ଏଡ଼ାଇବାକୁ ଚେଷ୍ଟା କରି ଗାଡ଼ି ଉପରୁ ନିୟନ୍ତ୍ରଣ ହରାଇଥିଲେ ଏବଂ ଡିଭାଇଡରକୁ ଧକ୍କା ଦେଇଥିବା ପୁଲିସ ସନ୍ଦେହ କରୁଛି।

ସୋସିଆଲ ମିଡିଆରେ ଭାଇରାଲ ହୋଇଥିବା ଏକ ପୋଷ୍ଟ ଅନୁସାରେ, ଦୁର୍ଘଟଣା ପୂର୍ବରୁ BMW କାରଟି ଘଣ୍ଟାପ୍ରତି ପ୍ରାୟ ୨୫୧ କିଲୋମିଟର ବେଗରେ ଚାଲୁଥିଲା। ତେବେ ଏହି ଦାବିର ସତ୍ୟତାକୁ ପୁଲିସ ଯାଞ୍ଚ କରୁଛି।

ପୁଲିସ ଘଟଣାର ତଦନ୍ତ ଜାରି ରଖିଥିବା ବେଳେ ଅତ୍ୟଧିକ ବେଗରେ ଗାଡ଼ି ଚାଳନାର ବିପଦକୁ ନେଇ ପୁଣିଥରେ ଚର୍ଚ୍ଚା ଆରମ୍ଭ ହୋଇଛି।