ନୂଆଦିଲ୍ଲୀ: ବିଜେପିର ଜାତୀୟ ସଂଗଠନରେ ବଡ଼ ଧରଣର ପରିବର୍ତ୍ତନ ହୋଇଛି। ଦଳର ଜାତୀୟ ସଭାପତି ନିତିନ ନବୀନ ସୋମବାର ନିଜର ନୂଆ ଟିମ୍‌ ଘୋଷଣା କରିଛନ୍ତି। ଏହି ନୂଆ ଟିମ୍‌ରେ ଅନେକ ବରିଷ୍ଠ ନେତାଙ୍କୁ ପୁଣି ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିଥିବା ବେଳେ କିଛି ନୂଆ ମୁହଁଙ୍କୁ ମଧ୍ୟ ସାମିଲ କରାଯାଇଛି।

🔴 ରାମ ମାଧବ, ସ୍ମୃତି ଇରାନୀଙ୍କୁ ବଡ଼ ଦାୟିତ୍ୱ

ନୂଆ ତାଲିକାରେ ଆରଏସଏସ୍‌ର ଜାତୀୟ କାର୍ଯ୍ୟକାରିଣୀ ସଦସ୍ୟ ରାମ ମାଧବଙ୍କୁ ଜାତୀୟ ଉପସଭାପତି ଦାୟିତ୍ୱ ଦିଆଯାଇଛି। ସେହିପରି ପୂର୍ବତନ କେନ୍ଦ୍ରମନ୍ତ୍ରୀ ସ୍ମୃତି ଇରାନୀଙ୍କୁ ଜାତୀୟ ସାଧାରଣ ସମ୍ପାଦକ କରାଯାଇଛି।

ତ୍ରିପୁରାର ପୂର୍ବତନ ମୁଖ୍ୟମନ୍ତ୍ରୀ ବିପ୍ଳବ କୁମାର ଦେବ ମଧ୍ୟ ଜାତୀୟ ସାଧାରଣ ସମ୍ପାଦକ ହୋଇଛନ୍ତି। ଉତ୍ତରାଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ତୀରଥ ସିଂହ ରାୱତଙ୍କୁ ଜାତୀୟ ଉପସଭାପତି କରାଯାଇଛି।

💰 ପୀୟୁଷ ଗୋୟଲଙ୍କୁ ଜାତୀୟ କୋଷାଧ୍ୟକ୍ଷ ଦାୟିତ୍ୱ

ବରିଷ୍ଠ ନେତା ତଥା କେନ୍ଦ୍ରମନ୍ତ୍ରୀ ପୀୟୁଷ ଗୋୟଲଙ୍କୁ ଜାତୀୟ କୋଷାଧ୍ୟକ୍ଷ ଭାବେ ନିଯୁକ୍ତ କରାଯାଇଛି।

ସେହିପରି ବିଏଲ୍‌ ସନ୍ତୋଷ ଜାତୀୟ ସାଧାରଣ ସମ୍ପାଦକ (ସଂଗଠନ) ପଦରେ ରହିଛନ୍ତି। ଶିବପ୍ରକାଶ ଓ ସୌଦାନ ସିଂହଙ୍କୁ ଜାତୀୟ ଯୁଗ୍ମ ସାଧାରଣ ସମ୍ପାଦକ (ସଂଗଠନ) ଦାୟିତ୍ୱ ମିଳିଛି।

🟠 ବୈଜୟନ୍ତ ପଣ୍ଡାଙ୍କ ପଦ ବଜାୟ

ଓଡ଼ିଶାର ବରିଷ୍ଠ ବିଜେପି ନେତା ବୈଜୟନ୍ତ ପଣ୍ଡା ଜାତୀୟ ଉପସଭାପତି ପଦରେ ନିଜ ସ୍ଥାନ ବଜାୟ ରଖିଛନ୍ତି।

ତାଙ୍କ ସହ ବସୁନ୍ଧରା ରାଜେ ସିନ୍ଧିଆ, ରେଖା ବର୍ମା ଓ ତାରିକ୍‌ ମନସୁରଙ୍କ ସମେତ ଅନ୍ୟ କିଛି ନେତା ମଧ୍ୟ ଜାତୀୟ ଉପସଭାପତି ପଦରେ ରହିଛନ୍ତି।

୧୩ ଜଣ ଜାତୀୟ ଉପସଭାପତିଙ୍କ ମଧ୍ୟରୁ ୫ ଜଣ ମହିଳା ରହିଛନ୍ତି। ଜାତୀୟ ସାଧାରଣ ସମ୍ପାଦକଙ୍କ ମଧ୍ୟରେ ସ୍ମୃତି ଇରାନୀ ଏକମାତ୍ର ମହିଳା ଅଟନ୍ତି।

📱 ନୂଆ ସୋସିଆଲ ମିଡିଆ ଟିମ୍‌, ତାଲିକାରେ ନାହାନ୍ତି ଅମିତ ମାଲବୀୟ

ବିଜେପିର ଡିଜିଟାଲ ଓ ସୋସିଆଲ ମିଡିଆ କାର୍ଯ୍ୟକଳାପର ଚର୍ଚ୍ଚିତ ମୁହଁ ଅମିତ ମାଲବୀୟଙ୍କ ନାଁ ନୂଆ ଜାତୀୟ ପଦାଧିକାରୀ ତାଲିକାରେ ନାହିଁ।

ଏହା ସହିତ ଦଳ ପକ୍ଷରୁ ନୂଆ ସୋସିଆଲ ମିଡିଆ ଟିମ୍‌ ଘୋଷଣା କରାଯାଇଛି। ଦୀପକ ମହାସ୍କେଙ୍କୁ ଜାତୀୟ ସୋସିଆଲ ମିଡିଆ କନଭେନର ଏବଂ ପ୍ରୀତି ଗାନ୍ଧୀ, ଶିବାନନ୍ଦ ଦ୍ୱିବେଦୀ, ଆଲୋକ ଭଟ୍ଟ ଓ ଅରୁଣ ଯାଦବଙ୍କୁ କୋ-କନଭେନର କରାଯାଇଛି।

🇮🇳 ନିତିନ ନବୀନଙ୍କ ନୂଆ ଟିମ୍‌କୁ ମୋଦୀଙ୍କ ଶୁଭେଚ୍ଛା

ନୂଆ ପଦାଧିକାରୀମାନଙ୍କୁ ଶୁଭେଚ୍ଛା ଜଣାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟିମ୍‌ର ଅଭିଜ୍ଞତା, ଉର୍ଜା ଓ ତୃଣମୂଳସ୍ତରର ସମ୍ପର୍କକୁ ପ୍ରଶଂସା କରିଛନ୍ତି। ନୂଆ ଟିମ୍‌ ଦଳକୁ ଆହୁରି ମଜବୁତ କରିବା ସହ ଜନସେବା ଓ ‘ବିକଶିତ ଭାରତ’ର ଲକ୍ଷ୍ୟ ଦିଗରେ କାମ କରିବ ବୋଲି ସେ ଆଶା ପ୍ରକାଶ କରିଛନ୍ତି।