ବିଜୁ ଜନତା ଦଳର ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟଙ୍କ ରାଜନୈତିକ ଭବିଷ୍ୟତକୁ ନେଇ ସୋମବାର ରାଜନୈତିକ ମହଳରେ ଚର୍ଚ୍ଚା ଜୋରଦାର ହୋଇଛି। ସେ ବିଜେଡି ଛାଡ଼ି ଭାରତୀୟ ଜନତା ପାର୍ଟିରେ ଯୋଗ ଦେଇପାରନ୍ତି ବୋଲି ଖବର ପ୍ରଚାର ପାଇବା ପରେ ରାଜ୍ୟ ରାଜନୀତିରେ ଚର୍ଚ୍ଚା ବଢ଼ିଛି।

ସୂତ୍ର ଅନୁସାରେ, ଗତ କିଛି ମାସ ଧରି ଦଳର କିଛି ଘଟଣାକୁ ନେଇ ସାମନ୍ତରାୟ ଅସନ୍ତୁଷ୍ଟ ଥିବା କୁହାଯାଉଛି। ଏହି ପରିପ୍ରେକ୍ଷୀରେ ସେ ବିଜେଡିରୁ ଇସ୍ତଫା ଦେଇ ଆଜି କିମ୍ବା ଆସନ୍ତାକାଲି ବିଜେପିରେ ଔପଚାରିକ ଭାବେ ଯୋଗ ଦେଇପାରନ୍ତି ବୋଲି ରାଜନୈତିକ ମହଳରେ ଆଲୋଚନା ଚାଲିଛି।

ଏହି ଚର୍ଚ୍ଚାକୁ ଆହୁରି ବଳ ମିଳିଥିଲା ପୂର୍ବତନ ବିଜେଡି ନେତ୍ରୀ ଶ୍ରୀମୟୀ ମିଶ୍ରଙ୍କ ସୋସିଆଲ ମାଧ୍ୟମ ପୋଷ୍ଟ ପରେ। ସେ ଗୋଟିଏ ପୋଷ୍ଟରେ ଲେଖିଥିଲେ, “ଯେପର୍ଯ୍ୟନ୍ତ ନକଲି ଲୋକ ରହିବେ, ସେପର୍ଯ୍ୟନ୍ତ ଉଇକେଟ ପଡ଼ିଚାଲିବ।” ଏହାକୁ ନେଇ ବିଭିନ୍ନ ମହଳରେ ଅନେକ ଅର୍ଥ ବାହାର କରାଯାଉଛି।

ଏହି ପୋଷ୍ଟକୁ ଅନେକେ ପୂର୍ବତନ ପ୍ରଶାସକ ଭି.କେ. ପାଣ୍ଡିଆନଙ୍କୁ ପରୋକ୍ଷ ଭାବେ ଟାର୍ଗେଟ କରାଯାଇଥିବା ବୋଲି ବ୍ୟାଖ୍ୟା କରୁଛନ୍ତି।

ରାଜନୈତିକ ସୂତ୍ର ଅନୁସାରେ, ଯଦି ଦେବାଶିଷ ସାମନ୍ତରାୟ ବିଜେଡି ଛାଡ଼ନ୍ତି, ତେବେ ରାଜ୍ୟସଭାରେ ଦଳର ସଦସ୍ୟ ସଂଖ୍ୟା ପାଞ୍ଚକୁ କମିଯିବ। ସେ ବିଜେପିରେ ଯୋଗଦାନ ପରେ ଦଳର ସମର୍ଥନରେ ପୁନର୍ବାର ରାଜ୍ୟସଭାକୁ ଯାଇପାରନ୍ତି ବୋଲି ମଧ୍ୟ ଚର୍ଚ୍ଚା ହେଉଛି।

ତେବେ ଏପର୍ଯ୍ୟନ୍ତ ଦେବାଶିଷ ସାମନ୍ତରାୟ କିମ୍ବା ବିଜେପି ପକ୍ଷରୁ ଏନେଇ କୌଣସି ଔପଚାରିକ ସୂଚନା ଦିଆଯାଇନାହିଁ। ତାଙ୍କ ପ୍ରତିକ୍ରିୟା ପାଇଁ ଚେଷ୍ଟା କରାଯାଇଥିଲେ ମଧ୍ୟ ରିପୋର୍ଟ ଲେଖାଯିବା ସୁଦ୍ଧା କୌଣସି ଉତ୍ତର ମିଳିନଥିଲା।

ଏହି ସମୟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଦିଲ୍ଲୀ ଗସ୍ତକୁ ନେଇ ମଧ୍ୟ ରାଜନୈତିକ ଚର୍ଚ୍ଚା ଆହୁରି ତେଜ ହୋଇଛି।