ଭୁବନେଶ୍ୱରରେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଜଣେ ଇଞ୍ଜିନିୟରିଂ ଛାତ୍ର ନିଜ ଅପହରଣ ଘଟିଛି ବୋଲି ନକଲି ନାଟକ କରି ପରିବାରଠାରୁ ୧୩ ଲକ୍ଷ ଟଙ୍କା ଆଦାୟ କରିବାକୁ ଚେଷ୍ଟା କରିଥିବା ଘଟଣା ପୋଲିସ ତଦନ୍ତରେ ପ୍ରକାଶ ପାଇଛି।

ସୂଚନା ଅନୁସାରେ, ଛାତ୍ରଜଣକ ଇନ୍ଫୋଭ୍ୟାଲି ପୋଲିସ ସୀମା ଅନ୍ତର୍ଗତ ଏକ ପ୍ରାଇଭେଟ୍ ହଷ୍ଟେଲରେ ରହୁଥିଲେ। ସେ ତାଙ୍କ ବାପାଙ୍କୁ ଫୋନ୍ କରି କହିଥିଲେ ଯେ ତାଙ୍କୁ କିଛି ଅଜଣା ଲୋକ ଅପହରଣ କରିଛନ୍ତି ଏବଂ ମୁକ୍ତି ପାଇଁ ୧୩ ଲକ୍ଷ ଟଙ୍କା ଦାବି କରୁଛନ୍ତି। ଏହା ପରେ ତାଙ୍କ ବାପା ଇନ୍ଫୋଭ୍ୟାଲି ଥାନାରେ ଅଭିଯୋଗ କରିଥିଲେ।

ଅଭିଯୋଗ ମିଳିବା ପରେ ପୋଲିସ ତୁରନ୍ତ ଏକ ସ୍ପେଶାଲ୍ ଟିମ୍ ଗଠନ କରି ଛାତ୍ରଙ୍କ ଖୋଜଖବର ନେବା ଆରମ୍ଭ କରିଥିଲା। ପୋଲିସ କମିଶନର ସୁରେଶ ଦେବ ଦତ୍ତ ସିଂହ କହିଛନ୍ତି ଯେ ପ୍ରଥମେ ଏହା ଏକ ସତ୍ୟ ଅପହରଣ ମାମଲା ବୋଲି ଲାଗୁଥିଲା।

ତେବେ ତଦନ୍ତ ସମୟରେ ପୋଲିସ ମଦନପୁର ପଞ୍ଚାୟତ ଅଫିସ୍ ନିକଟରେ ଚଢ଼ାଉ କରି ଛାତ୍ରକୁ ସୁରକ୍ଷିତ ଅବସ୍ଥାରେ ଉଦ୍ଧାର କରିଥିଲା। ପରେ ପଚରାଉଚରାରେ ସେ ସ୍ୱୀକାର କରିଥିଲେ ଯେ ଅପହରଣ କଥା ସମ୍ପୂର୍ଣ୍ଣ ମିଥ୍ୟା ଥିଲା।

ପୋଲିସ ସୂଚନା ଅନୁଯାୟୀ, ଛାତ୍ରଜଣକ ନିଜର ଆଡମ୍ବରପୂର୍ଣ୍ଣ ଜୀବନଶୈଳୀ ପାଇଁ ୭ ଜଣ ସାଙ୍ଗଙ୍କଠାରୁ ମୋଟ ୧୩ ଲକ୍ଷ ଟଙ୍କା ଋଣ ନେଇଥିଲେ। ସେ କେବେ ମେଡିକାଲ୍ ଏମର୍ଜେନ୍ସି, କେବେ ପରୀକ୍ଷା ଫିସ୍ ଭଳି ମିଥ୍ୟା କାରଣ ଦେଖାଇ ପ୍ରତ୍ୟେକ ସାଙ୍ଗଙ୍କଠାରୁ ୧ ଲକ୍ଷରୁ ୭ ଲକ୍ଷ ଟଙ୍କା ପର୍ଯ୍ୟନ୍ତ ନେଇଥିଲେ।

ତେବେ ସେ ମାତ୍ର ୨-୩ ଲକ୍ଷ ଟଙ୍କା ଫେରାଇଥିବା ବେଳେ ଅବଶିଷ୍ଟ ଟଙ୍କା ପାଇଁ ସାଙ୍ଗମାନେ ଚାପ ସୃଷ୍ଟି କରିବାରୁ ସେ ଏହି ନକଲି ଅପହରଣ ଯୋଜନା ରଚିଥିଲେ।

ପୋଲିସ ଏହି ମାମଲାରେ ସ୍ପଷ୍ଟ କରିଛି ଯେ କୌଣସି ଅପହରଣ ଘଟିନାହିଁ। ଛାତ୍ରଙ୍କ ବିରୋଧରେ ଭ୍ରମ ସୃଷ୍ଟି କରିବା ଏବଂ ଟଙ୍କା ଆଦାୟ ଚେଷ୍ଟା କରିବା ଅଭିଯୋଗରେ ଆଇନଗତ କାର୍ଯ୍ୟାନୁଷ୍ଠାନ ଚାଲିଛି।