ଅପରାହ୍ଣ ୨ଟାରୁ ଲାଗୁ ହେବ କଟକଣା

କମିଶନରେଟ୍ ପୋଲିସର ସୂଚନା ଅନୁଯାୟୀ, ଅକ୍ଟୋବର ୨୨ରେ ଅପରାହ୍ଣ୨ଟାରୁ ଭସାଣି ଯାତ୍ରା ଶେଷ ହେବା ପର୍ଯ୍ୟନ୍ତଟ୍ରାଫିକ୍ କଟକଣା ଲାଗୁ ରହିବ। ଭୁବନେଶ୍ୱରର ଚାରିଟି ମୁଖ୍ୟ ଭସାଣି କମିଟି ନିର୍ଦ୍ଦିଷ୍ଟ ରୁଟ୍ରେ ଶୋଭାଯାତ୍ରା ନେବେ।

ଏହି ଚାରିଟି କମିଟି ହେଉଛି—ସହିଦନଗରର ଭୁବନେଶ୍ୱର ଭସାଣି ଉତ୍ସବ ସମିତି, ନୟାପଲ୍ଲୀର ରାଜଧାନୀ ମନ୍ଦିର ସୁରକ୍ଷା ଓ ଭସାଣି ସମିତି, ଚନ୍ଦ୍ରଶେଖରପୁରର ଉତ୍ତର ଭୁବନେଶ୍ୱର ଭସାଣି ସମିତି ଏବଂ ପୁରୁଣା ଭୁବନେଶ୍ୱରର ଓଲ୍ଡ ଟାଉନ୍ ଭସାଣି ସମିତି।

ସହିଦନଗର ଭସାଣି ଶୋଭାଯାତ୍ରା

ସହିଦନଗର ଅଞ୍ଚଳରୁ ବାହାରିବାକୁ ଥିବା ଭସାଣି ଶୋଭାଯାତ୍ରା ରାମମନ୍ଦିର ଛକ ଓ ମାଷ୍ଟରକ୍ୟାଣ୍ଟିନ୍ ଛକ ଦେଇ ଯିବ।

ଏହି ସମୟରେଜନପଥ ରୋଡ୍ରେ ଗାଡ଼ି ଚଳାଚଳ ଅନୁମତି ଦିଆଯିବ ନାହିଁ। ଯାନବାହନକୁ ସଚିବାଳୟ ମାର୍ଗ ଓ ସଂଲଗ୍ନ ବିକଳ୍ପ ରାସ୍ତା ଦେଇ ଡାଇଭର୍ଟ କରାଯିବ।

ସହିଦନଗର ଭସାଣି ଯାତ୍ରାରେ ପାଲାସୁଣି, ବମିଖାଲ, ଝାରପଡ଼ା, ସହିଦନଗର, କଟକ ରୋଡ୍ ଓ ଓଲ୍ଡ ଷ୍ଟେସନ୍ ବଜାର ସମେତ ଅନେକ ପୂଜା କମିଟି ସାମିଲ ହେବାର ସୂଚନା ମିଳିଛି।

ନୟାପଲ୍ଲୀ ରୁଟ୍ରେ ମଧ୍ୟ ଡାଇଭର୍ସନ୍

ନୟାପଲ୍ଲୀ ଭସାଣି ସମିତିର ଶୋଭାଯାତ୍ରା ସୋର କମ୍ପାନୀ ଛକ, ନୟାପଲ୍ଲୀ ଅଣ୍ଡରପାସ୍, ସିଆରପି ଛକ ଓ ଡିଏଭି ସ୍କୁଲ ଛକ ଦେଇ ଗୋପବନ୍ଧୁ ଛକ ଏବଂ ଶିରିପୁର ଛକ ଆଡ଼କୁ ଯିବ।

ସିଆରପି ଛକରୁ କଟକ ଆଡ଼କୁ ଯାଉଥିବା ଗାଡ଼ିଜୟଦେବ ବିହାର ଓ ଏକାମ୍ର ପାର୍କ ରୋଡ୍ ଦେଇ ଡାଇଭର୍ଟ ହେବ। ତେଣୁ ଏହି ଅଞ୍ଚଳ ଦେଇ ଯାତାୟାତ କରୁଥିବା ଲୋକେ ବିକଳ୍ପ ରୁଟ୍ ବ୍ୟବହାର କରିବାକୁ ପୋଲିସ ପରାମର୍ଶ ଦେଇଛି।

ଚନ୍ଦ୍ରଶେଖରପୁରରୁ ନାଲକୋ ଛକ ଯାଏଁ ଶୋଭାଯାତ୍ରା

ଚନ୍ଦ୍ରଶେଖରପୁର ଭସାଣି ସମିତିର ଶୋଭାଯାତ୍ରା ଦାମଣା ଛକରେ ଏକାଠି ହେବା ପରେ ନାଲକୋ ଛକ ଦେଇ ଆଗକୁ ବଢ଼ିବ।

ନନ୍ଦନକାନନ ଛକରୁ ଜୟଦେବ ବିହାର ଛକଆଡ଼କୁ ଯାଉଥିବା ଯାନବାହନ କିଟ୍ ଛକ କିମ୍ବା କଳାରାହାଙ୍ଗ ଛକ ଦେଇ ଯାଇପାରିବେ। ଏହି ରୁଟ୍ଗୁଡ଼ିକୁ ବିକଳ୍ପ ରାସ୍ତା ଭାବେ ବ୍ୟବହାର କରିବାକୁ କୁହାଯାଇଛି।

ଖୋର୍ଦ୍ଧା ପଟୁ ଆସୁଥିବା ଭାରୀ ଯାନ ପାଇଁ ନିୟମ

ଖୋର୍ଦ୍ଧା ପଟୁ ଭୁବନେଶ୍ୱର ଆସୁଥିବାଭାରୀ ଯାନ ଓ ବସ୍ଗୁଡ଼ିକୁ ସର୍ଭିସ୍ ରୋଡ୍ରେ ଯିବାକୁ ଦିଆଯିବ ନାହିଁ। ସେମାନଙ୍କୁ ଫ୍ଲାଏଓଭର ବ୍ୟବହାର କରିବାକୁ ପଡ଼ିବ।

ଭସାଣି ସମୟରେ ଭିଡ଼ ଓ ଯାନବାହନ ଚାପ ବଢ଼ିବାର ଆଶଙ୍କା ଥିବାରୁ ଯାତ୍ରୀମାନେ ଅନାବଶ୍ୟକ ଭାବେ ଭସାଣି ରୁଟ୍ରେ ପ୍ରବେଶ ନକରିବାକୁ ପୋଲିସ ପକ୍ଷରୁ କୁହାଯାଇଛି।

ଏହି ସ୍ଥାନଗୁଡ଼ିକରେ ହେବ ମୂର୍ତ୍ତି ବିସର୍ଜନ

ଭୁବନେଶ୍ୱରରେ ପରିବେଶ ଓ ଭିଡ଼ ନିୟନ୍ତ୍ରଣକୁ ଧ୍ୟାନରେ ରଖି ବିଭିନ୍ନ ସ୍ଥାନରେ ଅସ୍ଥାୟୀ ପୋଖରୀ ବ୍ୟବସ୍ଥା କରାଯାଇଛି। ଭସାଣି ପାଇଁ ଚିହ୍ନଟ ସ୍ଥାନଗୁଡ଼ିକ ମଧ୍ୟରେକୁଆଖାଇ ନଦୀ ନିକଟ ଅଞ୍ଚଳ, ଦୟା ନଦୀର ଲିଙ୍ଗିପୁର, ବାସୁଆଘାଇ-ଟଙ୍କପାଣି ରୋଡ୍, ନାଇଜର ନିକଟ ଅଞ୍ଚଳ, ନିଟ୍ ନିକଟ ଚନ୍ଦକା ଏବଂ କୁଶଭଦ୍ରା ନଦୀ ଅଞ୍ଚଳରହିଛି।

ପୂର୍ବରୁ ପୋଲିସ ମଧ୍ୟ ସୂଚନା ଦେଇଥିଲା ଯେ କୁଆଖାଇ ଓ ଦୟା ନଦୀ କୂଳରେ ଅସ୍ଥାୟୀ ପୋଖରୀରେ ମୂର୍ତ୍ତି ବିସର୍ଜନ କରାଯିବ।

ଜରୁରୀ ସେବା ଗାଡ଼ିକୁ କଟକଣା ନାହିଁ

ଟ୍ରାଫିକ୍ କଟକଣା ମଧ୍ୟରେପୋଲିସ, ଅଗ୍ନିଶମ ବାହିନୀ, ଅବକାରୀ ବିଭାଗ, ଆମ୍ବୁଲାନ୍ସ ଓ ଅନ୍ୟ ଜରୁରୀ ସେବା ଯାନବାହନପାଇଁ ଛାଡ଼ ରହିବ।

ଭସାଣି ଶୋଭାଯାତ୍ରା ସୁରୁଖୁରୁରେ ସମ୍ପନ୍ନ କରିବା ଓ ଜନସାଧାରଣଙ୍କ ସୁରକ୍ଷା ପାଇଁ ପୋଲିସ ପକ୍ଷରୁ ସମସ୍ତଙ୍କ ସହଯୋଗ ଲୋଡ଼ାଯାଇଛି।

DJ ଓ ବାଣ ଉପରେ କଟକଣା

ଭୁବନେଶ୍ୱରର ଭସାଣି ଶୋଭାଯାତ୍ରାରେDJ ବ୍ୟବହାର ଉପରେ ନିଷେଧଜାରି ରହିବ। ଏହା ବଦଳରେ ପାରମ୍ପରିକ ବାଦ୍ୟଯନ୍ତ୍ର ଓ ବ୍ୟାଣ୍ଡ ବ୍ୟବହାରକୁ ଅନୁମତି ଦିଆଯାଇଛି। ଭସାଣି ଶୋଭାଯାତ୍ରାରେ ବାଣ ଫୁଟାଇବା ମଧ୍ୟ ନିଷିଦ୍ଧ କରାଯାଇଛି। ନିୟମ ଉଲ୍ଲଂଘନ କଲେ ଆଇନଗତ ପଦକ୍ଷେପ ନିଆଯିବ ବୋଲି ପୋଲିସ ସତର୍କ କରିଛି।

ତେଣୁ ଅକ୍ଟୋବର ୨୨ରେ ଭୁବନେଶ୍ୱରରେ ଯାତାୟାତ କରିବାକୁ ଥିବା ଲୋକେ ଭସାଣି ରୁଟ୍ଗୁଡ଼ିକ ଏଡ଼ାଇ ବିକଳ୍ପ ରାସ୍ତା ବାଛିବା ସହ ପୋଲିସର ଟ୍ରାଫିକ୍ ନିର୍ଦ୍ଦେଶନାମା ପାଳନ କରିବା ଜରୁରୀ।