ଭୁବନେଶ୍ୱର: ବଙ୍ଗୋପସାଗରରେ ପୁଣି ଏକ ଘୂର୍ଣ୍ଣିବଳୟକୁ ନେଇ ବାତ୍ୟା ଆଶଙ୍କା ସୃଷ୍ଟି ହୋଇଛି। ଦକ୍ଷିଣ ଆଣ୍ଡାମାନ ସାଗର ଓ ଏହାର ଆଖପାଖ ଅଞ୍ଚଳରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ପ୍ରଭାବରେ ଦକ୍ଷିଣ-ପୂର୍ବ ବଙ୍ଗୋପସାଗରରେ ଲଘୁଚାପ ସୃଷ୍ଟି ହୋଇଛି। ଆଗାମୀ ଦିନରେ ଏହା ଅଧିକ ଘନୀଭୂତ ହୋଇ ଅବପାତ ଏବଂ ପରବର୍ତ୍ତୀ ସମୟରେ ବାତ୍ୟାର ରୂପ ନେଇପାରେ ବୋଲି ପାଣିପାଗ ମଡେଲ୍ ଆକଳନ କରୁଛି।

ଭାରତୀୟ ପାଣିପାଗ ବିଭାଗ (IMD)ର ନଭେମ୍ବର ୧୨ର ବିସ୍ତାରିତ ପାଣିପାଗ ଆକଳନ ଅନୁସାରେ, ନଭେମ୍ବର ୧୩ରେ ଦକ୍ଷିଣ-ପୂର୍ବ ବଙ୍ଗୋପସାଗରରେ ଲଘୁଚାପ ସୃଷ୍ଟି ହେବା ସହ ୧୪ ତାରିଖରେ ଏହା ଅଧିକ ଘନୀଭୂତ ହୋଇପାରେ। ନଭେମ୍ବର ୧୫ ଆଡ଼କୁ ଏହା ଦକ୍ଷିଣ ବଙ୍ଗୋପସାଗରର କେନ୍ଦ୍ରୀୟ ଅଞ୍ଚଳରେ ଅବପାତରେ ପରିଣତ ହେବାର ସମ୍ଭାବନା ରହିଛି।

ନଭେମ୍ବର ୧୯-୨୦ରେ ସ୍ଥଳଭାଗ ଛୁଇଁବ କି ବାତ୍ୟା?

ପାଣିପାଗ ବିଶେଷଜ୍ଞ ଓ ବିଭିନ୍ନ ମଡେଲ୍ର ଆକଳନ ଅନୁସାରେ, ଏହି ଅବପାତ ଆଗକୁ ଘନୀଭୂତ ହୋଇ ବାତ୍ୟାର ରୂପ ନେଇପାରେ। କିଛି ମଡେଲ୍ ଏହା ନଭେମ୍ବର ୧୯ ରାତି କିମ୍ବା ୨୦ ତାରିଖ ସକାଳେ ଆନ୍ଧ୍ରପ୍ରଦେଶ ଉପକୂଳରେ କାଭାଲି ଓ ମଛଲିପଟ୍ଟନମ୍ ମଧ୍ୟବର୍ତ୍ତୀ ଅଞ୍ଚଳରେ ସ୍ଥଳଭାଗ ଛୁଇଁପାରେ ବୋଲି ସମ୍ଭାବନା ଦର୍ଶାଇଛନ୍ତି।

ତେବେ ସମସ୍ତ ପାଣିପାଗ ମଡେଲ୍ର ଆକଳନ ଏକାଭଳି ନୁହେଁ। କିଛି ମଡେଲ୍ ଆନ୍ଧ୍ରପ୍ରଦେଶ-ଓଡ଼ିଶା ଉପକୂଳ ଦିଗକୁ ଗତି କରିବାର ସମ୍ଭାବନା ଦର୍ଶାଉଥିବା ବେଳେ ଅନ୍ୟ କେତେକ ଏହା ବାଂଲାଦେଶ କିମ୍ବା ମିଆଁମାର ଦିଗକୁ ଯାଇପାରେ ବୋଲି ଆକଳନ କରୁଛନ୍ତି। ତେଣୁ ଏହାର ସଠିକ୍ ଗତିପଥ ଓ ସ୍ଥଳଭାଗ ଛୁଇଁବା ସ୍ଥାନ ଏବେଠାରୁ ନିଶ୍ଚିତ କରିବା ସମ୍ଭବ ନୁହେଁ।

ଓଡ଼ିଶାରେ ୧୭ରୁ ବର୍ଷା ଆଶଙ୍କା

ସମ୍ଭାବ୍ୟ ବାତ୍ୟାର ପ୍ରଭାବରେ ନଭେମ୍ବର ୧୭-୧୮ ତାରିଖରୁ ଓଡ଼ିଶାର ପାଣିପାଗରେ ପରିବର୍ତ୍ତନ ହୋଇପାରେ। ଗଞ୍ଜାମ, ଗଜପତି ଓ ପୁରୀ ଜିଲ୍ଲାରେ ବର୍ଷା ହେବାର ସମ୍ଭାବନା ରହିଛି।

ସେହିପରି ନଭେମ୍ବର ୧୯ରୁ ୨୧ ମଧ୍ୟରେ ଦକ୍ଷିଣ ଓଡ଼ିଶାର କୋରାପୁଟ, ନବରଙ୍ଗପୁର, ମାଲକାନଗିରି ଓ ରାୟଗଡ଼ା ଭଳି ଜିଲ୍ଲାରେ ମଧ୍ୟମରୁ ପ୍ରବଳ ବର୍ଷା ହୋଇପାରେ ବୋଲି କିଛି ଆକଳନରେ କୁହାଯାଇଛି। ତେବେ ବର୍ଷାର ପରିମାଣ ଓ ପବନର ବେଗ ନେଇ ଏବେ ସୁଦ୍ଧା ନିର୍ଦ୍ଦିଷ୍ଟ ପୂର୍ବାନୁମାନ ଜାରି ହୋଇନାହିଁ।

ଚାଷୀଙ୍କ ଚିନ୍ତା ବଢ଼ାଇଲା ସମ୍ଭାବ୍ୟ ବର୍ଷା

ଧାନ ଅମଳ ସମୟ ପାଖେଇ ଆସୁଥିବାରୁ ସମ୍ଭାବ୍ୟ ବର୍ଷାକୁ ନେଇ ଚାଷୀଙ୍କ ଚିନ୍ତା ବଢ଼ିଛି। ଏହି ସମୟରେ ଲଗାଣ ବର୍ଷା ହେଲେ ଅମଳ ହୋଇଥିବା ଧାନ ଓ ଜମିରେ ଥିବା ପାଚିଲା ଫସଲ କ୍ଷତିଗ୍ରସ୍ତ ହେବାର ଆଶଙ୍କା ରହିଛି। ତେଣୁ ଚାଷୀମାନେ ପାଣିପାଗ ବିଭାଗର ନିୟମିତ ସୂଚନା ଉପରେ ନଜର ରଖିବା ଆବଶ୍ୟକ।

IMDର ନଜରରେ ସମ୍ଭାବ୍ୟ ବାତ୍ୟା

IMD ଏହି ପାଣିପାଗ ପ୍ରଣାଳୀର ଗତିବିଧି ଓ ଘନୀଭୂତ ହେବାର ସ୍ଥିତିକୁ ନିରୀକ୍ଷଣ କରୁଛି। ଏହା ଅବପାତରେ ପରିଣତ ହେବା ପରେ ଏହାର ଦିଗ, ତୀବ୍ରତା ଏବଂ ସମ୍ଭାବ୍ୟ ପ୍ରଭାବ ନେଇ ଅଧିକ ସ୍ପଷ୍ଟ ଚିତ୍ର ମିଳିପାରିବ।

ଏବେଠାରୁ ବାତ୍ୟା ଆସିବା କିମ୍ବା ନିର୍ଦ୍ଦିଷ୍ଟ ସ୍ଥାନରେ ସ୍ଥଳଭାଗ ଛୁଇଁବା ନିଶ୍ଚିତ ହୋଇନାହିଁ। ତେଣୁ ଲୋକେ ଆତଙ୍କିତ ନହୋଇ IMDର ପରବର୍ତ୍ତୀ ଅପଡେଟ୍ ଓ ସରକାରୀ ସତର୍କ ସୂଚନା ଉପରେ ନଜର ରଖନ୍ତୁ।