ବାଲେଶ୍ୱର ଜିଲ୍ଲାର ସହଦେବଖୁଣ୍ଟା ଅଞ୍ଚଳରେ ଘଟିଥିବା ଏକ ଅଭୂତପୂର୍ବ ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ବିବାହ ରୀତିନୀତି ଚାଲିଥିବା ସମୟରେ ବର ହଠାତ୍ ମଣ୍ଡପ ଛାଡ଼ି ଚାଲିଯାଇଥିବାରୁ ବିବାହ ଅଧାରେ ଅଟକିଯାଇଛି।
ସୂଚନା ଅନୁଯାୟୀ, ବର ଖୀରୋଦ ମହାନ୍ତ ଓ ଯୁବତୀଙ୍କ ମଧ୍ୟରେ ଗତ ତିନି ବର୍ଷ ଧରି ପ୍ରେମ ସମ୍ପର୍କ ଥିଲା। ଉଭୟ ପୂର୍ବରୁ କୋର୍ଟରେ ବିବାହ କରିସାରିଥିଲେ। ପରିବାର ଓ ସମ୍ପର୍କୀୟଙ୍କ ଉପସ୍ଥିତିରେ ପାରମ୍ପରିକ ରୀତିନୀତି ଅନୁସାରେ ମନ୍ଦିରରେ ବିବାହ ସମ୍ପନ୍ନ କରିବା ପାଇଁ ବ୍ୟବସ୍ଥା ହୋଇଥିଲା।
ତେବେ ବିବାହ ଚାଲିଥିବା ବେଳେ କିଛି ବ୍ୟକ୍ତି ବରଙ୍କ ନିକଟକୁ ଆସି ବିବାହ ନକରିବାକୁ ପରାମର୍ଶ ଦେଇଥିବା ଅଭିଯୋଗ ହୋଇଛି। ଏହା ପରେ ଖୀରୋଦ ହଠାତ୍ ବିବାହ ମଣ୍ଡପ ଛାଡ଼ି ଚାଲିଯାଇଥିଲେ। ଏହି ଘଟଣାରେ କନ୍ୟା ପକ୍ଷ ଓ ଉପସ୍ଥିତ ଅତିଥିମାନେ ଚକିତ ହୋଇପଡ଼ିଥିଲେ।
କନ୍ୟାଙ୍କ ଅଭିଯୋଗ ଅନୁସାରେ, ବିବାହ ସୁଚାରୁ ଭାବେ ଚାଲିଥିବା ବେଳେ ବରଙ୍କ କିଛି ସହକର୍ମୀ ଘଟଣାସ୍ଥଳକୁ ଆସିଥିଲେ ଏବଂ ତାଙ୍କୁ ବିବାହ ବାତିଲ କରିବାକୁ ପ୍ରରୋଚିତ କରିଥିଲେ। ସେ ଆହୁରି ଅଭିଯୋଗ କରିଛନ୍ତି ଯେ, ପ୍ରଥମେ ବରଙ୍କ ପରିବାର ଏହି ବିବାହ ପାଇଁ ସମ୍ମତି ଦେଇଥିଲେ, କିନ୍ତୁ ପରବର୍ତ୍ତୀ ସମୟରେ ସେମାନେ ମଧ୍ୟ ଏଥିରୁ ପଛଘୁଞ୍ଚା ଦେଇଥିଲେ।
ଘଟଣାର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନଥିବା ବେଳେ ପୋଲିସ ବରଙ୍କୁ ଅଟକ ରଖି ପଚରାଉଚରା କରୁଛି। ଅନ୍ୟପଟେ, ବରଙ୍କ ପରିବାର ବିବାହକୁ ସ୍ୱୀକାର କରିବାକୁ ଅନିଚ୍ଛା ପ୍ରକାଶ କରୁଥିବା ବେଳେ କନ୍ୟା ପକ୍ଷ ବିବାହ ସମ୍ପୂର୍ଣ୍ଣ କରିବା ଦାବିରେ ଅଡ଼ି ବସିଛନ୍ତି।
ଏହି ଘଟଣାକୁ ନେଇ ଅଞ୍ଚଳରେ ଚର୍ଚ୍ଚା ଜୋର ଧରିଥିବା ବେଳେ ପୋଲିସ ତଦନ୍ତ ପରେ ଘଟଣାର ପ୍ରକୃତ ସତ୍ୟ ସାମ୍ନାକୁ ଆସିବ ବୋଲି ଆଶା କରାଯାଉଛି।
ପାଞ୍ଚଥରର ବିଶ୍ୱ ଚେସ୍ ଚାମ୍ପିଅନ୍ ମାଗ୍ନସ୍ କାର୍ଲସେନ୍ ଚେ...
ଭାରତୀୟ କ୍ରିକେଟ୍‌ ଟିମ୍‌ ପ୍ରଥମଥର ପାଇଁ ଜାପା...
କୋଲକାତାର କ୍ୟାମାକ୍ ଷ୍ଟ୍ରିଟ୍ରେ ଅଭିଷେକ ବାନାର୍ଜୀଙ୍କ ଅଫ...
ଶିରୋମଣି ଅକାଳୀ ଦଳ (ପୁନର ସୁରଜିତ) ବିଜେପି ସହ ମେଣ୍ଟକୁ ନ...
ବିରୋଧୀ ଦଳ ନେତା ତଥା ବିଦ୍ରୋହୀ ଟିଏମ୍ସି ନେତା ରିତବ୍ରତ ବ...
