ପାଞ୍ଚଥରର ବିଶ୍ୱ ଚେସ୍ ଚାମ୍ପିଅନ୍ ମାଗ୍ନସ୍ କାର୍ଲସେନ୍ ଚେସ୍ର ଭବିଷ୍ୟତକୁ ନେଇ ବଡ଼ ମନ୍ତବ୍ୟ ଦେଇଛନ୍ତି। ଚେସ୍ ଆୟୋଜକମାନେ ତାଙ୍କ ବ୍ୟକ୍ତିଗତ ପସନ୍ଦ ଓ ଆବଶ୍ୟକତାକୁ କେନ୍ଦ୍ର କରି ଏହି ଖେଳର ଭବିଷ୍ୟତ ନିର୍ଦ୍ଧାରଣ ନକରିବାକୁ ସେ କହିଛନ୍ତି।

୩୫ ବର୍ଷୀୟ ନରୱେଜିଆନ୍ ଖେଳାଳି କହିଛନ୍ତି, ଗତ ୫-୬ ବର୍ଷ ମଧ୍ୟରେ ସାରା ବିଶ୍ୱରେ ଚେସ୍ ପ୍ରତି ନୂଆ ପ୍ରଶଂସକଙ୍କ ସଂଖ୍ୟା ବଢ଼ିଛି। ତେଣୁ ଏହି ଖେଳକୁ ଦର୍ଶକଙ୍କ ନିକଟରେ କେଉଁ ନୂଆ ଫର୍ମାଟ୍ରେ ଉପସ୍ଥାପନ କରାଯିବ, ସେନେଇ ନୂଆ ପରୀକ୍ଷଣ ଜାରି ରହିବା ଦରକାର।

କାର୍ଲସେନ୍ କ୍ଲାସିକାଲ୍ ବିଶ୍ୱ ଚାମ୍ପିଅନ୍ସିପ୍ ଚକ୍ରରୁ ଦୂରେଇ ଏବେ ରାପିଡ୍ ଚେସ୍ ଓ ଚୟନିତ ବଡ଼ ଟୁର୍ଣ୍ଣାମେଣ୍ଟରେ ଅଧିକ ଧ୍ୟାନ ଦେଉଛନ୍ତି। ଏବେ ସେ Global Chess Leagueର ଚତୁର୍ଥ ସିଜନ୍ରେ ଖେଳିବାକୁ ଫେରୁଛନ୍ତି। ଦ୍ରୁତ ଫର୍ମାଟ୍ ତାଙ୍କୁ ବିଶେଷ ଭାବେ ପସନ୍ଦ ବୋଲି ରିପୋର୍ଟରେ କୁହାଯାଇଛି।

ତେବେ ନିଜ କ୍ୟାରିୟରର ଶୀର୍ଷସ୍ତରରେ ରହିବାର ସମୟ ସୀମିତ ବୋଲି କାର୍ଲସେନ୍ ସ୍ପଷ୍ଟ କରିଛନ୍ତି। ତେଣୁ ତାଙ୍କ ପସନ୍ଦ ଅନୁଯାୟୀ ନୁହେଁ, ବରଂ ଚେସ୍ର ଦୀର୍ଘମିଆଦୀ ଭବିଷ୍ୟତକୁ ଦୃଷ୍ଟିରେ ରଖି ଆୟୋଜକମାନେ ନୂଆ ନିଷ୍ପତ୍ତି ନେବା ଉଚିତ ବୋଲି ସେ କହିଛନ୍ତି।

କାର୍ଲସେନ୍ ଏବେ ମଧ୍ୟ ପ୍ରତିଯୋଗିତାକୁ ନେଇ ଉତ୍ସାହିତ ଅଛନ୍ତି। Global Chess Leagueରେ ଫେରିବା ନେଇ ମଧ୍ୟ ସେ ଖୁସି ପ୍ରକାଶ କରିଛନ୍ତି। ଏହି ଲିଗ୍ରେ ୬ଟି ଫ୍ରାଞ୍ଚାଇଜ୍ ଡବଲ୍ ରାଉଣ୍ଡ-ରବିନ୍ ଲିଗ୍ ପର୍ଯ୍ୟାୟରେ ଖେଳିବେ ଏବଂ ଶ୍ରେଷ୍ଠ ଦଳଗୁଡ଼ିକ ନକ୍ଆଉଟ୍ ପର୍ଯ୍ୟାୟକୁ ଯିବେ।

ପ୍ରତ୍ୟେକ ଫ୍ରାଞ୍ଚାଇଜ୍ରେ ୬ ଜଣ ଖେଳାଳି ରହିବେ। ଏଥିରେ ଜଣେ Icon, ଦୁଇଜଣ Superstar Men, ଦୁଇଜଣ Superstar Women ଏବଂ ଜଣେ Prodigy ଖେଳାଳି ରହିବେ। ମ୍ୟାଚ୍ଗୁଡ଼ିକ ରାପିଡ୍ ଫର୍ମାଟ୍ରେ ହେବ ଏବଂ ପ୍ରତ୍ୟେକ ଖେଳାଳିଙ୍କୁ ୨୦ ମିନିଟ୍ ସମୟ ମିଳିବ। ୪୧ତମ ଚାଲ୍ଠାରୁ ପ୍ରତ୍ୟେକ ଚାଲ୍ ପାଇଁ ୨ ସେକେଣ୍ଡର ଇନ୍କ୍ରିମେଣ୍ଟ ଯୋଡ଼ାଯିବ।

ଲିଗ୍ର ସ୍କୋରିଂ ବ୍ୟବସ୍ଥା ମଧ୍ୟ ଅଲଗା। କଳା ଘୋଟିରେ ବିଜୟ ପାଇଁ ୪ ପଏଣ୍ଟ୍, ଧଳା ଘୋଟିରେ ବିଜୟ ପାଇଁ ୩ ପଏଣ୍ଟ୍ ଏବଂ ଡ୍ର’ ହେଲେ ଉଭୟ ଖେଳାଳିଙ୍କୁ ୧ ପଏଣ୍ଟ୍ ମିଳିବ।