ଗାଜାରେ ଇସ୍ରାଏଲୀ ସେନାର ଆକ୍ରମଣରେ ଅଷ୍ଟ୍ରେଲୀୟ ସହାୟତାକର୍ମୀ ଜୋମି ଫ୍ରାଙ୍କମ୍ୟାନ୍ଙ୍କ ମୃତ୍ୟୁ ଘଟଣାରେ ଅପରାଧିକ ତଦନ୍ତ ନକରିବାକୁ ଇସ୍ରାଏଲର ନିଷ୍ପତ୍ତିକୁ ନେଇ ଅଷ୍ଟ୍ରେଲିଆ ତୀବ୍ର ଆପତ୍ତି ଜଣାଇଛି। ଅଷ୍ଟ୍ରେଲିଆର ବୈଦେଶିକ ମନ୍ତ୍ରୀ ପେନି ୱଙ୍ଗ ଏହି ନିଷ୍ପତ୍ତିକୁ ନେଇ କ୍ଷୋଭ ପ୍ରକାଶ କରିବା ସହ ଇସ୍ରାଏଲୀ ରାଷ୍ଟ୍ରଦୂତଙ୍କୁ ସମନ କରିଛନ୍ତି।

ଫ୍ରାଙ୍କମ୍ୟାନ୍‌ World Central Kitchen (WCK) ପାଇଁ ଗାଜାରେ ସହାୟତା କାର୍ଯ୍ୟ କରୁଥିଲେ। ୨୦୨୪ ଏପ୍ରିଲରେ ଇସ୍ରାଏଲୀ ଏୟାର ଷ୍ଟ୍ରାଇକ୍‌ରେ ତାଙ୍କ ସହ ଆଉ ୬ ଜଣ ସହକର୍ମୀଙ୍କ ମୃତ୍ୟୁ ଘଟିଥିଲା। ମୃତକଙ୍କ ମଧ୍ୟରେ ୩ ଜଣ ବ୍ରିଟିଶ ନାଗରିକ, ଜଣେ ପାଲେଷ୍ଟିନୀୟ, ଜଣେ ପୋଲିଶ ନାଗରିକ ଏବଂ ଜଣେ ଆମେରିକୀୟ-କାନାଡୀୟ ଦ୍ୱୈତ ନାଗରିକ ଥିଲେ।

ପେନି ୱଙ୍ଗ କହିଛନ୍ତି ଯେ ଇସ୍ରାଏଲୀ ସେନାର ଏହି ନିଷ୍ପତ୍ତି ଆବଶ୍ୟକ ଜବାବଦେହିତାଠାରୁ ବହୁତ ଦୂରରେ। ତାଙ୍କ କହିବା ଅନୁଯାୟୀ, ଘଟଣା ସମ୍ପର୍କରେ ଏବେ ବି ଅନେକ ପ୍ରଶ୍ନର ଉତ୍ତର ମିଳିନାହିଁ। ଯଦି ପ୍ରଥମ ଆକ୍ରମଣକୁ ‘ଗୁରୁତର ଭୁଲ୍’ ବୋଲି ଧରାଯାଉଛି, ତେବେ ଏହାର କିଛି ମିନିଟ୍ ମଧ୍ୟରେ ଆଉ ଦୁଇଟି ଆକ୍ରମଣ କାହିଁକି ହେଲା ବୋଲି ସେ ପ୍ରଶ୍ନ ଉଠାଇଛନ୍ତି।

ଅଷ୍ଟ୍ରେଲିଆ ସରକାରଙ୍କ ଅନୁରୋଧ ସତ୍ତ୍ୱେ ଆକ୍ରମଣ ସମୟର ଡ୍ରୋନ୍ ଅଡିଓ ଏପର୍ଯ୍ୟନ୍ତ ହସ୍ତାନ୍ତର କରାଯାଇନଥିବା ନେଇ ମଧ୍ୟ ୱଙ୍ଗ ଅସନ୍ତୋଷ ପ୍ରକାଶ କରିଛନ୍ତି।

ଅନ୍ୟପକ୍ଷରେ, ଇସ୍ରାଏଲୀ ରାଷ୍ଟ୍ରଦୂତ ହିଲେଲ୍ ନ୍ୟୁମାନ୍ ଇସ୍ରାଏଲୀ ସେନାର ତଦନ୍ତକୁ ସମର୍ଥନ କରିଛନ୍ତି। ତାଙ୍କ କହିବା ଅନୁଯାୟୀ, ଏହି ଘଟଣାରେ ଅପରାଧିକ ଉଦ୍ଦେଶ୍ୟ ନଥିଲା ଏବଂ ତେଣୁ ଅପରାଧିକ ଦାୟିତ୍ୱ ମଧ୍ୟ ନାହିଁ।

ଇସ୍ରାଏଲୀ ସେନା କହିଛି ଯେ ଆକ୍ରମଣ ପୂର୍ବରୁ ସହାୟତାକର୍ମୀଙ୍କ କାରକେଡ୍‌ରେ ଥିବା ଜଣେ ସଶସ୍ତ୍ର ସୁରକ୍ଷାକର୍ମୀଙ୍କ ସମ୍ପର୍କରେ ସେନାକୁ ସୂଚନା ଦିଆଯାଇନଥିଲା। ତାଙ୍କୁ ଭୁଲ୍‌ରେ ହାମାସ୍ ଯୋଦ୍ଧା ବୋଲି ଚିହ୍ନଟ କରାଯାଇଥିବା ଏବଂ କାରକେଡ୍‌ ନିର୍ଦ୍ଧାରିତ ରୁଟ୍‌ରୁ ବିଚ୍ୟୁତ ହୋଇଥିବା ମଧ୍ୟ ସେନା ଦାବି କରିଛି।

ତେବେ ଇସ୍ରାଏଲୀ ସେନା ନିଜ ତଦନ୍ତରେ ‘ଗୁରୁତର ବିଫଳତା’ ସ୍ୱୀକାର କରିଥିଲେ ମଧ୍ୟ କମାଣ୍ଡରମାନଙ୍କ ନିଷ୍ପତ୍ତିରେ ଅପରାଧିକ ଅନିୟମିତତାର ଯଥେଷ୍ଟ ସନ୍ଦେହ ନଥିବା କହିଛି।

ଫ୍ରାଙ୍କମ୍ୟାନ୍‌ଙ୍କ ପରିବାର ଇସ୍ରାଏଲୀ ସେନାର ନିଷ୍ପତ୍ତିରେ ଗଭୀର ନିରାଶା ପ୍ରକାଶ କରିଛି। ପରିବାର ପକ୍ଷରୁ ଘଟଣାର ଏକ ସ୍ୱାଧୀନ ତଦନ୍ତ ଦାବି କରାଯାଇଛି।

WCK ମଧ୍ୟ ଇସ୍ରାଏଲୀ ସେନାର ତଦନ୍ତ ରିପୋର୍ଟକୁ ଅସ୍ୱୀକାର କରିଛି। ନିଜ କାର୍ଯ୍ୟକଳାପର ତଦନ୍ତ ଇସ୍ରାଏଲୀ ସେନା ନିଜେ କରିବା ବିଶ୍ୱସନୀୟ ନୁହେଁ ବୋଲି ସଂଗଠନ କହିବା ସହ ସ୍ୱାଧୀନ ତଦନ୍ତ ଦାବି କରିଛି।

ଅଷ୍ଟ୍ରେଲିଆର ପୂର୍ବତନ ପ୍ରତିରକ୍ଷା ବାହିନୀ ମୁଖ୍ୟ ମାର୍କ ବିନ୍ସ୍କିନ୍ଙ୍କ ୨୦୨୪ ଅଗଷ୍ଟର ରିପୋର୍ଟରେ ମଧ୍ୟ ଇସ୍ରାଏଲୀ ସେନାର ପ୍ରକ୍ରିୟାରେ ‘ଗୁରୁତର ବିଫଳତା’ ଯୋଗୁଁ ଫ୍ରାଙ୍କମ୍ୟାନ୍‌ ଓ ତାଙ୍କ ସହକର୍ମୀମାନଙ୍କ ମୃତ୍ୟୁ ଘଟିଥିବା କୁହାଯାଇଥିଲା।

ଏହି ନିଷ୍ପତ୍ତି ଗାଜା ଯୁଦ୍ଧ ଆରମ୍ଭ ହେବା ପରଠାରୁ ଇସ୍ରାଏଲୀ ସେନା ବିରୋଧରେ ଅଷ୍ଟ୍ରେଲିଆର ସବୁଠାରୁ କଠୋର ଆପତ୍ତିଗୁଡ଼ିକ ମଧ୍ୟରୁ ଗୋଟିଏ ବୋଲି ଦେଖାଯାଉଛି।