ନୂଆଦିଲ୍ଲୀ:ମଧ୍ୟପ୍ରାଚ୍ୟରେ ଚାଲିଥିବା ବ୍ୟାପକ ଯୁଦ୍ଧ ପରିସ୍ଥିତି ମଧ୍ୟରେ ସାଉଦି ଆରବ ଓ ୟେମେନ୍ର ହୁଥିମାନଙ୍କ ମଧ୍ୟରେ ଉତ୍ତେଜନା ଆହୁରି ବଢ଼ିଛି। ଶନିବାର ହୁଥିମାନେ ସାଉଦି ରାଜଧାନୀ ରିୟାଦ୍ ଓ ଲୋହିତ ସାଗର କୂଳରେ ଥିବା ୟାନବୁ ଅଞ୍ଚଳରେ ଆକ୍ରମଣ କରିଥିବା ଦାବି କରିଛନ୍ତି।

ହୁଥି ସାମରିକ ପ୍ରବକ୍ତାଙ୍କ ଅନୁସାରେ, ଏହି ଆକ୍ରମଣରେ ବହୁ ସଂଖ୍ୟାରେ ବାଲିଷ୍ଟିକ୍ ଓ କ୍ରୁଜ୍ ମିସାଇଲ୍ ସହ ଡ୍ରୋନ୍ ବ୍ୟବହାର କରାଯାଇଥିଲା। ରିୟାଦ୍ର କିଛି ‘ସେନ୍ସିଟିଭ୍’ ଟାର୍ଗେଟ୍ ଏବଂ ୟାନବୁରେ ସାଉଦି ତୈଳ କମ୍ପାନୀ Aramco ସହ ଜଡ଼ିତ ଏକ ସ୍ଥାନକୁ ଟାର୍ଗେଟ୍ କରାଯାଇଥିବା ହୁଥିମାନେ ଦାବି କରିଛନ୍ତି।

ରିୟାଦ୍ ଦିଗକୁ ଆସୁଥିବା ମିସାଇଲ୍ ଇଣ୍ଟରସେପ୍ଟ

ସାଉଦି ନେତୃତ୍ୱାଧୀନ ମେଣ୍ଟର କହିବା ଅନୁସାରେ, ହୁଥିମାନଙ୍କ ଦ୍ୱାରା ରିୟାଦ୍ ଦିଗକୁ ଛଡ଼ାଯାଇଥିବା ଏକ ବାଲିଷ୍ଟିକ୍ ମିସାଇଲ୍କୁ ଆକାଶରେ ହିଁ ଧ୍ୱଂସ କରାଯାଇଛି। ଅନ୍ୟ କେତେକ ଅଞ୍ଚଳରେ ମଧ୍ୟ ଆକ୍ରମଣ ଚେଷ୍ଟାକୁ ବିଫଳ କରାଯାଇଥିବା ସାଉଦି ପକ୍ଷରୁ କୁହାଯାଇଛି।

ରିୟାଦ୍ରେ ବିସ୍ଫୋରଣର ଶବ୍ଦ ଶୁଣାଯିବା ସହ କିଙ୍ଗ୍ ଖାଲିଦ୍ ଇଣ୍ଟରନ୍ୟାସନାଲ୍ ଏୟାରପୋର୍ଟ ନିକଟରେ କଳା ଧୂଆଁ ଦେଖାଯାଇଥିବା ରିପୋର୍ଟ ଆସିଛି। ସାଉଦି କର୍ତ୍ତୃପକ୍ଷଙ୍କ ଅନୁସାରେ, ରିୟାଦ୍ ଉପରେ ଆକ୍ରମଣରେ କୌଣସି ମୃତାହତ କିମ୍ବା ବଡ଼ କ୍ଷୟକ୍ଷତି ହୋଇଥିବା ରିପୋର୍ଟ ନାହିଁ।

ମଧ୍ୟପ୍ରାଚ୍ୟରେ ଆଉ ଏକ ଯୁଦ୍ଧ ମୋର୍ଚ୍ଚା

ସାଉଦି-ହୁଥି ସଂଘର୍ଷ ବଢ଼ିବା ଫଳରେ ମଧ୍ୟପ୍ରାଚ୍ୟରେ ଚାଲିଥିବା ଯୁଦ୍ଧର ଆଉ ଏକ ମୋର୍ଚ୍ଚା ଖୋଲିବା ନେଇ ଚିନ୍ତା ବଢ଼ିଛି। ୟେମେନ୍ରେ ମଧ୍ୟ ହୁଥି ଓ ସାଉଦି ସମର୍ଥିତ ବାହିନୀ ମଧ୍ୟରେ ଲଢ଼େଇ ତୀବ୍ର ହୋଇଛି। ଗତ କିଛି ସପ୍ତାହରେ ହୁଥିମାନେ ଲୋହିତ ସାଗର ଉପକୂଳରେ ମଧ୍ୟ ନିଜ ନିୟନ୍ତ୍ରଣ ବଢ଼ାଇଥିବା ରିପୋର୍ଟ ଆସିଛି।

ଏହି ପରିସ୍ଥିତି ବିଶ୍ୱର ଗୁରୁତ୍ୱପୂର୍ଣ୍ଣ ଶିପିଂ ରୁଟ୍ ଏବଂ ତୈଳ ଯୋଗାଣ ଉପରେ ମଧ୍ୟ ପ୍ରଭାବ ପକାଇପାରେ। ବିଶେଷକରି ବାବ୍-ଏଲ୍-ମାନ୍ଦେବ୍ ଜଳପଥର ଗୁରୁତ୍ୱ ଥିବାରୁ ଏଠାରେ ଅସ୍ଥିରତା ବଢ଼ିଲେ ବିଶ୍ୱ ବାଣିଜ୍ୟ ଓ ଉର୍ଜା ବଜାର ଉପରେ ପ୍ରଭାବ ପଡ଼ିବା ଆଶଙ୍କା ରହିଛି।

ଆମେରିକାର ଚିନ୍ତା ବଢ଼ିଲା

ସାଉଦି ଉପରେ ହୁଥି ଆକ୍ରମଣ ପରେ ଆମେରିକା ମଧ୍ୟ ମଧ୍ୟପ୍ରାଚ୍ୟର ସୁରକ୍ଷା ପରିସ୍ଥିତିକୁ ନେଇ ସତର୍କତା ଜାରି କରିଛି। ଆମେରିକୀୟ ନାଗରିକଙ୍କୁ ଏହି ଅଞ୍ଚଳକୁ ଯାତ୍ରା କରିବା ପୂର୍ବରୁ ପୁନର୍ବିଚାର କରିବାକୁ କୁହାଯାଇଛି। ବିମାନ ଚଳାଚଳ ବାତିଲ, ଏୟାରସ୍ପେସ୍ ବନ୍ଦ ଏବଂ ଅନ୍ୟାନ୍ୟ ଯାତାୟାତ ବାଧା ସୃଷ୍ଟି ହୋଇପାରେ ବୋଲି ମଧ୍ୟ ସତର୍କ କରାଯାଇଛି।

ଆମେରିକାର ଷ୍ଟେଟ୍ ଡିପାର୍ଟମେଣ୍ଟ ମଧ୍ୟପ୍ରାଚ୍ୟର ସୁରକ୍ଷା ପରିସ୍ଥିତିକୁ ଜଟିଳ ବୋଲି ଦର୍ଶାଇ ହଠାତ୍ ଉତ୍ତେଜନା ବଢ଼ିପାରେ ବୋଲି ଚେତାବନୀ ଦେଇଛି।