APAAR (Automated Permanent Academic Account Registry) ID ପାଇଁ ଅଭିଭାବକଙ୍କ ସମ୍ମତି ସମ୍ପୂର୍ଣ୍ଣ ସ୍ୱଇଚ୍ଛାଧୀନ ହେବା ଉଚିତ ବୋଲି ସୋମବାର ସୁପ୍ରିମକୋର୍ଟ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ଏଥିସହିତ ଓଡ଼ିଶା ହାଇକୋର୍ଟଙ୍କ ରାୟକୁ ଦେଶବ୍ୟାପୀ ଲାଗୁ କରିବା ପାଇଁ କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE)କୁ ନିର୍ଦ୍ଦେଶ ଦିଆଯାଇଛି।
ମୁଖ୍ୟ ବିଚାରପତି ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚୀ ଏବଂ ବିଚାରପତି ଭି. ମୋହନାଙ୍କ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ। APAAR ID ଯୋଜନାକୁ ଆଧାର ସହ ସଂଯୋଗ କରାଯିବା ଏବଂ ଏହାର ସ୍ୱଇଚ୍ଛାଧୀନ ସ୍ୱରୂପ ନେଇ ଉଠିଥିବା ପ୍ରଶ୍ନକୁ ନେଇ ଅଭିଷେକ ବକ୍ସୀ ଏବଂ ଅନ୍ୟମାନଙ୍କ ପକ୍ଷରୁ ଦାଖଲ ରିଟ୍ ପିଟିସନର ଶୁଣାଣି ସମୟରେ ଏହି ନିର୍ଦ୍ଦେଶ ଦିଆଯାଇଛି।
ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ଇନ୍ଦିରା ଜୟସିଂହ ଯୁକ୍ତି ବାଢ଼ି କହିଥିଲେ ଯେ, ସରକାର APAAR ଯୋଜନାକୁ ସ୍ୱଇଚ୍ଛାଧୀନ ବୋଲି କହୁଥିଲେ ମଧ୍ୟ ବାସ୍ତବରେ ଏହାକୁ ଅନିବାର୍ଯ୍ୟ କରାଯାଉଛି। APAAR ID ନଥିଲେ ଛାତ୍ରଛାତ୍ରୀଙ୍କୁ ପରୀକ୍ଷା ଦେବାରେ ଅସୁବିଧା ହେଉଥିବା ଅଭିଯୋଗ ମଧ୍ୟ ହୋଇଥିଲା।
ଆବେଦନକାରୀମାନେ ଶିଶୁମାନଙ୍କ ବ୍ୟକ୍ତିଗତ ତଥ୍ୟର ସଂଗ୍ରହ, ସଂରକ୍ଷଣ ଓ ବ୍ୟବହାର ନେଇ ମଧ୍ୟ ଗମ୍ଭୀର ପ୍ରଶ୍ନ ଉଠାଇଥିଲେ। ସେମାନଙ୍କ ମତରେ, ଶିକ୍ଷା ହେଉଛି ଏକ ମୌଳିକ ଅଧିକାର ଏବଂ ଏହାକୁ ଆଧାର କିମ୍ବା APAAR ID ସହ ଯୋଡ଼ିବା ଉଚିତ ନୁହେଁ।
ସୁପ୍ରିମକୋର୍ଟ କହିଛନ୍ତି ଯେ, APAAR ଯୋଜନାର ଉଦ୍ଦେଶ୍ୟ ଛାତ୍ରଛାତ୍ରୀଙ୍କ ଶିକ୍ଷାଗତ ତଥ୍ୟକୁ ସୁବ୍ୟବସ୍ଥିତ ଭାବେ ସଂରକ୍ଷଣ କରିବା ହୋଇଥିଲେ ମଧ୍ୟ, ଏହାର କାର୍ଯ୍ୟକାରିତା ବର୍ତ୍ତମାନର ଆଇନ ଏବଂ ଡିଜିଟାଲ ପର୍ସନାଲ ଡାଟା ପ୍ରୋଟେକ୍ସନ୍ (DPDP) ଆଇନ, ୨୦୨୩ ସହ ସଙ୍ଗତିପୂର୍ଣ୍ଣ ହେବା ଆବଶ୍ୟକ।
ଡିସେମ୍ବର ୨୦୨୫ରେ ଓଡ଼ିଶା ହାଇକୋର୍ଟ 'ରୋହିତ ଆନନ୍ଦ ଦାସ ଓ ଅନ୍ୟମାନେ ବନାମ ଓଡ଼ିଶା ସରକାର ଓ ଅନ୍ୟମାନେ' ମାମଲାରେ ସମ୍ମତି ପତ୍ରରେ ସଂଶୋଧନ କରିବାକୁ କେନ୍ଦ୍ର ଶିକ୍ଷା ମନ୍ତ୍ରଣାଳୟକୁ ନିର୍ଦ୍ଦେଶ ଦେଇଥିଲେ। ହାଇକୋର୍ଟ କହିଥିଲେ ଯେ, ବର୍ତ୍ତମାନର ସମ୍ମତି ପତ୍ରରେ ଆରମ୍ଭରୁ 'ସମ୍ମତି ନ ଦେବା'ର କୌଣସି ବିକଳ୍ପ ନାହିଁ ଏବଂ କେବଳ ସମ୍ମତି ଦେବା ପରେ ତାହାକୁ ପ୍ରତ୍ୟାହାର କରିବାର ସୁବିଧା ରହିଛି।
କେନ୍ଦ୍ର ସରକାର ଏହି ରାୟକୁ ଚ୍ୟାଲେଞ୍ଜ କରିନଥିବାରୁ ସୁପ୍ରିମକୋର୍ଟ ଏହାକୁ ଦେଶବ୍ୟାପୀ ଲାଗୁ କରିବା ପାଇଁ CBSEକୁ ନିର୍ଦ୍ଦେଶ ଦେଇଛନ୍ତି। ଏଥିସହିତ ଡାଟା ସୁରକ୍ଷା ଏବଂ ଛାତ୍ରଛାତ୍ରୀଙ୍କ ଗୋପନୀୟତା ସମ୍ପର୍କିତ ପ୍ରସଙ୍ଗଗୁଡ଼ିକୁ ମଧ୍ୟ ଯାଞ୍ଚ କରିବାକୁ କୁହାଯାଇଛି।
୨୯ ଜୁଲାଇ ୨୦୨୩ରେ ଆରମ୍ଭ ହୋଇଥିବା APAAR ଯୋଜନା ଅନୁଯାୟୀ ପ୍ରତ୍ୟେକ ଛାତ୍ରଛାତ୍ରୀଙ୍କୁ ଆଧାର ସହ ସଂଯୁକ୍ତ ଏକ ସ୍ଥାୟୀ ଡିଜିଟାଲ ଶିକ୍ଷାଗତ ପରିଚୟ ପ୍ରଦାନ କରାଯାଉଛି। ତେବେ ସୁପ୍ରିମକୋର୍ଟଙ୍କ ଏହି ନିର୍ଦ୍ଦେଶ ପରେ ଅଭିଭାବକମାନଙ୍କ ପାଇଁ ସମ୍ମତି ଦେବା କିମ୍ବା ନ ଦେବାର ସ୍ପଷ୍ଟ ବିକଳ୍ପ ଉପଲବ୍ଧ ହେବ।
ଭାରତୀୟ ଅର୍ଥନୀତି ପାଇଁ ଆସିଛି ଭଲ ଖବର।୨୦୨୬-୨୭ ଆର୍ଥିକ ବ...
ଘରୋଇ LPG ଗ୍ରାହକଙ୍କ ପାଇଁ ବଡ଼ ଆଶ୍ୱସ୍ତି।ଘରୋଇ LPG refi...
ଆମେରିକା ଓ କାନାଡା ମଧ୍ୟରେ ଚାଲିଥିବାଟାରିଫ୍ ଯୁଦ୍ଧଏବେ ଏର...
ଆମେରିକାରେ ଚାକିରି କରିବା ସହିତ ନିଜ ପ୍ରତିଭାକୁ side bus...
ଉତ୍ତରପ୍ରଦେଶରେ ଶ୍ରମିକ ଓ ଅନ୍ୟାନ୍ୟ ଦୁର୍ବଳ ପରିବାରର ପିଲ...
ମେଷ ଏହି ସପ୍ତାହରେ ଆତ୍ମବିଶ୍ୱାସ ବଢ଼ିବ। କାର୍ଯ୍ୟକ୍ଷେ...
