ଫେରାର ହେବା ପୂର୍ବରୁ ଅଭିଯୁକ୍ତମାନେ ଜଣେ କର୍ମଚାରୀଙ୍କୁ ବନ୍ଧୁକ ଦେଖାଇ ଅପହରଣ କରି କାରରେ ନେଇଯାଇଥିଲେ। ପରେ ଅନୁଗୁଳ ନିକଟରେ ତାଙ୍କୁ ଛାଡ଼ି ଦେଇଥିଲେ। ଏହା ପରେ କର୍ମଚାରୀ ଜଣକ ପୋଲିସକୁ ସୂଚନା ଦେଇଥିଲେ।

ଘଟଣା ପରେ ଅନୁଗୁଳ ଏସପି ରାହୁଲ ଜୈନଙ୍କ ନେତୃତ୍ୱରେ ୫ଟି ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା। ଜିଲ୍ଲା ଏବଂ ପଡ଼ୋଶୀ ଜିଲ୍ଲାଗୁଡ଼ିକରେ ନାକାବନ୍ଦୀ କରାଯାଇଥିଲା। AI-ଆଧାରିତ ସିସିଟିଭି କ୍ୟାମେରା ଓ ଅନ୍ୟାନ୍ୟ ନଜରଦାରୀ ବ୍ୟବସ୍ଥା ମାଧ୍ୟମରେ ଦୁର୍ବୃତ୍ତମାନଙ୍କ ଗାଡ଼ିକୁ ଟ୍ରାକ୍ କରାଯାଇଥିଲା।

ପୋଲିସ ଅନୁସାରେ, ଅଭିଯୁକ୍ତମାନେ ହଣ୍ଡପା ଥାନା ଅଧୀନ ଚୁଲିଆପୁର ଜଙ୍ଗଲ ନିକଟରେ କାର ଛାଡ଼ି ଜଙ୍ଗଲ ଭିତରକୁ ପଳାଇବାକୁ ଉଦ୍ୟମ କରିଥିଲେ। ପୋଲିସ ପିଛା କରୁଥିବା ସମୟରେ ଦୁଇ ଅଭିଯୁକ୍ତ ପୋଲିସ ଦଳ ଉପରେ ଗୁଳି ଚଳାଇଥିଲେ। ଆତ୍ମରକ୍ଷା ପାଇଁ ପୋଲିସ ପାଲଟା ଗୁଳି ଚଳାଇଥିଲା, ଯାହାରେ ଦୁଇ ଅଭିଯୁକ୍ତ ଗୁଳିବିଦ୍ଧ ହୋଇଥିଲେ।

ଗୁଳିବିଦ୍ଧ ଅଭିଯୁକ୍ତମାନଙ୍କ ନାମ ସଚିନ ଗାଜଗେ ଓ ପ୍ରକାଶ ମାଡନେ। ଉଭୟ ମହାରାଷ୍ଟ୍ରର ବାସିନ୍ଦା। ସଚିନଙ୍କ ଡାହାଣ ଗୋଡ଼ରେ ଏବଂ ପ୍ରକାଶଙ୍କ ବାମ ଗୋଡ଼ରେ ଗୁଳି ବାଜିଥିବା ଜଣାପଡ଼ିଛି।

ଏହା ସହ ରାଜେଶ ମାଡନେ ଓ ଦେବା ପ୍ରଭାକର ଲୋଖଣ୍ଡେଙ୍କୁ ମଧ୍ୟ ଗିରଫ କରାଯାଇଛି। ସମସ୍ତ ୪ ଅଭିଯୁକ୍ତ ମହାରାଷ୍ଟ୍ରର ବାସିନ୍ଦା ବୋଲି ପୋଲିସ କହିଛି।

ପୋଲିସ ଲୁଟ୍ ହୋଇଥିବା ପ୍ରାୟ ସମସ୍ତ ସୁନା ଓ ରୂପା ଅଳଙ୍କାର ଉଦ୍ଧାର କରିଛି। ଏଥିସହ ଦୁଇଟି ଦେଶୀ ବନ୍ଧୁକ, ଜୀବନ୍ତ ଗୁଳି ଏବଂ ଅପରାଧରେ ବ୍ୟବହୃତ ହୁଣ୍ଡାଇ ଭର୍ନା କାର ମଧ୍ୟ ଜବତ କରାଯାଇଛି। ତଦନ୍ତରେ ଗାଡ଼ିରେ ନକଲି ନମ୍ବର ପ୍ଲେଟ୍ ବ୍ୟବହାର କରାଯାଇଥିବା ଜଣାପଡ଼ିଛି।

ପୋଲିସ ବର୍ତ୍ତମାନ ଫେରାର ଥିବା ଅନ୍ୟ ଜଣେ ଅଭିଯୁକ୍ତଙ୍କୁ ଧରିବା ପାଇଁ ଅଭିଯାନ ଜାରି ରଖିଥିବାବେଳେ, ଏହି ଗ୍ୟାଙ୍ଗର ଅନ୍ୟ ରାଜ୍ୟ କିମ୍ବା ଓଡ଼ିଶାର ସମାନ ଅପରାଧ ସହ ସମ୍ପର୍କ ରହିଛି କି ନାହିଁ ସେ ଦିଗରେ ମଧ୍ୟ ତଦନ୍ତ କରୁଛି।