ନୂଆଦିଲ୍ଲୀ, ୧୫।୪: ଆଣ୍ଡାମାନ ସାଗରରେ ଏକ ଭୟାବହ ଦୁର୍ଘଟଣା ଘଟିଛି। ମାଲେସିଆ ଅଭିମୁଖେ ବେଆଇନ ଭାବେ ଯାତ୍ରା କରୁଥିବା ଏକ ଡଙ୍ଗା ସମୁଦ୍ର ମଝିରେ ବୁଡ଼ିଯିବା ଫଳରେ ପ୍ରାୟ ୨୫୦ରୁ ଅଧିକ ଲୋକ ନିଖୋଜ ଥିବା ଆଶଙ୍କା କରାଯାଇଛି। ବର୍ତ୍ତମାନ ସୁଦ୍ଧା କେବଳ ୯ ଜଣଙ୍କୁ ଜୀବନ୍ତ ଉଦ୍ଧାର କରାଯାଇଛି।

ରିପୋର୍ଟ ଅନୁଯାୟୀ, ଏହି ଡଙ୍ଗାରେ ପ୍ରାୟ ୨୫୦ରୁ ୨୮୦ ଯାତ୍ରୀ ଥିଲେ। ଯାତ୍ରୀମାନଙ୍କ ମଧ୍ୟରେ ଅଧିକାଂଶ ରୋହିଙ୍ଗ୍ୟା ଶ୍ରମିକ ଓ ବାଂଲାଦେଶୀ ନାଗରିକ ଥିବା ସୂଚନା ମିଳିଛି।

ବାଂଲାଦେଶର ଚିଟାଗଙ୍ଗରୁ ଇଣ୍ଡୋନେସିଆ ଅଭିମୁଖେ ଯାଉଥିବା ‘MT ମେଘନା ପ୍ରାଇଡ୍’ ନାମକ ଜାହାଜ ସମୁଦ୍ରରେ ଭାସୁଥିବା ୯ ଜଣଙ୍କୁ ଉଦ୍ଧାର କରିଥିଲା। ପରେ ଉଦ୍ଧାର କରାଯାଇଥିବା ଲୋକମାନଙ୍କୁ ବାଂଲାଦେଶ ତଟରକ୍ଷୀ ବାହିନୀର ‘ମନସୁର ଅଲି’ ଜାହାଜକୁ ହସ୍ତାନ୍ତର କରାଯାଇଛି।

ସୂଚନା ଅନୁସାରେ, ପ୍ରବଳ ଢେଉ ଯୋଗୁଁ ସମୁଦ୍ର ମଝିରେ ଡଙ୍ଗାଟି ନିୟନ୍ତ୍ରଣ ହରାଇ ଓଲଟି ପଡ଼ିଥିଲା। ଏହି ଦୁର୍ଘଟଣାଟି ଏପ୍ରିଲ ୯ ତାରିଖରେ ଘଟିଥିବା ସୂଚନା ବାଂଲାଦେଶ ତଟରକ୍ଷୀ ବାହିନୀର ଲେଫ୍ଟନାଣ୍ଟ କମାଣ୍ଡର ସବ୍ବିର ଆଲାମ ସୁଜାନ ଦେଇଛନ୍ତି।

ଦୁର୍ଘଟଣାରୁ ବର୍ତ୍ତି ଯାଇଥିବା ରୋହିଙ୍ଗ୍ୟା ଯୁବକ ରଫିକୁଲ ଇସଲାମ ଚାଲାଣକାରୀମାନଙ୍କ ନିର୍ମମତା ଓ ଚାଲାଣ ଚକ୍ରର କଳାକାରନାମା ବିଷୟରେ ଚୋକାବହ ତଥ୍ୟ ଦେଇଛନ୍ତି। ସେ କହିଛନ୍ତି ଯେ ଚାକିରିର ମିଥ୍ୟା ପ୍ରତିଶ୍ରୁତି ଦେଇ ଏପ୍ରିଲ ୨ ତାରିଖରେ ତାଙ୍କୁ ଟେକନାଫ ଅଞ୍ଚଳକୁ ଅଣାଯାଇଥିଲା। ସେଠାରେ ଏକ ନିଛାଟିଆ ଘରେ ୨୦-୨୫ ଜଣଙ୍କୁ ଅମାନବୀୟ ପରିସ୍ଥିତିରେ ବନ୍ଦୀ କରି ରଖାଯାଇଥିଲା। ଯଦି କେହି ପଳାଇବାକୁ ଚେଷ୍ଟା କରୁଥିଲେ, ତାଙ୍କୁ ନିର୍ଦ୍ଦୟ ଭାବେ ପିଟାଯାଉଥିଲା।

ସୂଚନା ଅନୁଯାୟୀ, ଡଙ୍ଗାରେ ପ୍ରାୟ ୧୫୦ ଜଣ ରୋହିଙ୍ଗ୍ୟା ଥିଲେ। ଏମାନଙ୍କ ମଧ୍ୟରେ ୨୧ ଜଣ ମହିଳା ଓ ୪ ଜଣ ଶିଶୁ ମଧ୍ୟ ଥିଲେ। ଏହା ସହ ବାକି ଯାତ୍ରୀମାନେ ବାଂଲାଦେଶୀ ନାଗରିକ ଥିବା କୁହାଯାଉଛି। ଏଥିସହ ୧୩ ଜଣ କ୍ରୁ ସଦସ୍ୟ ଓ ଚାଲାଣକାରୀ ମଧ୍ୟ ଡଙ୍ଗାରେ ଥିଲେ।

ଦୁର୍ଘଟଣାରୁ ବଞ୍ଚିଯାଇଥିବା ରଫିକୁଲ ଇସଲାମ କହିଛନ୍ତି, “ପ୍ରବଳ ଢେଉ ମାଡ଼ରେ ଜାହାଜଟି ହଠାତ୍ ଓଲଟି ପଡ଼ିଲା। ମୁଁ କଷ୍ଟକରେ ନିଜ ଜୀବନ ବଞ୍ଚାଇପାରିଲି, କିନ୍ତୁ ମୋ ଆଖି ସାମ୍ନାରେ ଅନେକ ଲୋକ ବୁଡ଼ିଗଲେ।”

ବର୍ତ୍ତମାନ ସୁଦ୍ଧା ଅନ୍ୟ ଯାତ୍ରୀମାନଙ୍କ ବିଷୟରେ କୌଣସି ସଠିକ୍ ସୂଚନା ମିଳିପାରିନାହିଁ। ନିଖୋଜ ଲୋକଙ୍କୁ ଖୋଜିବା ପାଇଁ ସମୁଦ୍ରରେ ସନ୍ଧାନ ଅଭିଯାନ ଜାରି ରହିଛି। ଏହି ଘଟଣା ଆନ୍ତର୍ଜାତୀୟ ସ୍ତରରେ ମାନବ ଚାଲାଣ ଚକ୍ରର ଭୟାବହତାକୁ ପୁଣିଥରେ ସାମ୍ନାକୁ ଆଣିଛି।