ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ (BCCI)ର ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କ ଭବିଷ୍ୟତକୁ ନେଇ ଏବେ ଚର୍ଚ୍ଚା ଜୋର ଧରିଛି। ରିପୋର୍ଟ ଅନୁସାରେ, ଅଗରକରଙ୍କ ବର୍ତ୍ତମାନର କାର୍ଯ୍ୟକାଳ ଚଳିତ ମାସରେ ଶେଷ ହେବାକୁ ଥିବା ବେଳେ ତାଙ୍କୁ ଆଉ ଏକ୍ସଟେନସନ୍ ମିଳିବ କି ନାହିଁ, ତାହା ସ୍ପଷ୍ଟ ହୋଇନାହିଁ।

ଅଗରକର ୨୦୨୩ ଜୁଲାଇରେ ଭାରତୀୟ ସିନିୟର ପୁରୁଷ ଚୟନ କମିଟିର ଅଧ୍ୟକ୍ଷ ଭାବେ ଦାୟିତ୍ୱ ନେଇଥିଲେ। ସେ ନେତୃତ୍ୱ ଦେଇଥିବା ଚୟନ କମିଟି ବୁଧବାର ୱେଷ୍ଟଇଣ୍ଡିଜ୍ ବିପକ୍ଷ ଆଗାମୀ ହ୍ୱାଇଟ୍-ବଲ୍ ସିରିଜ୍ ଏବଂ ଇରାନୀ କପ୍ ପାଇଁ ଦଳ ଘୋଷଣା କରିଥିଲା। କିଛି ରିପୋର୍ଟ ଅନୁସାରେ, ଏହି ବୈଠକ ଅଗରକରଙ୍କ ମୁଖ୍ୟ ଚୟନକର୍ତ୍ତା ଭାବେ ଶେଷ ଚୟନ ବୈଠକ ହୋଇଥାଇପାରେ।

ଅଗରକରଙ୍କ ସ୍ଥାନ ପାଇଁପୂର୍ବତନ ଭାରତୀୟ ୱିକେଟକିପର-ବ୍ୟାଟର ପାର୍ଥିବ ପଟେଲଏବଂପୂର୍ବତନ ବାମହାତୀ ସ୍ପିନର ପ୍ରଜ୍ଞାନ ଓଝାଙ୍କ ନାଁ ଚର୍ଚ୍ଚାରେ ରହିଛି। NDTVର ସୂତ୍ରଭିତ୍ତିକ ରିପୋର୍ଟରେ ଉଭୟଙ୍କୁ ଅଗରକରଙ୍କ ଉତ୍ତରାଧିକାରୀ ପାଇଁ ମୁଖ୍ୟ ଦାବିଦାର ବୋଲି କୁହାଯାଇଛି।

ତେବେପାର୍ଥିବ ପଟେଲ କିମ୍ବା ପ୍ରଜ୍ଞାନ ଓଝାଙ୍କ ମଧ୍ୟରୁ କିଏ ନୂଆ ମୁଖ୍ୟ ଚୟନକର୍ତ୍ତା ହେବେ, ସେନେଇ ଏପର୍ଯ୍ୟନ୍ତ ବିସିସିଆଇର ଚୂଡ଼ାନ୍ତ ଘୋଷଣା ହୋଇନାହିଁ। ବିସିସିଆଇର ଆଗାମୀ ବାର୍ଷିକ ସାଧାରଣ ସଭା (AGM) ପରେ ଏହି ବିଷୟରେ ଚିତ୍ର ସ୍ପଷ୍ଟ ହେବ ବୋଲି ରିପୋର୍ଟଗୁଡ଼ିକରେ କୁହାଯାଇଛି।

ଏହି ପରିବର୍ତ୍ତନ ହେଲେ ଭାରତୀୟ ଦଳର ଆଗାମୀ ଚୟନ ପ୍ରକ୍ରିୟା, ହ୍ୱାଇଟ୍-ବଲ୍ ଯୋଜନା ଏବଂ ୨୦୨୭ ଦିନିକିଆ ବିଶ୍ୱକପ୍କୁ ନେଇ ଦଳ ଗଠନରେ ନୂଆ ଚୟନକର୍ତ୍ତାଙ୍କ ଭୂମିକା ରହିବ। ଅନ୍ୟପଟେ ରୋହିତ ଶର୍ମାଙ୍କ ଭବିଷ୍ୟତକୁ ନେଇ ଚୟନକର୍ତ୍ତାଙ୍କ ମଧ୍ୟରେ ମତଭେଦ ଥିବା ନେଇ କିଛି ରିପୋର୍ଟରେ ଦାବି କରାଯାଇଛି; ତେବେ ଏହାକୁ ବିସିସିଆଇ ଆନୁଷ୍ଠାନିକ ଭାବେ ନିଶ୍ଚିତ କରିନାହିଁ।