ନୂଆଦିଲ୍ଲୀ:ଥାଇଲ୍ୟାଣ୍ଡର ଫୁକେଟ୍ରୁ ଦିଲ୍ଲୀ ଅଭିମୁଖେ ଆସୁଥିବା ଏୟାର ଇଣ୍ଡିଆରAI2379ବିମାନ ମଙ୍ଗଳବାର ଉଡ଼ାଣ ସମୟରେ ହଠାତ୍ ଭୟଙ୍କର ଟର୍ବୁଲେନ୍ସରେ ପଡ଼ିଥିଲା। ଏହାଫଳରେ ବିମାନର ଉଚ୍ଚତାରେ କ୍ଷଣିକ ପରିବର୍ତ୍ତନ ହୋଇଥିଲା ଏବଂ କିଛି ଯାତ୍ରୀ ଓ କ୍ରୁ ସଦସ୍ୟ ସାମାନ୍ୟ ଆହତ ହୋଇଥିଲେ।

ଏୟାର ଇଣ୍ଡିଆ ପକ୍ଷରୁ ଜାରି ବିବୃତ୍ତିରେ କୁହାଯାଇଛି ଯେ, ବିମାନଟି ଦିଲ୍ଲୀରେ ସୁରକ୍ଷିତ ଭାବେ ଅବତରଣ କରିଥିଲା ଏବଂ ସମସ୍ତ ଯାତ୍ରୀ ଓ କ୍ରୁ ସଦସ୍ୟ ନିରାପଦରେ ବାହାରିଥିଲେ।

ବିମାନବନ୍ଦରରେ ଆମ୍ବୁଲାନ୍ସ ମୁତୟନ କରାଯାଇଥିବାବେଳେ ଆହତ କିଛି ଯାତ୍ରୀଙ୍କୁ ହ୍ୱିଲ୍ଚେୟାରରେ ନେଇ ଚିକିତ୍ସା ପାଇଁ ମେଡିକାଲ୍ ସେଣ୍ଟରକୁ ପଠାଯାଇଥିଲା। କେତେକ ଯାତ୍ରୀଙ୍କ ମୁଣ୍ଡରେ ବ୍ୟାଣ୍ଡେଜ୍ ଲାଗିଥିବା ମଧ୍ୟ ଦେଖିବାକୁ ମିଳିଥିଲା।

ଜଣେ ଯାତ୍ରୀଙ୍କ କହିବା ଅନୁସାରେ, ବିମାନ ଉଡ଼ାଣର ପ୍ରାୟ ଡେଢ଼ ଘଣ୍ଟା ପରେ ହଠାତ୍ ବିମାନଟି ଭୟଙ୍କର ଭାବେ ଦୋହଲିବା ଆରମ୍ଭ କରିଥିଲା। ସେତେବେଳେ ଅଧିକାଂଶ ଯାତ୍ରୀ ଶୋଇଥିଲେ। ପ୍ରାୟ ଦୁଇରୁ ତିନି ମିନିଟ୍ ପର୍ଯ୍ୟନ୍ତ ବିମାନ ଅସ୍ଥିର ଅବସ୍ଥାରେ ରହିଥିଲା।

ଯାତ୍ରୀଙ୍କ ଦାବି ଅନୁସାରେ, ପ୍ରାୟ୧୫ରୁ ୨୦ ଜଣଯାତ୍ରୀ ଆହତ ହୋଇଛନ୍ତି। ଜଣେ ଶିଶୁ ମଧ୍ୟ ଆହତ ହୋଇଥିବା ସେ କହିଛନ୍ତି। ତାଙ୍କ ନିଜର ପିଠିରେ ଆଘାତ ଲାଗିଥିବାବେଳେ ତାଙ୍କ ଭାଇଙ୍କ କାନ୍ଧ ଓ ପିଠିରେ ମଧ୍ୟ ଚୋଟ ଲାଗିଛି।

ତେବେ ଏୟାର ଇଣ୍ଡିଆ ସ୍ପଷ୍ଟ କରିଛି ଯେ, ବର୍ତ୍ତମାନ ସୁଦ୍ଧା କୌଣସି ଗୁରୁତର ଆହତ ହେବାର ସୂଚନା ମିଳିନାହିଁ। ସାମାନ୍ୟ ଆହତ ଯାତ୍ରୀ ଓ କ୍ରୁ ସଦସ୍ୟଙ୍କୁ ସତର୍କତାମୂଳକ ଚିକିତ୍ସା ପାଇଁ ମେଡିକାଲ୍ ଟିମ୍ର ତତ୍ତ୍ୱାବଧାନରେ ରଖାଯାଇଛି।

ଏୟାର ଇଣ୍ଡିଆ କହିଛି ଯେ, ଯାତ୍ରୀ ଓ କ୍ରୁ ସଦସ୍ୟଙ୍କ ସୁରକ୍ଷା ସେମାନଙ୍କର ସର୍ବୋଚ୍ଚ ପ୍ରାଥମିକତା ଏବଂ ଘଟଣାର ତଦନ୍ତରେ ସମ୍ପୃକ୍ତ କର୍ତ୍ତୃପକ୍ଷଙ୍କୁ ସମ୍ପୂର୍ଣ୍ଣ ସହଯୋଗ କରାଯାଉଛି।