ବଲାଙ୍ଗିର ଜିଲ୍ଲାର ଟିଟିଲାଗଡ଼ ସହରର ୧୨ ନମ୍ବର ୱାର୍ଡରେ ଗୁରୁବାର ଏକ ଘରେ ଏସି ବିସ୍ଫୋରଣକୁ କେନ୍ଦ୍ର କରି ଭୟାବହ ଅଗ୍ନିକାଣ୍ଡ ଘଟିଛି। ଘର ଉପରେ ଯାଇଥିବା ବିଦ୍ୟୁତ ତାର ଏସି ସହ ସଂସ୍ପର୍ଶରେ ଆସିବା ପରେ ବିସ୍ଫୋରଣ ଘଟିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି।
ସୂଚନା ଅନୁଯାୟୀ, ଘର ଉପରେ ଯାଇଥିବା ବିଦ୍ୟୁତ ତାରରୁ ସୃଷ୍ଟି ହୋଇଥିବା ସର୍ଟ ସର୍କିଟ ଯୋଗୁଁ ଏସିରେ ପ୍ରଥମେ ନିଆଁ ଲାଗିଥିଲା। ପରେ ଏସି ବିସ୍ଫୋରଣ ହୋଇ ଅଗ୍ନିକାଣ୍ଡର ରୂପ ନେଇଥିଲା। ଅଳ୍ପ ସମୟ ମଧ୍ୟରେ ନିଆଁ ଘରର ବିଭିନ୍ନ ଅଂଶକୁ ବ୍ୟାପି ଯାଇଥିଲା ଏବଂ ଚାରିଆଡ଼େ ଘନ ଧୂଆଁ ଛାଇଯାଇଥିଲା।
ଅଗ୍ନିକାଣ୍ଡରେ ଘର ପରିସରରେ ପାର୍କିଂ ହୋଇଥିବା ଏକ କାର୍ ଗୁରୁତର ଭାବେ କ୍ଷତିଗ୍ରସ୍ତ ହୋଇଥିଲା। ଏଥିସହ ଆସବାବପତ୍ର, ଘରୋଇ ଉପକରଣ, ବ୍ୟବସାୟିକ ସାମଗ୍ରୀ ଓ ଅନ୍ୟାନ୍ୟ ମୂଲ୍ୟବାନ ଜିନିଷ ଜଳି ପାଉଁଶ ହୋଇଯାଇଥିଲା।
ସ୍ଥାନୀୟ ଲୋକମାନେ ଧୂଆଁ ଦେଖି ତୁରନ୍ତ ଅଗ୍ନିଶମ ବିଭାଗକୁ ଖବର ଦେଇଥିଲେ। ସୂଚନା ପାଇ ଟିଟିଲାଗଡ଼ ଅଗ୍ନିଶମ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ନିଆଁ ଲିଭାଇବା କାର୍ଯ୍ୟ ଆରମ୍ଭ କରିଥିଲେ। ଦୀର୍ଘ ସମୟର ଉଦ୍ୟମ ପରେ ଅଗ୍ନିକୁ ନିୟନ୍ତ୍ରଣକୁ ଅଣାଯାଇଥିଲା।
ସୌଭାଗ୍ୟବଶତଃ ଘରେ ଥିବା ସମସ୍ତ ପରିବାର ସଦସ୍ୟ ସମୟରେ ବାହାରକୁ ଚାଲିଆସିଥିବାରୁ କୌଣସି ଜୀବନହାନି କିମ୍ବା ଆହତ ଘଟଣା ଘଟିନାହିଁ। ତେବେ ଅଗ୍ନିକାଣ୍ଡରେ ହୋଇଥିବା ଆର୍ଥିକ କ୍ଷତିର ପରିମାଣ ଏପର୍ଯ୍ୟନ୍ତ ଆକଳନ କରାଯାଇନାହିଁ।
ସ୍ଥାନୀୟ ବାସିନ୍ଦାଙ୍କ କହିବା ଅନୁଯାୟୀ, ବିଦ୍ୟୁତ ତାରରୁ ନିଆଁ ଲାଗି ଏସି ତୁରନ୍ତ ତରଳି ଯାଇଥିଲା। ସେଠାରେ ଥିବା ଗୋଦାମରେ ପଲିଥିନ୍, ଫେନାଇଲ୍ ଏବଂ ଟର୍ପେଣ୍ଟାଇନ୍ ଭଳି ଦାହ୍ୟ ପଦାର୍ଥ ଥିବାରୁ ନିଆଁ ଦ୍ରୁତ ଗତିରେ ବ୍ୟାପି ଯାଇଥିଲା।
ଘଟଣାସ୍ଥଳରେ ଅଗ୍ନିଶମ ବିଭାଗ, ପୁଲିସ, ପୌରପାଳିକା, ପିଏଚଇ ଏବଂ ବିଦ୍ୟୁତ ବିଭାଗର ଅଧିକାରୀମାନେ ପହଞ୍ଚିଥିଲେ। ସ୍ଥାନୀୟ ଯୁବକମାନେ ମଧ୍ୟ ଉଦ୍ଧାର ଓ ଅଗ୍ନି ନିୟନ୍ତ୍ରଣ କାର୍ଯ୍ୟରେ ସହଯୋଗ କରିଥିଲେ। ଘଟଣାର ପ୍ରକୃତ କାରଣ ଏବଂ କୌଣସି ବିଦ୍ୟୁତ ସୁରକ୍ଷା ତ୍ରୁଟି ଥିଲା କି ନାହିଁ, ସେନେଇ ତଦନ୍ତ ଜାରି ରହିଛି।
ନିଟ୍-ୟୁଜି ୨୦୨୬ ପ୍ରଶ୍ନପତ୍ର ଲିକ୍ ବିବାଦ ଏବଂ ପରୀକ୍ଷା ବ...
ଦେଶର ସଡ଼କ ଭିତ୍ତିଭୂମି ବିକାଶକୁ ଆହୁରି ଗତିଶୀଳ କରିବା ଲକ...
ନିଟ୍-ୟୁଜି ୨୦୨୬ ପ୍ରଶ୍ନପତ୍ର ଲିକ୍ ବିବାଦ ପରେ ଜୁନ୍ ୨୧ରେ...
ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ପଶ୍ଚିମ ଏସିଆର...
