ଭୁବନେଶ୍ୱର:ମା’ଠାରୁ ଅଲଗା ହୋଇ ଚାପରେ ଥିବା ୫ଟି ଶିଶୁ ଓରାଙ୍ଗଉଟାନ୍ଙ୍କ ମନରୁ ଭୟ ଓ ଚିନ୍ତା ଦୂର କରିବା ପାଇଁ ନନ୍ଦନକାନନରେ ଏବେ ଆରମ୍ଭ ହୋଇଛି ଏକ ନିଆରା ପ୍ରୟାସ। ସେମାନଙ୍କୁ ଲୋରି ସହିତ ଶାସ୍ତ୍ରୀୟ ସଙ୍ଗୀତ ଶୁଣାଯାଉଛି। ଏହି ସଙ୍ଗୀତ ଥେରାପି ଜରିଆରେ ସେମାନଙ୍କ ଚାପ କମାଇବାକୁ ଚେଷ୍ଟା କରାଯାଉଛି।

ବର୍ତ୍ତମାନ ୫ଟି ଓରାଙ୍ଗଉଟାନ୍ ନନ୍ଦନକାନନରେ କ୍ୱାରେଣ୍ଟାଇନ୍ରେ ଅଛନ୍ତି। ମା’କୁ ଖୋଜିବା ସମୟରେ ସେମାନଙ୍କଠାରେ ଚାପ ଓ ଅସ୍ଥିରତାର ଲକ୍ଷଣ ଦେଖାଯାଇଥିଲା। ଏହାପରେ ବିଶେଷଜ୍ଞଙ୍କ ପରାମର୍ଶରେ ସେମାନଙ୍କ ମାନସିକ ଚାପ କମାଇବା ପାଇଁ ସଙ୍ଗୀତ ଥେରାପିର ସହାୟତା ନିଆଯାଇଛି।

କ୍ୱାରେଣ୍ଟାଇନ୍ ରୁମ୍ରେ ଶାସ୍ତ୍ରୀୟ ସଙ୍ଗୀତ ବଜାଯାଉଥିବା ବେଳେ ଏହି ଶିଶୁ ଓରାଙ୍ଗଉଟାନ୍ମାନେ ପରସ୍ପର ସହ ଖେଳୁଛନ୍ତି, ଝୁଲାରେ ଝୁଲୁଛନ୍ତି ଏବଂ ପରସ୍ପରକୁ ଧରି ରହୁଛନ୍ତି। ଦିନରାତି ସେମାନେ ଏକାଠି ରହୁଛନ୍ତି ଏବଂ ପରସ୍ପରଠାରୁ ଅଲଗା କରାଯାଉନାହିଁ।

ସ୍ୱାସ୍ଥ୍ୟ ପରୀକ୍ଷା ପାଇଁ ଅପେକ୍ଷା

ଓୟୁଏଟି ଅଧୀନସ୍ଥCWH Health Committee୫ଟି ଓରାଙ୍ଗଉଟାନ୍ର ସ୍ୱାସ୍ଥ୍ୟାବସ୍ଥା ଯାଞ୍ଚ କରିଛି। ସେମାନଙ୍କୁ ଏକାଠି ରଖିବା ପାଇଁ କମିଟି ପରାମର୍ଶ ଦେଇଛି। ଚାପ କମିବା ପରେ ସେମାନଙ୍କଠାରୁ DNA ନମୁନା ସଂଗ୍ରହ କରାଯିବ। ଆହୁରି ପ୍ରାୟ ୧୦ ଦିନ ପରେ ରକ୍ତ ପରୀକ୍ଷା କରାଯିବ ବୋଲି ନନ୍ଦନକାନନ କର୍ତ୍ତୃପକ୍ଷ କହିଛନ୍ତି।

ବାଲେଶ୍ୱରରୁ ମିଳିଥିଲେ ୫ ଓରାଙ୍ଗଉଟାନ୍

ଗତ ମଙ୍ଗଳବାର ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ୍ର ବିଚିତ୍ରପୁର ଜଙ୍ଗଲ ଅଞ୍ଚଳରୁ ଏହି ୫ଟି ଦୁର୍ଲଭ ଓରାଙ୍ଗଉଟାନ୍ ମିଳିଥିଲେ। ସେମାନେ କିପରି ଓ କେଉଁଠାରୁ ଓଡ଼ିଶାକୁ ଆସିଲେ, ତାହାକୁ ନେଇ ରହସ୍ୟ ଜାରି ରହିଛି। ସମ୍ଭାବ୍ୟ ଚୋରାଚାଲାଣ ଦିଗରୁ ମଧ୍ୟ ତଦନ୍ତ ଚାଲିଛି।

ଘଟଣାର ତଦନ୍ତ ପାଇଁ ସ୍ପେଶାଲ ଟାସ୍କ ଫୋର୍ସ (STF) ବାଲେଶ୍ୱରରେ ପହଞ୍ଚିଥିବା ବେଳେ ୪୦ରୁ ଅଧିକ CCTV ଫୁଟେଜ୍ ଯାଞ୍ଚ କରାଯାଇଛି। ଓରାଙ୍ଗଉଟାନ୍ମାନେ ଚାପରେ ଥିବାରୁ ପୂର୍ବରୁ ଯୋଜନା ହୋଇଥିବା ନମୁନା ସଂଗ୍ରହକୁ ମଧ୍ୟ ସ୍ଥଗିତ ରଖାଯାଇଥିଲା।