ଦେଶର ବିଭିନ୍ନ କେନ୍ଦ୍ର ସରକାରୀ ମନ୍ତ୍ରଣାଳୟ ଓ ବିଭାଗରେ ନୂଆ ନିଯୁକ୍ତି ପାଇଥିବା ଯୁବକ-ଯୁବତୀଙ୍କୁ ନେଇ ୨୦ତମ ରୋଜଗାର ମେଳା ଶନିବାର ଆୟୋଜିତ ହେବ। ଏହି ଅବସରରେ ପ୍ରଧାନମନ୍ତ୍ରୀ ମୋଦୀ ଭିଡିଓ କନଫରେନ୍ସିଂ ମାଧ୍ୟମରେ ନବନିଯୁକ୍ତ ପ୍ରାର୍ଥୀଙ୍କୁ ସମ୍ବୋଧିତ କରିବା ସହ ୫୧ ହଜାରରୁ ଅଧିକ ନିଯୁକ୍ତିପତ୍ର ବଣ୍ଟନ କରିବେ।

ନବନିଯୁକ୍ତ ପ୍ରାର୍ଥୀମାନେ ରେଳବାଇ, ରାଜସ୍ୱ ବିଭାଗ, ଗୃହ ମନ୍ତ୍ରଣାଳୟ, ସ୍ୱାସ୍ଥ୍ୟ ଓ ପରିବାର କଲ୍ୟାଣ, ଆର୍ଥିକ ସେବା ଏବଂ ପ୍ରତିରକ୍ଷା ସମେତ ବିଭିନ୍ନ କେନ୍ଦ୍ର ସରକାରୀ ବିଭାଗରେ ଯୋଗଦେବେ।

କଟକରେ ରୋଜଗାର ମେଳା

କଟକର ରେଭେନ୍ସା ବିଶ୍ୱବିଦ୍ୟାଳୟ ପରିସରସ୍ଥିତ କନଭେନସନ୍ ସେଣ୍ଟରରେ ରୋଜଗାର ମେଳା ଆୟୋଜିତ ହେବ। କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ ଓରାମ ମୁଖ୍ୟ ଅତିଥି ଭାବେ ଯୋଗଦେଇ ନବନିଯୁକ୍ତ କର୍ମଚାରୀଙ୍କୁ ନିଯୁକ୍ତିପତ୍ର ପ୍ରଦାନ କରିବେ।

ଭୁବନେଶ୍ୱରରେ ୧୬୧ ନବନିଯୁକ୍ତ ପ୍ରାର୍ଥୀ

ଭୁବନେଶ୍ୱର ରେଳ ଅଡିଟୋରିୟମରେ ଆୟୋଜିତ କାର୍ଯ୍ୟକ୍ରମରେ ପ୍ରାୟ ୧୬୧ ଜଣ ନବନିଯୁକ୍ତ ପ୍ରାର୍ଥୀ ଅଂଶଗ୍ରହଣ କରିବେ। ଏମାନଙ୍କ ମଧ୍ୟରେ ରେଳବାଇର ୩୭, ସ୍ୱାସ୍ଥ୍ୟ ବିଭାଗ/AIIMSର ୪୧, ଡାକ ବିଭାଗର ୩୦ ଏବଂ ଭୁବନେଶ୍ୱର CGSTର ୨୨ ଜଣ ରହିଛନ୍ତି।

ଏହାବ୍ୟତୀତ ଆୟକର/CBDT, ESIC ଓଡ଼ିଶା, ଜଳ ଶକ୍ତି ମନ୍ତ୍ରଣାଳୟ, ଆର୍ଥିକ ସେବା, CISF, ଶିକ୍ଷା ମନ୍ତ୍ରଣାଳୟ, ପ୍ରତିରକ୍ଷା ହିସାବ ବିଭାଗ ଏବଂ ପରିସଂଖ୍ୟାନ ଓ କାର୍ଯ୍ୟକ୍ରମ କାର୍ଯ୍ୟାନ୍ୱୟନ ମନ୍ତ୍ରଣାଳୟର ନବନିଯୁକ୍ତମାନେ ମଧ୍ୟ ଏଥିରେ ସାମିଲ ହେବେ।

ଭୁବନେଶ୍ୱର କାର୍ଯ୍ୟକ୍ରମରେ କେନ୍ଦ୍ର ଗ୍ରାମୀଣ ବିକାଶ ରାଷ୍ଟ୍ରମନ୍ତ୍ରୀ କମଲେଶ ପାସୱାନ ମୁଖ୍ୟ ଅତିଥି ଭାବେ ଯୋଗଦେବେ। ରୋଜଗାର ମେଳାର ଉଦ୍ଦେଶ୍ୟ ଓ ପ୍ରମୁଖ ଦିଗ ଉପରେ ଏକ ସ୍ୱଳ୍ପ ଚଳଚ୍ଚିତ୍ର ପ୍ରଦର୍ଶନ ପରେ ପ୍ରଧାନମନ୍ତ୍ରୀଙ୍କ ସମ୍ବୋଧନ ପ୍ରସାରଣ କରାଯିବ।