ଦୀର୍ଘ ୨୩ ବର୍ଷର ଆଇନଗତ ଲଢ଼େଇ ପରେ ଝାରସୁଗୁଡ଼ା ଜିଲ୍ଲାର ଏକ ବହୁଚର୍ଚ୍ଚିତ ମାମଲାରେ ଶେଷରେ ପୀଡ଼ିତ ଦମ୍ପତିଙ୍କୁ ନ୍ୟାୟ ମିଳିଛି। ୨୦୦୩ ମସିହାରେ ଲଇକେରା ଥାନା ଅଞ୍ଚଳରେ ଘଟିଥିବା ଅବୈଧ ଅଟକ, ମାଡ଼ ମାରିବା ଏବଂ ସର୍ବସାଧାରଣରେ ଅପମାନିତ କରିବା ମାମଲାରେ ସ୍ଥାନୀୟ ଅଦାଲତ ୧୪ ଜଣଙ୍କୁ ଦୋଷୀ ସାବ୍ୟସ୍ତ କରିଛନ୍ତି।

ଝାରସୁଗୁଡ଼ାରସିନିୟର ସିଭିଲ ଜଜ୍ (ମହିଳା ଅଦାଲତ)-କମ୍-ଜେଏମଏଫସିଅଦାଲତ ଜୁନ୍ ୨୬, ୨୦୨୬ରେ ଏହି ମାମଲାର ରାୟ ପ୍ରକାଶ କରିଥିଲେ। ସାକ୍ଷ୍ୟ, ପ୍ରମାଣ ଓ ଶୁଣାଣି ଆଧାରରେ ସମସ୍ତ ୧୪ ଅଭିଯୁକ୍ତଙ୍କୁ ଭାରତୀୟ ଦଣ୍ଡବିଧି (IPC)ର ବିଭିନ୍ନ ଧାରାରେ ଦୋଷୀ ସାବ୍ୟସ୍ତ କରାଯାଇଛି।

ଅଦାଲତ ଅଭିଯୁକ୍ତମାନଙ୍କୁ IPCର ଧାରା ୩୪୧ (ବେଆଇନ ଭାବେ ଅଟକ ରଖିବା), ୩୨୩ (ଆଘାତ ପହଞ୍ଚାଇବା), ୩୫୪ (ମହିଳାଙ୍କ ମର୍ଯ୍ୟାଦା ଭଙ୍ଗ କରିବା ଉଦ୍ଦେଶ୍ୟରେ ଆକ୍ରମଣ) ଓ ୩୫୫ (ସର୍ବସାଧାରଣରେ ଅପମାନିତ କରିବା ଉଦ୍ଦେଶ୍ୟରେ ଆକ୍ରମଣ) ସହ ଧାରା ୩୪ ଅନୁଯାୟୀ ଦୋଷୀ ସାବ୍ୟସ୍ତ କରିଛନ୍ତି। ତେବେ IPC ଧାରା ୨୯୪ ଅନ୍ତର୍ଗତ ଅଭିଯୋଗରୁ ସେମାନଙ୍କୁ ନିର୍ଦ୍ଦୋଷ ଘୋଷଣା କରାଯାଇଛି।

ମାମଲା ଅନୁଯାୟୀ, ୨୦୦୩ ମସିହାରେ କିଛି ବ୍ୟକ୍ତି ଜୋରପୂର୍ବକ ପୀଡ଼ିତ ଦମ୍ପତିଙ୍କ ଘରେ ପ୍ରବେଶ କରି ଏକ କମିଟିକୁ ସମର୍ଥନ ନକରିବାକୁ ନେଇ ଗାଳିଗୁଲଜ ଓ ଧମକ ଦେଇଥିଲେ। ପରେ ସେମାନଙ୍କୁ ଉଲଗ୍ନ କରି, ବେକରେ ଚପଲ ମାଳ ପିନ୍ଧାଇ, ମୁହଁରେ କଳା ରଙ୍ଗ ବୋଳି ଗାଁରେ ବୁଲାଇବା ସହ ଶାରୀରିକ ନିର୍ଯାତନା ଦେଇଥିବା ଅଭିଯୋଗ ହୋଇଥିଲା।

ଦୀର୍ଘ ସମୟ ପରେ ମଧ୍ୟ ପୋଲିସର ନିରନ୍ତର ତଦନ୍ତ ଓ ପ୍ରମାଣ ସଂଗ୍ରହ ଯୋଗୁଁ ଅଭିଯୋଗ ସାବ୍ୟସ୍ତ ହୋଇପାରିଛି। ରାୟ ପରେ ଝାରସୁଗୁଡ଼ା ପୋଲିସ କହିଛି ଯେ,"ଆଇନର ହାତରୁ କୌଣସି ଅପରାଧୀ ବଞ୍ଚି ପାରିବେ ନାହିଁ। ୨୩ ବର୍ଷ ପରେ ମଧ୍ୟ ଏହି ମାମଲାରେ ଦୋଷୀ ସାବ୍ୟସ୍ତ ହେବା ପୋଲିସର ନିରନ୍ତର ପ୍ରୟାସର ଫଳ।"