ହ୍ୱାଟସଆପ୍‌ର ନୂଆ ‘ୟୁଜରନେମ୍’ ଫିଚର ଲଞ୍ଚ ପୂର୍ବରୁ ଏହାକୁ ନେଇ କେନ୍ଦ୍ର ସରକାର ସତର୍କ ହୋଇପଡ଼ିଛନ୍ତି। ସରକାରଙ୍କ ଆଶଙ୍କା ହେଉଛି, ଏହି ବ୍ୟବସ୍ଥା ଲାଗୁ ହେଲେ ଅନଲାଇନ୍ ଠକେଇ, ନକଲି ପରିଚୟ ସୃଷ୍ଟି ଓ ସାଇବର ଜାଲିଆତି ଘଟଣା ବଢ଼ିପାରେ। ଏହି କାରଣରୁ ସୂଚନା ଓ ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଫିଚରର ସୁରକ୍ଷା ଓ ଗୋପନୀୟତା ବ୍ୟବସ୍ଥାକୁ ସମୀକ୍ଷା କରୁଛି।

ସରକାରୀ ସୂତ୍ର ଅନୁଯାୟୀ, ଆବଶ୍ୟକ ପଡ଼ିଲେ ହ୍ୱାଟସଆପ୍‌ର ମୂଳ କମ୍ପାନି ମେଟାକୁ ନୋଟିସ୍ ଜାରି କରାଯାଇପାରେ। ନୀଟ୍ ପରୀକ୍ଷା ବିବାଦ ସମୟରେ ଟେଲିଗ୍ରାମ ବିରୋଧରେ ନିଆଯାଇଥିବା କଡ଼ା ଆଭିମୁଖ୍ୟ ଭଳି ଏହି ମାମଲାରେ ମଧ୍ୟ ଆଇନଗତ ପଦକ୍ଷେପ ନିଆଯାଇପାରେ ବୋଲି ସୂଚନା ମିଳିଛି।

ସରକାରଙ୍କ ମତରେ, ଯେକୌଣସି ମେସେଜିଂ ପ୍ଲାଟଫର୍ମ ନିଜ ବ୍ୟବସ୍ଥାର ଅପବ୍ୟବହାର ରୋକିବା ଦାୟିତ୍ୱ ନେବା ଉଚିତ। ଯଦି କୌଣସି ନୂଆ ଫିଚର ଦ୍ୱାରା ଠକେଇ, ମିଥ୍ୟା ପ୍ରଚାର କିମ୍ବା ଜାଲିଆତି ବଢ଼େ, ତେବେ ସେଥିପାଇଁ ସମ୍ପୃକ୍ତ ପ୍ଲାଟଫର୍ମକୁ ଦାୟୀ ଧରାଯାଇପାରେ।

ଅନ୍ୟପଟେ, ହ୍ୱାଟସଆପ୍ କହିଛି ଯେ ଅନେକ ବ୍ୟବହାରକାରୀ ଅଜଣା ବ୍ୟକ୍ତି କିମ୍ବା ଗ୍ରୁପ୍‌ରେ ନିଜର ମୋବାଇଲ୍ ନମ୍ବର ସେୟାର କରିବାକୁ ଚାହୁଁନଥାନ୍ତି। ସେଥିପାଇଁ ୩୫ ଅକ୍ଷର ବିଶିଷ୍ଟ ‘ୟୁଜରନେମ୍’ ବ୍ୟବସ୍ଥା ଆଣାଯାଉଛି। ଏହି ଫିଚର ସମ୍ପୂର୍ଣ୍ଣ ଇଚ୍ଛାଧୀନ ରହିବ ଏବଂ ବ୍ୟବହାରକାରୀ ଚାହିଲେ ଯେକୌଣସି ସମୟରେ ୟୁଜରନେମ୍ ପରିବର୍ତ୍ତନ କିମ୍ବା ବିଲୋପ କରିପାରିବେ।

କମ୍ପାନି ଆହୁରି କହିଛି ଯେ, ସେଲିବ୍ରିଟି ଓ ସାର୍ବଜନୀନ ବ୍ୟକ୍ତିଙ୍କ ନାମର ଅପବ୍ୟବହାର ରୋକିବା ପାଇଁ କିଛି ହାଇ-ପ୍ରୋଫାଇଲ୍ ୟୁଜରନେମ୍ ସଂରକ୍ଷିତ ରହିବ। ବ୍ୟବସାୟୀ ଓ କଣ୍ଟେଣ୍ଟ କ୍ରିଏଟରମାନେ ଫେସବୁକ୍ କିମ୍ବା ଇନଷ୍ଟାଗ୍ରାମ ସହ ସମାନ ୟୁଜରନେମ୍ ବ୍ୟବହାର କରିବା ପାଇଁ ମେଟା ଆକାଉଣ୍ଟ ସେଣ୍ଟରର ସହାୟତା ନେଇପାରିବେ। ପ୍ରାରମ୍ଭିକ ପର୍ଯ୍ୟାୟରେ ଏହି ସୁବିଧା କେବଳ ମୋବାଇଲ୍ ଆପ୍‌ରେ ଉପଲବ୍ଧ ହେବ।

ସାଇବର ସୁରକ୍ଷା ବିଶେଷଜ୍ଞମାନେ କହିଛନ୍ତି ଯେ, ଫୋନ୍ ନମ୍ବର ଗୋପନ ରହିବାରୁ କିଛି ଠକେଇବାଜ ନକଲି ପରିଚୟରେ ଲୋକଙ୍କୁ ଠକିବାର ଚେଷ୍ଟା କରିପାରନ୍ତି। ତେବେ ହ୍ୱାଟସଆପ୍ ସ୍ପଷ୍ଟ କରିଛି ଯେ, ନକଲି ପରିଚୟ ରୋକିବା ପାଇଁ ସୁରକ୍ଷାର ଏକାଧିକ ସ୍ତର ରହିବ ଏବଂ ‘Username Key’ ଭଳି ବିଶେଷ ସୁରକ୍ଷା ବ୍ୟବସ୍ଥା ମଧ୍ୟ ଦିଆଯିବ। କମ୍ପାନି କହିଛି ଯେ, ଏହି ଫିଚର ଆସିବା ପରେ ମଧ୍ୟ ବ୍ୟକ୍ତିଗତ ଚାଟ୍ ପୂର୍ବପରି ଏଣ୍ଡ-ଟୁ-ଏଣ୍ଡ ଏନକ୍ରିପ୍ସନ୍ ଦ୍ୱାରା ସୁରକ୍ଷିତ ରହିବ।