ଥଳପତି ବିଜୟଙ୍କ ବହୁ ପ୍ରତୀକ୍ଷିତ ତାମିଲ ଚଳଚ୍ଚିତ୍ର ‘ଜନ ନାୟଗନ’ ରିଲିଜ୍ ଦିଗରେ ଆଉ ଏକ ପଦକ୍ଷେପ ଆଗକୁ ବଢ଼ିଛି। କେନ୍ଦ୍ରୀୟ ଚଳଚ୍ଚିତ୍ର ପ୍ରମାଣନ ବୋର୍ଡ (CBFC) ଫିଲ୍ମକୁ ‘A’ ସାର୍ଟିଫିକେଟ୍ ପ୍ରଦାନ କରିଛି। ସେନ୍ସର ସାର୍ଟିଫିକେଟ୍ ୯ ଜୁଲାଇରେ ଜାରି ହୋଇଥିବା ବେଳେ ଫିଲ୍ମର ମୋଟ ଦୈର୍ଘ୍ୟ ୧୮୩ ମିନିଟ୍ ୧୧ ସେକେଣ୍ଡ ରହିଛି।

ତେବେ ସାର୍ଟିଫିକେଟ୍ ସହିତ CBFC ଫିଲ୍ମରେ ୧୨ଟି ପରିବର୍ତ୍ତନ କରିବାକୁ ନିର୍ଦ୍ଦେଶ ଦେଇଛି। ଡ଼. ବି.ଆର୍. ଆମ୍ବେଦକରଙ୍କ ପୁସ୍ତକ ମୁଖପୃଷ୍ଠା ସହ ଜଡ଼ିତ ଏକ ଦୃଶ୍ୟରେ ପରିବର୍ତ୍ତନ କରାଯାଇଛି। ସେହିପରି ‘TVK’ ଶବ୍ଦର ସମସ୍ତ ଉଲ୍ଲେଖକୁ ଅଡିଓ ଓ ଭିଜୁଆଲରୁ ମ୍ୟୁଟ୍ କିମ୍ବା ବଦଳାଇବାକୁ କୁହାଯାଇଛି।

ଏହାଛଡ଼ା ଭାରତୀୟ ଜାତୀୟ ପତାକା ଦେଖାଯାଇଥିବା ଏକ ଦୃଶ୍ୟକୁ ହଟାଇବାକୁ ବୋର୍ଡ ନିର୍ଦ୍ଦେଶ ଦେଇଛି। ‘Bhagavathan’, ‘Ranganathar’, ‘Thevidiya Paiya’ ଏବଂ ‘Oththa’ ଭଳି କିଛି ଶବ୍ଦକୁ ମଧ୍ୟ ମ୍ୟୁଟ୍ କରାଯାଇଛି।

‘ଅପରେସନ୍ ମେଲୁହା’ ସମ୍ବନ୍ଧୀୟ ଏକ ଦୃଶ୍ୟରେ ‘OM’ ଶବ୍ଦକୁ ବିଲୋପ କରିବା ସହ ସଦ୍ଦାମ୍ ହୁସେନଙ୍କ ଫାଶୀ ସମ୍ପର୍କିତ ଉଲ୍ଲେଖକୁ ମଧ୍ୟ ହଟାଇବାକୁ କୁହାଯାଇଛି।

ଭିଜୁଆଲ୍ ପରିବର୍ତ୍ତନ ମଧ୍ୟରେ ଜିଲ୍ଲାପାଳଙ୍କ କାର୍ଯ୍ୟାଳୟର ବ୍ୟାଜ୍‌କୁ ଅସମ୍ମାନଜନକ ଭାବରେ ଦେଖାଯାଇଥିବା ଦୃଶ୍ୟକୁ ବଦଳାଇବାକୁ ନିର୍ଦ୍ଦେଶ ମିଳିଛି। ଏଥିସହ କିଛି ସଂଳାପକୁ ସମ୍ପୂର୍ଣ୍ଣ ମ୍ୟୁଟ୍ କରାଯାଇଛି ଏବଂ ଶିଶୁକୁ ପୋଡ଼ିବା ସମ୍ବନ୍ଧୀୟ ଦୃଶ୍ୟକୁ ହଟାଇ ଅନ୍ୟ ଦୃଶ୍ୟ ସ୍ଥାନିତ କରାଯାଇଛି।

CBFC ନିର୍ଦ୍ଦେଶ ଅନୁସାରେ ମୋଟ ୨୦ ସେକେଣ୍ଡ ଦୃଶ୍ୟ ବିଲୋପ ଏବଂ ୧୦ ସେକେଣ୍ଡ ପରିବର୍ତ୍ତନ କରାଯାଇଥିଲେ ମଧ୍ୟ ଫିଲ୍ମର ମୋଟ ଦୈର୍ଘ୍ୟ ଅପରିବର୍ତ୍ତିତ ରହିଛି।

ଏଚ୍‌. ବିନୋଥଙ୍କ ନିର୍ଦ୍ଦେଶନାରେ ଏବଂ KVN Productions ବ୍ୟାନରରେ ନିର୍ମିତ ଏହି ଫିଲ୍ମରେ ବିଜୟଙ୍କ ସହ ପୂଜା ହେଗଡେ, ବବି ଦେଓଲ ଓ ମମିଥା ବୈଜୁ ମୁଖ୍ୟ ଭୂମିକାରେ ଅଛନ୍ତି। ଖବର ଅନୁସାରେ ଫିଲ୍ମଟି ଜୁଲାଇ ଶେଷ ସପ୍ତାହରେ ମୁକ୍ତି ପାଇପାରେ ଏବଂ ତାମିଲନାଡୁରେ ପ୍ରାୟ ୧,୦୦୦ ପ୍ରେକ୍ଷାଳୟରେ ପ୍ରଦର୍ଶିତ ହେବାର ସମ୍ଭାବନା ରହିଛି।