ଫିଫା ବିଶ୍ୱକପ୍-୨୦୨୬ର ପ୍ରି-କ୍ୱାର୍ଟର ଫାଇନାଲରେ ଆର୍ଜେଣ୍ଟିନା ଓ ଇଜିପ୍ଟ ମଧ୍ୟରେ ହୋଇଥିବା ରୋମାଞ୍ଚକର ମୁକାବିଲା ପରେ ଭିଡିଓ ଆସିଷ୍ଟାଣ୍ଟ ରେଫରି (VAR) ନିଷ୍ପତ୍ତିକୁ ନେଇ ବଡ଼ ବିବାଦ ଦେଖାଦେଇଛି। ୨-୦ରେ ପଛୁଆ ଥିବା ଆର୍ଜେଣ୍ଟିନା ଶେଷ ପର୍ଯ୍ୟାୟରେ ଜବରଦସ୍ତ ପ୍ରତ୍ୟାବର୍ତ୍ତନ କରି ୩-୨ ଗୋଲରେ ବିଜୟୀ ହୋଇ କ୍ୱାର୍ଟର ଫାଇନାଲକୁ ପ୍ରବେଶ କରିଛି।

ମ୍ୟାଚ୍‌ର ପ୍ରଥମାର୍ଧରେ ଇଜିପ୍ଟ ଚମତ୍କାର ପ୍ରଦର୍ଶନ କରି ୨-୦ରେ ଆଗୁଆ ରହିଥିଲା। ଦ୍ୱିତୀୟାର୍ଧରେ ମୋସ୍ତାଫା ଜିକୋ ଆଉ ଏକ ଗୋଲ୍ କରିଥିଲେ। କିନ୍ତୁ VAR ଯାଞ୍ଚ ପରେ ରେଫରି ସେହି ଗୋଲ୍‌କୁ ବାତିଲ କରିଦେଇଥିଲେ। VARରେ ଦେଖାଯାଇଥିଲା ଯେ, ଗୋଲ୍ ହେବା ପୂର୍ବରୁ ଇଜିପ୍ଟର ଜଣେ ଖେଳାଳି ଆର୍ଜେଣ୍ଟିନାର ଡିଫେଣ୍ଡର ଲିସାଣ୍ଡ୍ରୋ ମାର୍ଟିନେଜଙ୍କୁ ଫାଉଲ୍ କରିଥିଲେ।

ଏହି ନିଷ୍ପତ୍ତି ପରେ ମ୍ୟାଚ୍‌ର ଚିତ୍ର ବଦଳିଯାଇଥିଲା। ଆର୍ଜେଣ୍ଟିନା ଶେଷ ୧୩ ମିନିଟ୍‌ରେ ଲଗାତାର ତିନୋଟି ଗୋଲ୍ କରି ମ୍ୟାଚ୍‌କୁ ନିଜ ସପକ୍ଷରେ ନେଇଥିଲା। ଅଧିନାୟକ ଲିଓନେଲ୍ ମେସିଙ୍କ ନେତୃତ୍ୱରେ ଦଳ କ୍ୱାର୍ଟର ଫାଇନାଲରେ ପ୍ରବେଶ କରିଛି।

ମ୍ୟାଚ୍‌ ଶେଷ ପରେ ଇଜିପ୍ଟର ମୁଖ୍ୟ କୋଚ୍ ହୋସାମ୍ ହାସାନ୍ ରେଫରିଙ୍କ ନିଷ୍ପତ୍ତିକୁ କଡ଼ା ସମାଲୋଚନା କରିଥିଲେ। ତାଙ୍କ କହିବା ଅନୁଯାୟୀ, ଇଜିପ୍ଟର ଗୋଲ୍ ବାତିଲ୍ କରିବାରେ VAR ହସ୍ତକ୍ଷେପ କରିଥିଲା, କିନ୍ତୁ ଆର୍ଜେଣ୍ଟିନାର ବିଜୟୀ ଗୋଲ୍ ପୂର୍ବରୁ ଇଜିପ୍ଟ ଖେଳାଳିଙ୍କ ଉପରେ ହୋଇଥିବା କଥିତ ଫାଉଲ୍‌କୁ ଯାଞ୍ଚ କରାଯାଇନଥିଲା। ସେ ଦାବି କରିଥିଲେ ଯେ, ରେଫରିଙ୍କ ନିଷ୍ପତ୍ତି ମ୍ୟାଚ୍‌ର ଫଳାଫଳକୁ ପ୍ରଭାବିତ କରିଛି।

ଇଜିପ୍ଟର ଖେଳାଳି ମୋସ୍ତାଫା ଜିକୋ ମଧ୍ୟ ମ୍ୟାଚ୍‌ରେ ନିଜ ଦଳ ସହ ଅନ୍ୟାୟ ହୋଇଥିବା ଅଭିଯୋଗ କରିଛନ୍ତି। ଏହାପରେ କିଛି ସୋସିଆଲ ମିଡିଆ ୟୁଜର୍ସ ଏବଂ ଇଜିପ୍ଟ ସମର୍ଥକ ଫିଫା ଆର୍ଜେଣ୍ଟିନାକୁ ଟୁର୍ଣ୍ଣାମେଣ୍ଟରେ ରଖିବା ପାଇଁ ପକ୍ଷପାତ କରିଥିବା ଦାବି କରିଛନ୍ତି।

ତେବେ ଏହି ଅଭିଯୋଗକୁ ସମର୍ଥନ କରିବା ପାଇଁ କୌଣସି ପ୍ରମାଣ ସାମ୍ନାକୁ ଆସିନାହିଁ ଏବଂ ଫିଫା ପକ୍ଷରୁ ମଧ୍ୟ ଏନେଇ କୌଣସି ଆଧିକାରିକ ପ୍ରତିକ୍ରିୟା କିମ୍ବା ସ୍ୱୀକୃତି ଦିଆଯାଇନାହିଁ।

ଏହି ଘଟଣା ପରେ ବିଶ୍ୱ ଫୁଟବଲରେ VARର ବ୍ୟବହାର, ରେଫରିଙ୍କ ନିଷ୍ପତ୍ତିର ସ୍ୱଚ୍ଛତା ଏବଂ ମ୍ୟାଚ୍ ପରିଚାଳନାକୁ ନେଇ ପୁଣିଥରେ ଚର୍ଚ୍ଚା ଆରମ୍ଭ ହୋଇଛି। ଅନ୍ୟପକ୍ଷରେ, ବିଜୟ ସହ ଆର୍ଜେଣ୍ଟିନା ବିଶ୍ୱକପ୍ କ୍ୱାର୍ଟର ଫାଇନାଲକୁ ଉନ୍ନୀତ ହୋଇ ଟ୍ରଫି ବଜାୟ ରଖିବାର ଦୌଡ଼ରେ ରହିଛି।