ଭାରତ-ଆମେରିକା ପ୍ରତିରକ୍ଷା ସମ୍ପର୍କକୁ ନେଇ ବଡ଼ ବୟାନ ଦେଇଛନ୍ତି ଭାରତରେ ଆମେରିକାର ରାଷ୍ଟ୍ରଦୂତ ସର୍ଜିଓ ଗୋର୍। ଏକ ସ୍ୱତନ୍ତ୍ର ସାକ୍ଷାତକାରରେ ସେ କହିଛନ୍ତି ଯେ, ଦୁଇ ଦେଶର ପ୍ରତିରକ୍ଷା ସମ୍ପର୍କ କେବଳ ଅସ୍ତ୍ରଶସ୍ତ୍ର ବିକ୍ରି ଓ କିଣାବିକା ମଧ୍ୟରେ ସୀମିତ ନୁହେଁ। ଏହାର ମୂଳ ଆଧାର ହେଉଛି ପରସ୍ପର ମଧ୍ୟରେ ଥିବା ‘ବିଶ୍ୱାସ’।

ଗୋର୍‌ଙ୍କ କହିବା ଅନୁସାରେ, ଆମେରିକା ବିଶ୍ୱର ପ୍ରତ୍ୟେକ ଦେଶକୁ ନିଜର ସର୍ବଶ୍ରେଷ୍ଠ ସାମରିକ ଉପକରଣ ବିକ୍ରି କରେନାହିଁ। ଭାରତ ସେହି ଦେଶଗୁଡ଼ିକ ମଧ୍ୟରେ ରହିଛି, ଯାହା ଉପରେ ଆମେରିକାର ଭରସା ରହିଛି। ଉନ୍ନତ ପ୍ରତିରକ୍ଷା ପ୍ରଯୁକ୍ତି ଓ ସାମରିକ ସାମଗ୍ରୀ ନେଇ ଭାରତ ଭଳି ବିଶ୍ୱସ୍ତ ସହଯୋଗୀ ସହ କାମ କରିବାକୁ ୱାଶିଂଟନ୍‌ ଏକ ବଡ଼ ସୁଯୋଗ ଭାବେ ଦେଖୁଛି।

ଭାରତ-ଆମେରିକା ପ୍ରତିରକ୍ଷା ସହଯୋଗର ଉଦାହରଣ ଭାବେ ସେ ଜାଭେଲିନ୍‌ ଆଣ୍ଟି-ଟ୍ୟାଙ୍କ୍‌ ମିସାଇଲ୍‌ ସିଷ୍ଟମ୍‌ ଓ ଆପାଚି ହେଲିକପ୍ଟରର କଥା କହିଛନ୍ତି। ଜାଭେଲିନ୍‌ ମିସାଇଲ୍‌ର ଭାରତରେ ସହ-ଉତ୍ପାଦନ ନେଇ ଟାଟା ଆଡଭାନ୍ସଡ୍‌ ସିଷ୍ଟମ୍ସ ଲିମିଟେଡ୍‌ ଓ ଜାଭେଲିନ୍‌ ଜଏଣ୍ଟ ଭେଞ୍ଚର ମଧ୍ୟରେ ଏକ ବୁଝାମଣା ହୋଇଛି। ଭାରତରେ ମିସାଇଲ୍‌ର ଫାଇନାଲ୍‌ ଆସେମ୍ବଲି ଓ ଇଣ୍ଟିଗ୍ରେସନ୍‌ ସହ କିଛି ଉପାଦାନ ଉତ୍ପାଦନର ସୁଯୋଗ ନେଇ ଏହି ସହଯୋଗରେ ଅନୁସନ୍ଧାନ କରାଯିବ।

ଗୋର୍‌ ଏହା ମଧ୍ୟ କହିଛନ୍ତି ଯେ, ଦୁଇ ଦେଶର ସମ୍ପର୍କ କେବଳ ପ୍ରତିରକ୍ଷା ସାମଗ୍ରୀ ଉପରେ ନିର୍ଭରଶୀଳ ନୁହେଁ। ନିୟମିତ ସାମରିକ ଅଭ୍ୟାସ ଓ ଦୀର୍ଘ ସମୟର ସହଯୋଗ ମଧ୍ୟରେ ଗଢ଼ିଉଠିଥିବା ବିଶ୍ୱାସ ଏହି ସମ୍ପର୍କକୁ ଆହୁରି ମଜବୁତ କରୁଛି। ଭାରତ ଅନ୍ୟ ଯେକୌଣସି ଦେଶ ତୁଳନାରେ ଆମେରିକା ସହ ଅଧିକ ସାମରିକ ଅଭ୍ୟାସ କରୁଥିବା ସେ ଦାବି କରିଛନ୍ତି। ରାଜସ୍ଥାନରେ ହେବାକୁ ଥିବା UDAWAS ଅଭ୍ୟାସକୁ ମଧ୍ୟ ସେ ଦୁଇ ଦେଶର ସହଯୋଗର ଉଦାହରଣ ଦେଇଛନ୍ତି।

ଏଥିସହ ଆମେରିକା ରାଷ୍ଟ୍ରଦୂତ ଭାରତ-ଆମେରିକା ସମ୍ପର୍କରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍‌ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବ୍ୟକ୍ତିଗତ ସମ୍ପର୍କର ମଧ୍ୟ ଉଲ୍ଲେଖ କରିଛନ୍ତି। ଉଭୟ ନେତାଙ୍କ ମଧ୍ୟରେ ପ୍ରକୃତ ବନ୍ଧୁତ୍ୱ ରହିଛି ବୋଲି ସେ କହିଛନ୍ତି।