ଉତ୍ତରପ୍ରଦେଶରେ ବନ୍ଧୁକ ଲାଇସେନ୍ସ ଟ୍ରାନ୍ସଫର ପାଇଁ ଆବେଦନ କରିଥିବା ଜଣେ ବ୍ୟକ୍ତିଙ୍କୁ ଜିଲ୍ଲାପାଳଙ୍କ ନିଆରା ପରାମର୍ଶ ଏବେ ଚର୍ଚ୍ଚାରେ। ଆବେଦନକାରୀଙ୍କୁ ପ୍ରଥମେ ପାନ ମସଲା ଛାଡ଼ିବାକୁ କହିଛନ୍ତି ଜିଲ୍ଲାପାଳ।

ମଙ୍ଗଳବାର କଲେକ୍ଟୋରେଟ୍‌ରେ ଆୟୋଜିତ ଜନସମସ୍ୟା ଶୁଣାଣି ସମୟରେ ଏହି ଘଟଣା ଘଟିଥିଲା। ନରୱାଲ ଅଞ୍ଚଳର ଅଙ୍କୁର ସିଂହ ତାଙ୍କ ମୃତ ବାପାଙ୍କ ନାଁରେ ଥିବା ବନ୍ଧୁକ ଲାଇସେନ୍ସକୁ ଉତ୍ତରାଧିକାର ଆଧାରରେ ନିଜ ନାଁକୁ ଟ୍ରାନ୍ସଫର କରିବା ପାଇଁ ଜିଲ୍ଲାପାଳ ଜିତେନ୍ଦ୍ର ପ୍ରତାପ ସିଂହଙ୍କ ନିକଟରେ ଆବେଦନ କରିଥିଲେ।

ଆଲୋଚନା ସମୟରେ ଜିଲ୍ଲାପାଳ ଅଙ୍କୁର ପାନ ମସଲା ଚୋବାଉଥିବା ଦେଖିଥିଲେ। ଏହାପରେ ସେ ମଜାଳିଆ ଢଙ୍ଗରେ କହିଥିଲେ, “ତୁମର ଛେପ ହିଁ ତୁମର ଅସ୍ତ୍ର, ପ୍ରଥମେ ପାନ ମସଲା ଛାଡ଼।” ଏହି ଟିପ୍ପଣୀ ଶୁଣି ଉପସ୍ଥିତ ଲୋକଙ୍କ ମଧ୍ୟରେ ହସର ମାହୋଲ ସୃଷ୍ଟି ହୋଇଥିଲା।

ପାନ ମସଲା ଛାଡ଼ିବାକୁ ଦେଲେ ଗୁରୁତ୍ୱ

ଜିଲ୍ଲାପାଳ ଅଙ୍କୁରଙ୍କୁ ଆବଶ୍ୟକ ଦସ୍ତାବିଜ ଦାଖଲ କରିବା ସହ ନିର୍ଦ୍ଧାରିତ ଯାଞ୍ଚ ପ୍ରକ୍ରିୟା ପୂରଣ କରିବାକୁ କହିଥିଲେ। ଏହା ସହିତ ତାଙ୍କ ବାପା-ମାଆ, ଜେଜେବାପା ଏବଂ ଗ୍ରାମ ମୁଖିଆଙ୍କଠାରୁ ସେ ପାନ ମସଲା ଛାଡ଼ିଛନ୍ତି ଏବଂ ଭବିଷ୍ୟତରେ ମଧ୍ୟ ଏହା ସେବନ କରିବେ ନାହିଁ ବୋଲି ଶପଥପତ୍ର ଦେବାକୁ କୁହାଯାଇଥିଲା।

ଅଧିକାରୀଙ୍କ କହିବା ଅନୁସାରେ, ଏହାର ଉଦ୍ଦେଶ୍ୟ ଆବେଦନକାରୀଙ୍କୁ ଏକ ଖରାପ ଅଭ୍ୟାସ ଛାଡ଼ିବା ପାଇଁ ଉତ୍ସାହିତ କରିବା। ଏହା ଦ୍ୱାରା ସେ ଟଙ୍କା ସଞ୍ଚୟ କରିବା ସହ ନିଜ ସ୍ୱାସ୍ଥ୍ୟର ମଧ୍ୟ ଯତ୍ନ ନେଇପାରିବେ ବୋଲି କୁହାଯାଇଛି।

ଉତ୍ତରାଧିକାରରେ ବନ୍ଧୁକ ଲାଇସେନ୍ସ ସ୍ୱତଃ ଟ୍ରାନ୍ସଫର ହୁଏନି

ଅଧିକାରୀମାନେ ସ୍ପଷ୍ଟ କରିଛନ୍ତି ଯେ ବନ୍ଧୁକ ଲାଇସେନ୍ସ ଉତ୍ତରାଧିକାର ମିଳିଲେ ସ୍ୱତଃ ନୂଆ ବ୍ୟକ୍ତିଙ୍କ ନାଁକୁ ଟ୍ରାନ୍ସଫର ହୁଏ ନାହିଁ।

ଆବେଦନକାରୀ ଆବଶ୍ୟକ ଦସ୍ତାବିଜ ଦାଖଲ କରିବା ପରେ ନିର୍ଦ୍ଧାରିତ ଯାଞ୍ଚ ପ୍ରକ୍ରିୟା ସମ୍ପନ୍ନ ହେବ। ଏହାପରେ ପ୍ରଚଳିତ ନିୟମ ଅନୁସାରେ ତାଙ୍କ ଆବେଦନ ଉପରେ ନିଷ୍ପତ୍ତି ନିଆଯିବ।